ဖဲယမံဘၣ်ယသးတစိၤဖိအဆၢကတီၢ် ယနၢ်ဟူတၢ်သံကျံဆဲတိၢ် အဟဲသီၣ်ထီၣ်န့ၣ်လီၤ. လၢဒၢးဟီၣ်လာ်န့ၣ် ယဖိခွါဒ့တၢ်ထုးကွံာ်ပျံၤတဘိ လၢအလီမ့ၣ်ကထါလိၤအဃိလီၤ. တြဲၤတဖၣ် ဆှၢကဒါ တၢ်သီၣ်အကလုၢ်အဃိ တၢ်မုာ်ခုၣ်တအိၣ်, တၢ်ဘှ့ၣ်တၢ်ဘှီၣ်တအိၣ်, တၢ်မံတယူာ်ဖိ တအိၣ်လၢၤဘၣ်. တၢ်တဘျးဖိန့ၣ်ဝံၤဒီး, တၢ်သးဝံၣ်အကလုၢ်မုာ်လၢ အသီၣ်သဃဲၤထီၣ်ဝဲ ဒီးယဖိခွါအတၢ်ဒ့န့ၣ် ဟဲနုာ်ဆူယနၢ်ပူၤ, မ့ၢ်ဝဲ ယဖိမုၣ်ဒ့တၢ်သးဝံၣ် “Amazing Grace-အမ့းစ့ကြ့း” လၢအတနၢ်ပှီၢ်စုန့ၣ်လီၤ.
နီၢ်နီၢ်တခီ, ယဘၣ်ယသးလၢယဖိခွါအကထါတၢ်ဒ့လီၤ. ဘၣ်ဆၣ် အကတီၢ်ဖဲန့ၣ် တၢ်မၤတမုာ်တလၤယၤဒီးမၤကိၢ်မၤဂီၤမၤအ့န့ယၤလီၤ. လၢတၢ်ချ့သဒံးအပူၤ, ကၠီနယူၣ်တၢၣ် (John Newton) ထါသးဝံၣ်အဖျၢၣ်တဖၣ် မၤသ့ၣ်နီၣ်ယၤ လၢတၢ်ဘျုးတၢ်ဖှိၣ် ဒိၣ်ထီၣ်အါထီၣ်လၢ တၢ်သဘံၣ်သဘုၣ်အကျါလီၤ. လၢတၢ်တပာ်သူၣ်တပာ်သးအပူၤ သးသမူအကလံၤမုၢ်လၢ အမၤကဒံကဒါတၢ်, အကလုၢ်သီၣ် ဒိၣ်သွါမ့ၢ်ဂ့ၤ, ပတအဲၣ်ဒိကနၢ်ဒၣ်ဝဲမ့ၢ်ဂ့ၤကစၢ်ယွၤအတၢ်ဘျုးတၢ်ဖှိၣ် အတၢ်သံကျံအသီၣ်န့ၣ် ရှဲပျီဒီးမ့ၢ်ဝဲတီဝဲ, မၤသ့ၣ်နီၣ်ပှၤ လၢယွၤအတၢ်အံးတၢ်ကွၢ်ပှၤန့ၣ်လီၤ.
ပထံၣ်ဘၣ် တၢ်မ့ၢ်တၢ်တီအံၤလၢ ယွၤအကလုၢ်ကထါအပူၤလီၤ. ဖဲစံးထီၣ်ပတြၢၤ ၁ဝ၇:၂၃-၃၂အပူၤ, ပှၤကဘီဖိတဖၣ်ဂဲၤလိာ်ဆူၣ်ဆူၣ် တၢၢ်ဆၢက့ၤထံသဝံးဖးဒိၣ်လၢအအီၣ်ကွံာ်အီၤ ပြုၤပြုၤပြၤပြၤသ့ဝဲန့ၣ်လီၤ. အဆၢဖိ ၂၆ ပာ်ဖျါဝဲ “အသးပှံၢ်လီၤဝဲလၢ အဘၣ်တၢ်ကိၢ်တၢ်ဂီၤအဃိလီၤ”. ဘၣ်ဆၣ် အဝဲသ့ၣ်တတုၤဆူတၢ်ဟးဂီၤဘၣ်, မ့မ့ၢ် လၢအဆၢဖိ ၂၈ ပာ်ဖျါဝဲ “တုၤအဘၣ်တၢ်ကိၢ်တၢ်ဂီၤဒီးကိးထီၣ်ယွၤ, ဒီးအဝဲဒၣ်ဒုးဟးထီၣ်ကွံာ်အီၤလၢ အတၢ်နးတၢ်ဖှီၣ်အပူၤလီၤ”. လၢခံကတၢၢ်, ပဖးဘၣ်လၢ အဆၢဖိ ၃ဝ န့ၣ် “မ့ၢ်တၢ်ဂၢၢ်ထီၣ်န့ၢ်အီၤ ဒီးအသူၣ်ခုအသးခု ဒီးတၢ်ဆှၢအီၤ ဒ်န့ၣ်ဆူကဘီသန့ ဖဲအဆၢတုၤဝဲတပူၤန့ၣ်လီၤ”.
လၢတၢ်ဆၢကတီၢ်သဘံၣ်ဘုၣ်တဘျးဖိအပူၤ, မ့မ့ၢ်တၢ်မၤပျံၤသးသမူမ့ၢ်ဂ့ၤ, တၢ်မၤပျံၤတၢ်မံတဘျးဖိမ့ၢ်ဂ့ၤ, တၢ်အသီၣ်ဖှိၣ်အါအါဂီၢ်ဂီၢ်ဒီးတၢ်ပျံၤတၢ်ဖုးန့ၣ် မၤဟးဂီၤ ပသးသ့ဝဲဒၣ်န့ၣ်လီၤ. ဘၣ်ဆၣ်, ပမ့ၢ်နာ်ကစၢ်ယွၤ ဒီးကိးထီၣ်အီၤလၢတၢ်ထုကဖၣ်န့ၣ်, ပကလဲၤခီဖျိပလၢၢ်ဘၣ် ယွၤအတၢ်ဘျုးတၢ်ဖှိၣ် လၢအမ့ၢ် ကစၢ်ယွၤအတၢ်အိၣ်ဒီးပှၤ, အတၢ်မၤလၢမၤပှဲၤန့ၢ်ပှၤန့ၣ်လီၤ. တၢ်အံၤ မ့ၢ်ကစၢ်ယွၤ အတၢ်အဲၣ် အတၢ်သူၣ်ကညီၤသးကညီၤ ဒီးတၢ်အိၣ်ကဒုလီၢ် အသန့န့ၣ်လီၤ.
