“အဝဲသ့ၣ်တဲတၢ်မနုၤလဲၣ်န့ၣ် ယသ့ၣ်ညါ ဘၣ်ဆၣ် ယတဲနၤ…” ဒ် ယမ့ၢ်ဖိသၣ်ပိာ်ခွါဖိတဂၤအသိး, ယနၢ်ဟူယမိၢ်တဲယၤ တၢ်ကတိၤတဘီအံၤ အဘျီလၢအကထိန့ၣ်လီၤ. တၢ်ဂ့ၢ်တခီ ကိးဘျီဒဲး မ့ၢ်ဒၣ် တံၤသကိးတၢ်ဆီၣ်သနံးလိာ်သးအဂ့ၢ်န့ၣ်လီၤ. ယမိၢ်ကျဲးစၢးသိၣ်လိယၤ ဒ်သိးယတလူၤပိာ်ထွဲမၤထွဲပှၤဂၤအခံအဂီၢ်န့ၣ်လီၤ. ယတမ့ၢ် ဖိသၣ်ပိာ်ခွါဖိလၢၤဘၣ် သနာ်က့ပှၤဂီၢ်မုၢ် အတၢ်ဆိကမိၣ်ပာ်သူၣ်ပာ်သးန့ၣ် အိၣ်မူအိၣ်ဂဲၤဒီး ဒိၣ်စိဒိၣ်ကမီၤ လၢယသးပူၤန့ၣ်လီၤ. တၢ်အဒိလၢ ခ့ခါခဲအံၤ မ့ၢ်ဝဲ တၢ်ကတိၤတထံၣ်လၢအမ့ၢ်ဝဲ, “အိၣ်မူအိၣ်ဂဲၤဒီး ပှၤလၢအထံၣ်တၢ် လၢအဂ့ၤတကပၤအကျါတက့ၢ်” န့ၣ်လီၤ. တၢ်ကတိၤတထံၣ်အံၤ ညီနုၢ် ပကနၢ်ဟူအီၤအါဘျီ ဘၣ်ဆၣ် တၢ်သံကွၢ်လၢ ပကြၢးသံကွၢ်မ့ၢ်ဝဲ, “တၢ်အံၤ မ့ၢ်တၢ်လီၤဂာ်ဒီးခရံာ်ဧါ” န့ၣ်လီၤ.

“မ့မ့ၢ် ယဲဒၣ်အံၤ ယစံးဘၣ်သု…”ကစၢ်ခရံာ်သူဝဲ တၢ်ကတိၤဆှၢနုာ်အံၤ တဘျုးဘျီ လၢလံာ်မးသဲ ၅ အပူၤန့ၣ်လီၤ. ဟီၣ်ခိၣ်အံၤ စံးဘၣ်ပှၤ တဘိယုၢ်ဃီန့ၣ် မ့ၢ်တၢ်မနုၤလဲၣ်န့ၣ် ကစၢ်ယ့ၣ်ရှူးသ့ၣ်ညါဝဲဂ့ၤဂ့ၤန့ၣ်လီၤ. ဘၣ်ဆၣ် အဝဲအသးဆၢန့ၢ်ဝဲလၢ ပကအိၣ်မူလီၤဆီ ဒီးပှၤဂၤန့ၣ်လီၤ. လၢတၢ်ဂ့ၢ်အံၤန့ၣ်, အဝဲစံးဝဲ, “အဲၣ် သုဒုၣ်သုဒါတက့ၢ်. ဒီးပှၤလၢအမၤတရီတပါသု, ဒီးမၤအၢမၤနးသုန့ၣ် ဘါထုကဖၣ်န့ၢ်အဂီၢ်တက့ၢ်”န့ၣ်လီၤ (:၄၄). လၢခံ လၢလံာ်စီဆှံအသီအပူၤန့ၣ်, တၢ်မၢဖိ စီၤပီလူးသူဝဲ တၢ်ကတိၤတဖၣ်အံၤန့ၣ် မ့ၢ်မတၤအဂီၢ်လဲၣ်, ဆိကမိၣ်ကွၢ်တက့ၢ်. ဘၣ်ဝဲမ့ၢ်ဝဲလီၤ. မ့ၢ်ဒၣ်ပှၤလီၤ. “ပမ့ၢ်ယွၤအဒုၣ်အဒါ” (ရိမ့ၤ ၅:၁ဝ) န့ၣ်လီၤ. ပှၤတနီၤကစံးဝဲလၢ “မၤဒ်ယတဲအသိး, တမ့ၢ်ဒ်ယမၤအသိးဘၣ်” ကစၢ်ယ့ၣ်ၡူး လီၤဆီဝဲဒီးပှၤတဖၣ်န့ၣ်လီၤ. မ့မ့ၢ် အ၀ဲမၤလီၤတ့ၢ် အတၢ်ကတိၤခီဖျိ အတၢ်မၤတဖၣ် န့ၣ်လီၤ. အဝဲအဲၣ်ပှၤဒီး ဟ့ၣ်လီၤအသးသမူလၢ ပဂီၢ်န့ၣ်လီၤ.

လၢခရံာ်အပူၤ တၢ်လီၢ် မ့ၢ်အိၣ်ဝဲ ထဲဒၣ်လၢ“ပှၤလၢအထံၣ်တၢ်လၢအဂ့ၤတဖၣ်”အဂီၢ်န့ၣ်ဒီး လၢပဂီၢ်တၢ်ကမၤအသးဒ်လဲၣ်. ပစံးဘျုးကစၢ်ယွၤလၢအတၢ်အဲၣ်န့ၣ် တအိၣ်သန့ၤထီၣ်အသးလၢ နီၢ်တဂၤအဖီခိၣ်ဘၣ်. ယွၤအဲၣ်ဟီၣ်ခိၣ်ဖိဒိၣ်မး ဒီးလၢအဝဲအဂံၢ်အဘါအပူၤ ပဘၣ်တၢ်ကိးပှၤ ဒ်သိးပကလီၤဂာ်ဒီးအီၤန့ၣ်လီၤ.