ပူအဖုၣ်တယုၢ်လၢ အၣ်ကၠၢၢ်တံနါ(Argentine)အပှၤကွဲးလံာ်ဖိ ကၠီလူအံးဘီ(ကၠး)(Jorge Luis Borges) ကွဲးဝဲန့ၣ် မ့ၢ် ပှၤရိမ့ၤသုးဖိ မၤခၢးရူးဖဲး(Marcus Rufus) လၢအအီဝဲထံလၢ “ထံကျိခူသူၣ်တဘိ လၢအမၤကဆှီ ပှၤကညီလၢတၢ်သံ” တဂၤအဂ့ၢ်န့ၣ်လီၤ. နာ်သက့, လၢခံက့ၤန့ၣ် မၤခၢးသ့ၣ်ညါထီၣ်ဝဲဒၣ် လၢတၢ်သံတသ့ဘၣ်န့ၣ် တမ့ၢ်တၢ်လၢအဂ့ၤ ဒ်ပှၤတဖၣ်စံးဝဲအသိးဘၣ်. တၢ်အိၣ်မူလၢအတအိၣ်ဒီး တၢ်အဆၢန့ၣ်မ့ၢ်တၢ်အိၣ်မူ လၢအခီပညီတအိၣ်ဘၣ်န့ၣ်လီၤ. နီၢ်နီၢ်တခီ, တၢ်သံအနီၢ်ကစၢ်ဒၣ်ဝဲန့ၣ် မ့ၢ်တၢ်လၢအဟ့ၣ်တၢ်အခီပညီ ဆူတၢ်အိၣ်မူန့ၣ်လီၤ. မၤခၢးထံၣ်န့ၢ် ကသံၣ်မၤကဆှၣ်လီၤတၢ် လၢအမ့ၢ်ဝဲ ထံထီၣ်ပၢၢ်လၢအဆှံန့ၣ်လီၤ. အဝဲအီလီၤထံအံၤဝံၤဒီး, အဝဲကွးအစု လၢတၤဆှုၣ်, ဒီးတၢ်သွံၣ်တလီၤစီၤအိၣ်ထီၣ်သး, ဒ်အမ့ၢ် တၢ်ပနီၣ် လၢအဝဲဒိးန့ၢ်က့ၤတၢ်သံလံန့ၣ်လီၤ.
ဒ်မၤခၢးအသိး, ပဝဲစ့ၢ်ကီး တဘျီတခီၣ် ပသးဟးဂီၤလၢတၢ်အိၣ်မူအဆၢကတီၢ်စှၤလီၤဝဲ, ဒီးတၢ်သံဘူးထီၣ်ဝဲအဃိန့ၣ် ပာ်ဖျါဝဲဒၣ်လၢ စံး ၈၈:၃ အပူၤန့ၣ်လီၤ. ပအၢၣ်လီၤတူၢ်လိာ်လၢတၢ်သံဟ့ၣ်တၢ်အိၣ်မူအခီပညီန့ၣ်လီၤ. ဘၣ်ဆၣ်ဖဲအံၤ ပပူလီၤဆီလိာ်သးဒီး မၤခၢး အပူန့ၣ်လီၤ. ၁ ကရံၣ် ၁၅:၅၄ အပူၤ, ပသ့ၣ်ညါလၢ ခရံာ်အတၢ်သံန့ၣ်, ပထံၣ်န့ၢ် တၢ်အိၣ်မူအခီပညီနီၢ်နီၢ်န့ၣ်လီၤ. ခရံာ်ဂၢ်လီၤအသွံၣ် လၢထူၣ်စုညါအလိၤ, ဒီးမၤနၢၤတၢ်သံ, ဒီးမၤလီၤဘျၢကွံာ်တၢ်သံ လၢတၢ်မၤနၢၤအပူၤန့ၣ်လီၤ. ယိၤ ၄:၁၀ ပာ်ဖျါဝဲ လၢပဂီၢ်န့ၣ်, ကသံၣ်မၤကဆှၣ်လီၤတၢ်န့ၣ် အိၣ်ဝဲလၢကစၢ်ယ့ၣ်ရှူးခရံာ်အ“ထံမူ”အပူၤ န့ၣ်လီၤ. ၁ကရံၣ် ၁၅:၅၂ ပာ်ဖျါဝဲ မ့ၢ်လၢပအီအီၤအဃိဒီး, တၢ်သိၣ်တၢ်ဘျၢဘၣ်ဃး ဒီးတၢ်မူ, တၢ်သံ ဒီး တၢ်အိၣ်မူ လၢအသံတသ့ဘၣ်တဖၣ်န့ၣ် ဆီတလဲကွံာ်လံန့ၣ်လီၤ.
ပတပူၤဖျဲးလၢ နီၢ်ခိအတၢ်သံဘၣ်န့ၣ် မ့ၢ်တၢ်အမ့ၢ်အတီလီၤ. ဘၣ်ဆၣ် တၢ်အံၤန့ၣ် တမ့ၢ် တၢ်ဂ့ၢ်မိၢ်ပှၢ်ဘၣ်. လၢ ဧ့ၤဘြံၤ ၂:၁၁-၁၅ အပူၤ ပာ်ဖျါဝဲ, ကစၢ်ယ့ၣ်ရှူး ဃၣ်ကဒါက့ၤခိၣ်ခံ လၢပတၢ်သးဟးဂီၤခဲလၢာ် ဘၣ်ဃးဒီး တၢ်မူဒီးတၢ်သံန့ၣ်လီၤ. လၢခရံာ်အပူၤ, ပဘၣ်တၢ်မၤမုာ်မၤကျၢၤက့ၤ ပသးဒီး တၢ်မုၢ်လၢ်လၢအဘၣ်ဃးဒီး မူခိၣ်ဘီမုၢ် ဒီးတၢ်သးခု လၢအအိၣ်ဒီးအခီပညီ လၢတၢ်မူအထူအယိာ်ဒီး ခရံာ်အပူၤန့ၣ်လီၤ.
