ပီၣ်လဲၣ်ညၣ်မိၢ်ပှၢ် အအၢတဘ့ၣ်, လၢပှၤဃုမၤလိ မၤနီၣ်တၢ်သ့ၣ်တဖၣ် ဟ့ၣ်ဃာ် အမံၤလၢ ကြဲနံၣ်(Granny)န့ၣ် သ့ၣ်ညါတ့ၢ်ဝဲ အလီၢ်အလၤမူဒါ မ့ၢ်တၢ်အကါဒိၣ်ဝဲလၢ အလံၤညၣ်မိၢ်ပှၢ်ဆံးဖိ အတၢ်အိၣ်မူအဂီၢ်န့ၣ်လီၤ. ညၣ်မိၢ်ပှၢ်ဆံးဖိအံၤ အမိၢ်န့ၣ်လၢ တၢ်တယံာ်ဘၣ် အဆၢကတီၢ် သံဝဲအဃိ, ဖိၣ်ဃဲညၣ်မိၢ်ပှၢ်ဆံးဖိန့ၣ် တၢ်ဒီသဒၢဒီး တၢ်ဆီၣ်ထွဲမၤစၢၤ မ့ၢ်တအိၣ်ဘၣ်ဒီး ကအိၣ်မူအိၣ်ဂဲၤဒီး ကဒိၣ်ထီၣ်အကစၢ်ဒၣ်ဝဲအဂီၢ် အသးအနံၣ်အလါ တထီၣ်ဘးဒံးဘၣ်အဃိန့ၣ်လီၤ. ဖံဖံညၣ်မိၢ်ပှၢ်အံၤ အသးမ့ၢ်အိၣ် ၈၀ လံ (ဘၣ်သ့ၣ်သ့ၣ်ကပှၢ်န့ၢ်ဃိးဆံ) လဲၤသကိးတၢ်ဒီးအလံၤဖိ ဒ်သိးကသိၣ်လိနဲၣ်လိအီၤ တၢ်လၢ အကြၢးသ့ၣ်ညါတဖၣ် လၢတၢ်အိၣ်မူအိၣ်ဂဲၤအဂီၢ်န့ၣ်လီၤ. အနီၢ်ကစၢ် ကဘၣ်အီၣ်ဝဲအလီၢ်န့ၣ်, ဖံဖံ နီၣ်ဖှိၣ်ညၣ်ဖိတဖၣ်လၢ ညၣ်မိၢ်ပှၢ်ဆံးဖိအံၤအဂီၢ်အဃိ လံၤဖိအံၤတမ့ၢ်ထဲကဒိးန့ၢ်တၢ်အီၣ်ဘၣ်, ကမၤလိန့ၢ်စ့ၢ်ကီးဝဲ ကဘၣ်အီၣ်တၢ်မနုၤလဲၣ် ဒီးဒ်သိးကမူဝဲအဂီၢ် တၢ်အီၣ်လၢအဝဲလိၣ်ဘၣ်န့ၣ် ကဃုထံၣ်န့ၢ်ဘၣ် ညၣ်စဲလမိၣ်အလီၢ်အကျဲတဖၣ် ဖဲလဲၣ်န့ၣ်လီၤ.

ပဝဲတဖၣ်စ့ၢ်ကီး ပအိၣ်ဒီးမံၤလၤသၣ်ကပီၤလီၤဆီဒီး တၢ်သးခုလၢပဟ့ၣ်ခီလီၤတၢ် လၢပသ့ၣ်ညါ-ပနီၤဟ့ၣ်တၢ်ဘၣ်ဃး ယွၤအတၢ်မၤလီၤလး ဒီးယွၤအသကဲာ်ပဝးတဖၣ် ဆူပှၤလၢအပိာ်ထွဲထီၣ်ပခံတဖၣ်အအိၣ်န့ၣ်လီၤ. စံး ၇၁:၁၈ အပူၤ, ပှၤသးပှၢ်အကွဲးတၢ်တဂၤ ဃ့ယွၤ ဒ်သိးအကပျဲ “ဒုးနဲၣ်ယွၤအစိအကမီၤ ဆူပှၤလၢခံတစိၤ” အဂီၢ်န့ၣ်လီၤ. ပှၤကွဲးထါသးအိၣ်နီၤဟ့ၣ်ပှၤဂၤ တၢ်လၢအသ့ၣ်ညါ ကစၢ်ယွၤအဂ့ၢ်နီၢ်နီၢ်-ဃုာ်ဒီး “ယွၤအတၢ်မၤလၢ အတီအလိၤ”ဒီး“အတၢ်အုၣ်က့ၤခီၣ်က့ၤ”တၢ်န့ၣ်လီၤ. စံး၇၁:၁၅ စံးဝဲ တၢ်မၤအံၤအလီၢ်အိၣ်ဝဲလၢ ပကဘၣ်ဒုးအိၣ်ထီၣ် လၢပတၢ်အိၣ်မူအပူၤန့ၣ်လီၤ.

ပမ့ၢ်တအိၣ်တုၤ ပသးပှၢ်ပခိၣ်ဝါဘၣ်ဆၣ် ပမ့ၢ်စံးကတိၤပာ်ဖျါထီၣ်တၢ်လၢ ပလဲၤ ခီဖျိပလၢၢ်ဘၣ် ယွၤအတၢ်အဲၣ်ဒီး အတၢ်တီတၢ်လိၤတဖၣ် ဒ်လဲၣ်ဒ်လဲၣ်အဂ့ၢ်န့ၣ် ကဲထီၣ်တၢ်ဘျုးတၢ်ဖှိၣ် လၢပှၤတဂၤဂၤအတၢ်လဲၤတၢ်ဒီး ကစၢ်ယွၤသ့ဝဲဒၣ်န့ၣ်လီၤ. အဆၢဖိ ၂၀ ပာ်ဖျါဝဲ ပတၢ်သးဆူၣ်သးဂဲၤအတၢ်နီၤဟ့ၣ် ယွၤအတၢ်ကူၣ်သ့န့ၣ် ကမ့ၢ် တၢ်လၢပှၤတဂၤဂၤအတၢ်လိၣ်ဘၣ် ဒ်သိးကမူဒီး ကဒိၣ်ထီၣ်အါထီၣ်လၢခရံာ်အပူၤ လၢတၢ်ကီတၢ်ခဲတဖၣ်အပူၤအဂီၢ်န့ၣ်လီၤ.