ဒ်သိး ယကဟ့ၣ်ထီၣ် တၢ်အဒိအတဲာ်လၢ ယတၢ်စံၣ်တဲၤတဲလီၤတၢ်အဂီၢ်, ယလဲၤဆူ တၢ်ဂီၤအဃံအလၤတဘ့ၣ် အိၣ်လၢပျၢ်စီၢ်လိၤ ဒီးတ့လီၤတၢ်တိၤပျ့အသူတဘိလၢ တၢ်ဂီၤအံၤအခၢၣ်သးန့ၣ်လီၤ. ပှၤကမျၢၢ်တဖၣ် သါဆဲးဖှိး လၢတၢ်ပျံၤတၢ်ဖုးအပူၤန့ၣ်လီၤ. ဖဲယမၤဟးဂီၤ တၢ်ဂီၤအံၤအဆၢကတီၢ်, ပှၤလၢအတ့တၢ်ဂီၤအံၤန့ၣ် ဆၢထၢၣ်လၢတၢ်ကပၤ ဒီးကွၢ်ဝဲ တၢ်မၤအသးအံၤ န့ၣ်လီၤ. ဖဲန့ၣ်, အဝဲဃုထၢထီၣ် နီၣ်ခဲၣ် (brush) အသီတဘိ, ဒီးလဲလိာ်မၤသီထီၣ်က့ၤ တၢ်ဂီၤလၢအဟးဂီၤအံၤဆူ တၢ်ဂီၤလၢအဂ့ၤသမိးတဘ့ၣ်န့ၣ်လီၤ.
အဝဲအတၢ်မၤဂ့ၤထီၣ်တၢ်အံၤ ဒုးသ့ၣ်နီၣ်ယၤ တၢ်လၢယွၤမၤအီၤသ့တဖၣ် လၢပတၢ်အိၣ်မူအပူၤ ဖဲပမၤဘၣ်အၢဘၣ်သီအီၤအခါန့ၣ်လီၤ. လၢ ယရှါယၤ ၄၂:၁၈-၁၉ အပူၤ, ဝံယရှါယၤ သိၣ်က့ၤသီက့ၤ ပှၤအံၣ်စရ့လးဖိတဖၣ်လၢ အဝဲသ့ၣ်အနီၢ်သးတၢ်မဲာ်ဘျီၣ် နၢ်တအၢအဂီၢ်လီၤ. ဘၣ်ဆၣ် လၢခံန့ၣ် ဝံတဲဖျါထီၣ်ဝဲ တၢ်မုၢ်လၢ်လၢအဘၣ်ထွဲဒီး ယွၤအတၢ်မၤပူၤဖျဲးဒီးတၢ်အုၣ်က့ၤခီၣ်က့ၤလီၤ. ယရှါယၤ ၄၃:၁ ပာ်ဖျါဝဲ “ပျံၤတၢ်တဂ့ၤ. အဂ့ၢ်ဒ်အံၤ, ယပှ့ၤက့ၤလံနၤလီၤ”. ယွၤမၤတၢ် ဒ်သိးအံၤတမံၤဃီန့ၣ် သ့ဝဲဒၣ်န့ၣ်လီၤ. အဆၢဖိ ၅-၇ စံးဝဲ ဖဲပမၤဘၣ်တၢ်ဒဲးဘးဝံၤ အလီၢ်ခံဒၣ်လဲၣ်, ပမ့ၢ်အၢၣ်လီၤပတၢ်သရူးကမၣ်တဖၣ် ဒီးဟဲက့ၤဆူယွၤအအိၣ်န့ၣ်, အဝဲပျၢ်ပတၢ်ကမၣ် ဒီးမၤဘျါက့ၤပှၤလီၤ (ကွၢ် ၁ ယိၤဟၣ် ၁:၉). ပဒုးကဲထီၣ်တၢ်ဟးဂူာ်ဟးဂီၤဆူ တၢ်ဃံတၢ်လၤတသ့ဘၣ်ဆၣ်, ယွၤမၤဝဲသ့လီၤ. တၢ်သးခုကစီၣ်လၢ ပဂီၢ်န့ၣ်မ့ၢ်ဝဲ အဝဲအုၣ်က့ၤခီၣ်က့ၤပှၤလၢ အသွံၣ်စီဆှံန့ၣ်လီၤ. လံာ်လီၣ်ဖျါ ၂၁:၄–၅ ဟ့ၣ်ပှၤတၢ်အၢၣ်လီၤလၢ စိၤလၢခံအကတၢၢ်န့ၣ်, ခရံာ်ကထွါကွံာ်ပမဲာ်ထံတဖၣ်, အုၣ်က့ၤခီၣ်က့ၤပတၢ်လဲၤပူၤကွံာ်တဖၣ်, ဒီးမၤသီထီၣ်က့ၤ တၢ်ခဲလၢာ်ခဲဆ့န့ၣ်လီၤ.
ပတထံၣ်သ့ၣ်ညါ ပတၢ်ဃဲၤပူ လၢာ်လၢာ်ဆ့ဆ့ဘၣ်. ဘၣ်ဆၣ်, ဒ် ယရှါယၤ ၄၃:၁ စံးဘၣ်ပှၤ ယွၤလၢအသ့ၣ်ညါပှၤ “လၢပမံၤ”တဂၤန့ၣ် ကမၤဃံမၤလၤထီၣ်က့ၤ ပတၢ်အိၣ်မူ အါန့ၢ်ဒံး ပထံၣ်ဆိကမိၣ်အီၤသ့န့ၣ်လီၤ. နမ့ၢ်ဒိးန့ၢ်ဘၣ်တ့ၢ်လံ တၢ်အုၣ်က့ၤခီၣ်က့ၤ ခီဖျိတၢ်နာ်လၢခရံာ်အပူၤန့ၣ်, ဒ်တၢ်ဂီၤဖိအံၤအသိး, နတၢ်ဃဲၤပူန့ၣ် အိၣ်ဒီးတၢ်အကတၢၢ်လၢအဃံအလၤ လၢတၢ်မုာ်သူၣ်မုာ်သးန့ၣ်လီၤ.
