လၢကီၢ်အမဲရကၤတၢ်အိၣ်ဖှိၣ်သရၣ်တဂၤ ဖဲအလဲၤဝဲဆူ ဝ့ၢ်ဆံးဆံးဖိတဝ့ၢ် လၢကီၢ်မိၢ်ပှၢ်အၤဖြံၤကၤအမုၢ်နုာ်တကပၤ အဆၢကတီၢ်, ဒ်အမ့ၢ် တမှံၤသရၣ်အသိး မၤလီၤတံၢ်ဝဲလၢ အကလဲၤတုၤဘၣ်ဝဲ ဘၣ်ဆၢဘၣ်ကတီၢ် ဖဲဂီၤ ၁၀ နၣ်ရံၣ် လၢအိၣ်ဘှံးနံၤ တၢ်ဘါအဂီၢ်န့ၣ်လီၤ. ဘၣ်ဆၣ် ဖဲ အလဲၤတုၤဝဲဒၣ်လၢ တၢ်ဘါလီၢ်ဆံးဖိအံၤန့ၣ် တထံၣ်ဝဲ ပှၤနီၤတဂၤဘၣ်န့ၣ်လီၤ. လၢတၢ်န့ၣ်အဃိ, အဝဲဘၣ်အိၣ်ခိးဝဲ တနၣ်ရံၣ်, ခံနံၣ်ရံၣ် ဒီးလၢခံကတၢၢ်န့ၣ် တၢ်ကအိၣ် ဖဲ ၁၂:၃၀ ဃာ်ဃာ်န့ၣ် လီၢ်ကဝီၤတၢ်အိၣ်ဖှိၣ်သရၣ်လၢ အဘၣ်ဟဲဝဲလၢ တၢ်လီၢ်အယံၤ, ပိာ်ထွဲဃုာ်ဒီး ပှၤသးဝံၣ် ခွါယၢၣ်ဖိတဖၣ် ဒီးပှၤဝ့ၢ်ဖိတဖၣ် ဒီးစးထီၣ်ဝဲ တၢ်ဘါန့ၣ်လီၤ. တၢ်ဘါဝံၤဒီး ယတၢ်အိၣ်ဖှိၣ်သရၣ် စံးဘၣ်ယၤ “အကတၢၢ် ပစးထီၣ် တၢ်ဘါတၢ်ရဲၣ်တၢ်ကျဲၤ, သးစီဆှံကစၢ်ကွဲမုာ်ပှၤ ဒီးကစၢ်ယွၤန့ၣ် တစဲၤခံဝဲဒၣ်ဘၣ်”န့ၣ်လီၤ. ယတၢ်အိၣ်ဖှိၣ်သရၣ် နၢ်ပၢၢ်ဝဲ လုၢ်လၢ်တၢ်ဆဲးတၢ်လၤလၢ အတဒ်သိးလိာ်သးဒီး ပှၤလၢ တၢ်အိၣ်အသးအဂ့ၤအဂီၢ်န့ၣ်လီၤ.
တၢ်ဆၢကတီၢ် လီၤဂာ်ဒ် ပထိၣ်သတြီၤစံၣ်ညီၣ်တဲာ်အီၤသ့ သနာ်က့ ယွၤအတၢ်ဆၢကတီၢ်လၢ အဘၣ်အလၢအပှဲၤအံၤ ဘၣ်တၢ်အၢၣ်လီၤတူၢ်လိာ်ဝဲလၢ လံာ်စီဆှံဒီတဘ့ၣ်န့ၣ်လီၤ. အဃိ, ဖဲ စီၤလါစရူး ဆါဒီး သံဝဲအခါန့ၣ်, ကစၢ်ယ့ၣ်ၡူး ဟဲတုၤဝဲဖဲ လွံၢ်သီဝံၤအလီၤခံအဃိ စီၤလါစရူး အဒီပုၢ်ဝဲၢ်မုၣ်တဖၣ် သံကွၢ် ဘၣ်မနုၤအဃိလဲၣ် န့ၣ်လီၤ. နီၢ်မၢ်သၤစံးဘၣ် ကစၢ်ယ့ၣ်ၡူး လၢယိၤ ၁၁:၂၁ အပူၤ, “ကစၢ်ဧၢ နမ့ၢ်အိၣ်တ့ၢ်ဖဲအံၤဒီး, ယဒီပုၢ်ဝဲၢ်ခွါတသံဘၣ်ဝဲဘၣ်”န့ၣ်လီၤ. ဘၣ်သ့ၣ်သ့ၣ် ပကဆိကမိၣ် ဒ်သိးအံၤ ဒီးအဲၣ်ဒိးသ့ၣ်ညါ ဘၣ်မနုၤ ယွၤတမၤချ့ချ့လၢ ကဘှီဘၣ်က့ၤ ပတၢ်ကီတၢ်ခဲတဖၣ်န့ၣ်လဲၣ် န့ၣ်လီၤ. လၢတၢ်အံၤအလီၢ်န့ၣ် ပမ့ၢ်အိၣ်ခိး ယွၤအတၢ်စံးဆၢ ဒီးအစိကမီၤ လၢတၢ်နာ်န့ၣ် ဂ့ၤဒိၣ်ဝဲဒၣ်န့ၣ်လီၤ.
ပှၤမၤလိယွၤဂ့ၢ်ပီညါစဲၣ်နီး ဟိဝး(ဒ) သၢမဲ (Howard Thurman) ကွဲးဝဲလၢ, “ပၢ်ယွၤဧၢ, ပအိၣ်ခိးတုၤဒၣ်လဲၣ် အကတၢၢ်န့ၣ် နဂံၢ်နဘါ ကကဲထီၣ် ပဂံၢ်ပဘါ, နသးကကဲထီၣ်ပသးဒီး နသးလၢအပျၢ် တၢ်ဒဲးဘးန့ၣ် ကကဲထီၣ် ပသးလၢ အပျၢ်တၢ်ဒဲးဘးအဂီၢ်န့ၣ် ပအိၣ်ခိးဝဲဒၣ်န့ၣ်လီၤ.” လၢခံန့ၣ်, ဒ် စီၤလါစရူးအသိး ဖဲယွၤစံးဆၢတၢ်န့ၣ်, ပကဘၣ်ဆိၣ်ဂ့ၤလီၤလိာ်လီၤလး, နီၢ်နီၢ်တခီ လၢအတမ့ၢ်ဝဲ တၢ်စဲၤခံဘၣ်န့ၣ်လီၤ.
