မိၢ်သးစၢ်တဂၤ လူၤပိာ်ထွဲအဖိမုၣ်ဖိအလီၢ်ခံ လၢအယီၢ်လ့ၣ်ခီၣ်ယီၢ်ဖိ ဒ်အခီၣ်ဆံးဆံးဖိယီၢ်ဝဲန့ၢ် အသိးန့ၣ်လီၤ.ဘၣ်ဆၣ်မ့ၢ်လၢယီၢ်ဝဲအလ့ၣ်ခီၣ်ယီၢ်ဖိ ချ့အါန့ၢ်အသးလီဝဲအဃိ ဖိသၣ်မုၣ်ဖိအလ့ၣ်ခီၣ်ယီၢ်လီၤတလ့ၣ်ဒီး မ့ၢ်လၢအခီၣ်မဲာ်ချံဘၣ်ဒိဆါအဃိ ဟီၣ်ကိးဝဲဒၣ်န့ၣ်လီၤ. အမိမိၢ်န့ၣ် လၢတၢ်ကစုဒုအပူၤ ချံးလီၤအခီၣ်လ့ၢ်ခိၣ်, သကွံၤဖုၣ်လီၤအသး, ဒီးနၢမူဖိမုၣ် အခီၣ်မဲာ်ချံ ဒ်သိးကမၤဘျါတၢ်ဆါအဂီၢ်လီၤ. တၢ်အံၤတၢ်မၤကဲထီၣ်နီၢ်နီၢ်န့ၣ်လီၤ. ဖိသၣ်မုၣ်ဖိ ဂဲၤဆၢထၢၣ်, ဒိးထီၣ်ကဒါက့ၤအလ့ၣ်ခီၣ်ယီၢ်ဖိဒီး ယီၢ်ဝဲဆူညါလီၤ. တၢ်မၤအသး ညီညီဘှါဘှါ ဒ်န့ၣ်အသိးလၢ တၢ်ဘၣ်ဒိဆါပှၤခဲလၢာ် ကဘျါဂ့ၤထီၣ်က့ၤဝဲအဂီၢ် နတဆၢဒိးန့ၢ်ဘၣ်ဧါ.
ပှၤတၢ်မၢဖိစီၤပီလူး ဒိးန့ၢ်ဘၣ်တ့ၢ်ဝဲ ယွၤအတၢ်မၤမုာ်အီၤ ဖဲဘၣ်ကွၢ်ဆၢၣ်မဲာ်ဒီး တၢ်နးတၢ်ဖှီၣ် တဘျီဘၣ်တဘျီဒီး တၢ်လၢကမၤအသး ဆူညါဆူညါစ့ၢ်ကီးန့ၣ်လီၤ. အဝဲကွဲးနီၣ် တၢ်မၤကွၢ်တမံၤဘၣ်တမံၤ ဖဲ ၂ကရံၣ် ၁၁:၂၃-၂၉ အပူၤန့ၣ် ဖျါလၢတၢ်တီၢ်အီၤ ဖျ့အီၤအါဘျီ, ဘၣ်တၢ်ကွံာ်လၢလၢၢ်, ဘၣ်ကီၤမံကီၤဂဲၤ, တၢ်သၣ်ဝံၤ, တၢ်သးသုထံ တဖၣ်န့ၣ် မ့ၢ်လၢအတၢ်သးအိၣ် တၢ်အိၣ်ဖှိၣ်ခဲလၢာ်အဂီၢ်အဃိန့ၣ်လီၤ. ၂ ကရံၣ် ၁:၃ ပာ်ဖျါဝဲလၢ စီၤပီလူးမၤလိန့ၢ် တၢ်ဘူးဘူးတံၢ်တံၢ်လၢ ယွၤမ့ၢ် “တၢ်သးကညီၤအပၢ်ဒီး တၢ်မၤမုာ် ခဲလၢာ်အကစၢ်”န့ၣ်လီၤ. မ့တမ့ၢ်ဘၣ်ဒီး ဒ်လံာ်စီဆှံအဂၤတဘ့ၣ်(NIRV) ကွဲးကျိာ်ထံဝဲအသိး “ယွၤမ့ၢ်ပၢ်လၢ အဟ့ၣ်တၢ်အဲၣ်ကပုာ်လုး”န့ၣ်လီၤ. လီၤဂာ်အါ ဒ် မိၢ်တဂၤလၢမၤမုာ်ဝဲအဖိအသိး, ကစၢ်ယွၤသကွံၤဖုၣ်လီၤအသး ဒ်သိးကကွၢ်ထွဲမၤမုာ်က့ၤ ပှၤလၢ ပတၢ်နးတၢ်ဖှီၣ်တဖၣ်အပူၤန့ၣ်လီၤ.
ယွၤအတၢ်အဲၣ်ကျဲအကျိၤအကွာ် လၢအမၤမုာ်ထီၣ်က့ၤပှၤအံၤ အိၣ်အါမး ဒီးအိၣ်အကလုာ်ကလုာ်န့ၣ်လီၤ. ယွၤကဟ့ၣ် ပှၤလံာ်စီဆှံအဆၢဖိလၢ ကဒုးဆူၣ်ထီၣ် ပဂံၢ်ဘါလၢပတၢ်လဲၤခါဆူညါအဂီၢ်, မ့တမ့ၢ် အဝဲကမၢပှၤတဂၤဂၤ ကကွဲးဆှၢန့ၣ် ပှၤလံာ်ပရၢလီၤဆီလၢ ဟ့ၣ်ဂံၢ်ဟ့ၣ်ဘါပှၤ, မ့တမ့ၢ် ကထိၣ်ဟူးထိၣ်ဂဲၤထီၣ် တံၤသကိးတဂၤ လၢကဆဲးကျိး ပှၤခီဖျိကွဲၤဒီနၢ်လၢ တၢ်စံးကတိၤမၤမုာ်ထီၣ် ပသးအဂီၢ်န့ၣ်လီၤ. ဖဲပဂုာ်ကျဲးစၢး ဂဲၤလိာ်တၢ်တဖၣ်လၢအဘၣ်ထွဲဒီး ပတၢ်ကီတၢ်ခဲတဖၣ် မ့ၢ်တလီၤမၢ်ကွံာ်ဒ်ဒၣ်လဲၣ်, မ့ၢ်လၢ ယွၤသကွံၤဖုၣ်လီၤအသး လၢကမၤစၢၤပှၤအဂီၢ်အဃိန့ၣ် ဒီးပကဂဲၤဆၢထၢၣ်, လဲၤကဒီးတၢ် ဆူညါသ့ဝဲဒၣ်န့ၣ်လီၤ.
