တၢ်ကူၢ်မၤသံ ဒီးကထၢၣ်မၣ်တ့ၣ်လူၣ်သၣ်ခ့ ကၠူနယၢၣ် (Dr. Martin Luther King Jr.) လၢအလီၤပျံၤလီၤဖုးအံၤ ကဲထီၣ်အသးဖဲ ကီၢ်အမဲရကၣ် ထံလီၢ်ကီၢ်ပူၤတၢ်ခွဲးတၢ်ယၣ် အတၢ်ဟူးတၢ်ဂဲၤ ဒိၣ်ထီၣ်ထီထီၣ်ဖဲ ၁၉၆၀ နံၣ်တဖၣ်အပူၤန့ၣ်လီၤ. ဘၣ်ဆၣ် ၄ သီဝံၤ အလီၢ်ခံ, အမါမုၢ်ကမဲ ခိၣ်ရဲးထၣ် စကီး ခ့ (Coretta Scott King) လၢတၢ်သးဒူအပူၤ ဟံးန့ၢ်အဝၤအလီၢ်ဒီး တီခိၣ်ရိၣ်မဲ တၢ်ထီဒါတၢ်ဟး လၢတၢ်မုၣ်တၢ်ခုၣ်အပူၤန့ၣ်လီၤ. ခိၣ်ရဲးထၣ်အိၣ်ဒီး တၢ်သးဆူၣ်လၢ တၢ်တီတၢ်လိၤအဂီၢ် ဒီး မ့ၢ်တ့ၢ်ဝဲ ပှၤမၤနၢၤတၢ်စဲၣ်နီး လၢအလီၤပျံၤတဂၤလၢ တၢ်ဂ့ၢ်တၢ်ကျိၤတဘျုးတီၤန့ၣ်လီၤ.
မးသဲ ၅:၆ အပူၤ ယ့ၣ်ၡူးစံးဝဲ, “ပှၤလၢတၢ်သၣ်ဝံၤအသးဒီး တၢ်သူအသးလၢတၢ်တီတၢ်လိၤတဖၣ်န့ၣ် ဘၣ်ဆိၣ်ဂ့ၤဝဲလီၤ.အဂ့ၢ်ဒ်အံၤႇ အဝဲသ့ၣ်တဖၣ်န့ၣ် ကဘၣ်တၢ် သးကညီၤအီၤလီၤ” . ယသ့ၣ်ညါလၢမုၢ်တနံၤ ယွၤကဟဲဟ့ၣ်ပှၤ တၢ်တီတၢ်လိၤ ဒီးမၤလိၤမၤဘၣ်က့ၤ တၢ်တမ့ၢ်တတီခဲလၢာ်န့ၣ်လီၤ. ဘၣ်ဆၣ်လၢတၢ်ဆၢကတီၢ်အံၤ တချုးဟဲတုၤဒံးဘၣ်န့ၣ်, ပအိၣ်ဒီးတၢ်ခွဲးယာ်လၢ ပကမၤဖျါထီၣ် ယွၤအတၢ်တီတၢ်လိၤနီၢ်နီၢ် လၢဟီၣ်ခိၣ် ဒ်သိးခိၣ်ရဲးထၣ်မၤဝဲန့ၣ်လီၤ. လံာ်ယၡါယၤ ၅၈:၆-၇ ပာ်ဖျါ ဖျိဖျိဖျါဖျါ ဘၣ်ဃးဒီး ယွၤအတၢ်ကိးအၦၤဂီၢ်မုၢ်ဒ်သိးကမၤ “တၢ်ဃ့ၣ်လီၤကွံာ်တၢ်အၢအပျံၤ, တၢ်မၤထူၣ်ဖျဲးၦၤဘၣ်တၢ်မၤအၢအီၤႇ တၢ်နီၤဟ့ၣ်ကိၣ် လၢပှၤတၢ်သၣ်ဝံၤအသး … တၢ်ဟဲစိာ် ပှၤဘၣ်တၢ်ဟီထီၣ်ကွံာ်တဖၣ်ဆူဟံၣ်ပူၤ …ဒုးကူဒုးသိးပှၤအိၣ်ဘ့ၣ်ဆ့, တဘၣ်ပာ်တဒၢနသးဒီး ပှၤလိာ်တၢ်မၤစၢၤတဖၣ်” န့ၣ်လီၤ. တၢ်ဃုန့ၢ် တၢ်တီတၢ်လိၤလၢ ၦၤဘၣ်တၢ်မၤအၢအီၤတဖၣ် ဒီးပှၤလၢအဘၣ်တၢ်လဲၤကပာ်ကွံာ်တဖၣ်န့ၣ် မ့ၢ်ကျဲတဘိလၢ ပတၢ်အိၣ်မူဒုးနဲၣ်ဖျါထီၣ်ယွၤန့ၣ်လီၤ. ဝံယၡါယၤ ကွဲးဝဲလၢ အပှၤဂီၢ်မုၢ်အတၢ်ဃု တၢ်တီတၢ်လိၤန့ၣ် လီၤဂာ်ဒ် တၢ်ကပီၤထီၣ်ဒ်မုၢ်ဆ့ၣ် ဒီး အစၢမ့ၢ်ဝဲ တၢ်မၤဘျါက့ၤလၢ အဝဲသ့ၣ်ဃုာ်ဒီး ပှၤဂၤစ့ၢ်ကီး န့ၣ်လီၤ(:၈).
မုၢ်တနံၤအံၤ, မ်ယွၤကမၤစၢၤပှၤ ဒ်သိးပကသူၣ်လီၤ တၢ်သၣ်ဝံၤသၣ်စ့ၤ ယွၤအတၢ်တီတၢ်လိၤ လၢဟီၣ်ခိၣ်ချၢန့ၣ်တက့ၢ်. ဒ်ပဃုထံၣ် တၢ်တီတၢ်လိၤလၢယွၤအကျဲ ဒီးလၢယွၤအစိကမီၤအပူၤန့ၣ်, လံာ်စီဆှံစံးဘၣ်ပှၤလၢ ကမ့ၢ်တၢ်သူၣ်မံသးမုာ်လၢပဂီၢ်န့ၣ်လီၤ.
