ပှၤကွဲးထါ ကိၤလၤဝါဖိ ဝ့လယၢၣ်ကီပါ (William Cowper) [၁၇၂၅-၁၈၀၇] န့ၣ် အပူၤကွံာ် မ့ၢ်ပှၤလၢ အပှ့ၤဆါကုၢ်ဒီးထံၣ်သ့ၣ်ညါဝဲအတံၤသကိးဒီး မ့ၢ်စ့ၢ်ကီး အတၢ်အိၣ်ဖှိၣ်သရၣ် ကၠိၤနယူတၢၣ် (John Newton) (၁၇၂၅-၁၈၀၇) န့ၣ်လီၤ. ကီပါ တူၢ်ဘၣ် တၢ်သူၣ်ဟးဂီၤသးဟးဂီၤ ဒီးတၢ်သူၣ်ကိၢ်သးဂီၤဒိၣ်မး, ဒီးကျဲးစၢးမၤသံလီၤက့ၤအသးအါန့ၢ်တဘျီန့ၣ်လီၤ. ဖဲနယူတၢၣ် (Newton) လဲၤအိၣ်သကိးအီၤအခါ, အဝဲသ့ၣ် ဟးသကိး ကျဲဖးယံာ်ဒီး ကတိၤသကိး ယွၤအဂ့ၢ်န့ၣ်လီၤ. နယူတၢၣ်ထံၣ်ဝဲလၢ ကီပါ မ့ၢ်စူးကါ အတၢ်သ့တၢ်ဘၣ်ဒီး မ့ၢ်အိၣ်ဒီး တၢ်ဂ့ၢ်တၢ်ကျိၤလၢအကကွဲးထါတဖၣ်အဂီၢ်န့ၣ်, အဘျုးအဖှိၣ် ကအိၣ်ဝဲလၢ ကီပါအဂီၢ်လီၤ. လၢတၢ်န့ၣ်အဃိ သရၣ်အံၤ မၤန့ၢ်တၢ်ဆိကမိၣ်တမံၤလၢ အကဒုးအိၣ်ထီၣ် ထါသးဝံၣ်တဘ့ၣ်န့ၣ်လီၤ. ကီပါကွဲးန့ၢ်တၢ်သးဝံၣ်အါယုၢ်အကျါ ပာ်ဃုာ်ဒီးထါသးဝံၣ် “ယွၤမၤတၢ်လၢကျဲခူသူၣ်အပူၤ” (God Moves in a Mysterious Way) န့ၣ်လီၤ. ဖဲ နယူတၢၣ်သုးအသး ဆူတၢ်အိၣ်ဖှိၣ်အဂၤတဖှိၣ်န့ၣ်, အဝဲဒီး ကီပါ ကဲဒံး တံၤသကိး စဲဘူးနီၢ်နီၢ် ဒ်အလီၢ်လီၢ် ဒီး ကွဲးအိၣ်သကိးလိာ်သး ထီဘိ, တုၤ ကီပါအသးသမူ အိၣ်မူဒီတစိၤန့ၣ်လီၤ.
ယထံၣ် လၢကီပါ ဒီး နယူတၢၣ် အတၢ်ရ့တံၤရ့သကိး လၢအဂၢၢ်အကျၢၤန့ၣ် တၢ်လီၤဂာ်လိာ်သးဒီး စီၤဒၤဝံးဒီး စီၤယိၤနၤသၣ်ခံဂၤ ဒ်လၢလံာ်စီဆှံအလီၢ်လံၤ တကတြူၢ်အပူၤ ပာ်ဖျါဝဲန့ၣ်လီၤ. ဖဲစီၤဒၤဝံး မၤနၢၤ စီၤကၤလယးဝံၤအလီၢ်ခံ ၁ ရှမူၤ ၁၈:၁ ပာ်ဖျါဝဲ “စီၤယိၤနၤသၣ် အသးစဲဘူးဒီး စီၤဒၤဝံးအသး” ဒီးအဲၣ်အီၤ ဒ်အသးဒၣ်ဝဲ အသိးန့ၣ်လီၤ. စီၤယိၤနၤသၣ် မ့ၢ် စီၤပၤစီၤစီလူး အဖိခွါ ဘၣ်ဆၣ်, အဝဲဂၢၤဃာ် စီၤဒၤဝံး လၢစီၤပၤအတၢ်သူၣ်က့ၣ်သးကါ ဒီးတၢ်သးထီၣ်, ဒီးသံကွၢ်အပၢ်ဘၣ်မနုၤအဃိ စီၤဒၤဝံး ဂ့ၤဘၣ်တၢ်မၤသံအီၤလဲၣ်န့ၣ်လီၤ. ဖဲန့ၣ်, ၁ ရှမူၤ ၂၀:၃၃ ပာ်ဖျါ “စီၤစီလူး ဆဲးဘီတဘ့ၣ် ဒ်သိးအကဆဲးဘၣ်အီၤလီၤ” န့ၣ်လီၤ. အဆၢဖိ ၄ အပူၤ စီၤယိၤနၤသၣ် ပဒ့ၣ်ကွံာ်ဘီန့ၣ် ချ့ချ့, ဒီးအသးတမုာ်ဘၣ်လၢ တၢ်လီၤမဲာ်ဆှးတမံၤလၢ အပၢ်မၤဘၣ်အတံၤသကိးအဃိန့ၣ်လီၤ.
ပှၤဒီတံၤသကိး ခံစူၣ်လိာ်အဂီၢ်, အတၢ်စၢဃာ်လိာ်သးန့ၣ် မ့ၢ်တၢ်လၢအဟ့ၣ်တၢ်သးသမူ ဒ်အဝဲသ့ၣ် မၤဆူၣ်ထီၣ်ဂံၢ်ဘါ လၢအကမၤယွၤအတၢ်ဒီး အဲၣ်ယွၤအဂီၢ်လီၤ. ဒ်န့ၣ်အသိး တနံၤအံၤ နဟ့ၣ်ဂံၢ်ဟ့ၣ်ဘါ နတံၤသကိးတဂၤဂၤကသ့ ဒ်လဲၣ်.
