ဖဲယဝၤ ကဲပှၤနဲၣ်လိတၢ်လၢ ပဖိအ Little League ဖျၢၣ်ယၢ်တီၢ်(baseball) ကရူၢ်အခါ, အဝဲမၤလၤကပီၤ ပှၤလိာ်ကွဲဖိတဖၣ် ခီဖျိ နံၣ်ကတၢၢ် မူးသးဖှံ ဒီးသ့ၣ်ညါပာ်ပနီၣ် အဝဲသ့ၣ် အတၢ်ကဲထီၣ်လိာ်ထီၣ် လၢတၢ်လိာ်ကွဲအကတီၢ်အံၤအပူၤန့ၣ်လီၤ. ပပှၤလိာ်ကွဲဖိ အသးစၢ်ကတၢၢ်အကျါတဂၤ, ဒၢးစတ့ၣ်(Dustin), ဟဲဆူယအိၣ် ဖဲမူးအံၤအခါန့ၣ်လီၤ. “ပရှူတၢ်လိာ်ကွဲတနံၤညါအံၤတမ့ၢ်ဘၣ်ဧါ.”

ယစံးဆၢအီၤ လၢ‘မ့ၢ်’. ‘ဘၣ်ဆၣ် ပပာ်ကဖၢလၢပသးလၢ နမၤတၢ်အဂ့ၤကတၢၢ်အဃိ န့ၣ်လီၤ.’ အဝဲစံး ‘ယသ့ၣ်ညါလီၤ’. ‘ဘၣ်ဆၣ် ပရှူလီၤ.တမ့ၢ်ဘၣ်ဧါ.’ ယကျၢၢ်ကျာ်လီၤယခိၣ် လီၤ. ‘မ့မ့ၢ်ဒ်န့ၣ်ဒီးဘၣ်မနုၤဃိ ယကလၢၢ်ဘၣ်ဒ်ပှၤမၤနၢၤတၢ်တဂၤအသိးလဲၣ်.’ ဒၢးစတ့ၣ် သံကွၢ်ဝဲန့ၣ်လီၤ. ယနံၤကမှံထီၣ်, ဒီးစံးအီၤ, ‘မ့ၢ်လၢ နမ့ၢ်ပှၤမၤနၢၤတၢ်တဂၤအဃိလီၤ.’

ဒၢးစတ့ၣ် ဆိကမိၣ်ဝဲလၢ အဝဲမ့ၢ်မၤဝဲအဂ့ၤကတၢၢ်ဒၣ်လဲၣ် တၢ်ရှူတၢ်လိာ်ကွဲန့ၣ် အခီပညီမ့ၢ်ဝဲ အတမၤနၢၤတၢ်န့ၣ်လီၤ. ဒ်ပမ့ၢ်ပှၤစူၢ်က့ၤနာ်က့ၤယ့ၣ်ရှူးအသိး, ပတၢ်ဒုးန့ၣ် တပာ်ပနီၣ်ဃာ်အသးထဲ တၢ်လိာ်ကွဲပျီအပူၤဘၣ်. သနာ်က့,တဘျီတခီၣ်န့ၣ် ပဆိကမိၣ်ဘၣ် လၢ တၢ်အိၣ်မူဘၣ်ကီဘၣ်ခဲအကတီၢ်န့ၣ် မၤသးဒ်တၢ်လၢအဒုးနဲၣ်ဖျါထီၣ် ပလုၢ်ပပှ့ၤန့ၣ်လီၤ.

ဒ်ပမ့ၢ်ယွၤအဖိတဖၣ်အသိး ပတၢ်တူၢ်ဘၣ်ခီၣ်ဘၣ်တၢ် အခဲအံၤဒီး ပတၢ်လၤကပီၤခါဆူညါ အတၢ်ဘၣ်ထွဲဘျးစဲလိာ်သးန့ၣ် စီၤပီလူး ပာ်ဂၢၢ်ပာ်ကျၢၤအီၤန့ၣ်လီၤ. ရိမ့ၤ ၈:၃၁–၃၂ ပာ်ဖျါဝဲလၢ ခီဖျိဟ့ၣ်လီၤအသးလၢပဂီၢ်, ယ့ၣ်ရှူးမၤတၢ်လၢပဂီၢ်ဆူညါ ဖဲပဒုးတၢ်ဒီးတၢ်ဒဲးဘးအဆၢကတီၢ် ဒီးလဲလိာ်ပှၤဆူ တၢ်အိၣ်မူအသီ လၢအလီၤဂာ်ဒီးအီၤန့ၣ်လီၤ. အဆၢဖိ ၃၃–၃၄ စံးဝဲလၢ ပဝဲခဲလၢာ် ပကကွၢ်ဆၢၣ်မဲာ်ဘၣ် တၢ်ကီတၢ်ခဲ ဒီးတၢ်မၤအၢမၤသီ သနာ်က့, ကစၢ်ယွၤအတၢ်အဲၣ် လၢအဂၢၢ်အကျၢၤ မၤစၢၤပှၤဒ်သိး ပကတူၢ်တၢ်အံၤန့ၣ်လီၤ.

ဒ်ပမ့ၢ်ယွၤအဖိတဖၣ်အသိး, တၢ်ကလ့ပစီပှၤ ဒ်သိးကပျဲပတၢ်ကွၢ်ဆၢၣ်မဲာ်တဖၣ် လၢကဆၢတဲာ် ပလုၢ်ပပှ့ၤန့ၣ်လီၤ. သနာ်က့, လၢခံကတၢၢ်န့ၣ် ပတၢ်မၤနၢၤ အိၣ်ဝဲသပှၢ်ကတၢၢ်လီၤ. အဆၢဖိ ၃၅–၃၉ စံးပှၤလၢ ပကဘၣ် ကွၢ်ဆၢၣ်မဲာ် တၢ်ဘၣ်တိၢ်ဒီး လီၤဃံၤလၢ သးသမူအတၢ်လဲၤပူၤ ဘၣ်ဆၣ် ပကမ့ၢ်ပှၤလၢ “ဒိၣ်န့ၢ်ထီန့ၢ်ဒံး ပှၤမၤနၢၤတၢ်တဖၣ်” ထီဘိန့ၣ်လီၤ .