“ယနၢ်ဟူဒၢလွဲသီၣ်ထီၣ် လၢခရံာ်အိၣ်ဖျဲၣ်အမုၢ်နံၤ” န့ၣ် မ့ၢ်ခရံာ်အိၣ်ဖျဲၣ်အတၢ်သးဝံၣ်လၢ အလီၤတိၢ်လီၤဆီနီၢ်နီၢ်တယုၢ်, ဘၣ်တၢ်ဒိးသန့ၤအသး လၢထါတယုၢ် ဒီးဘၣ်တၢ်ကွဲးန့ၣ်အီၤလၢ ဟဲနရံၣ် ဝဲး(စ)ဝီး(သ) လီဖဲလိၤ (Henry Wadsworth Longfellow) န့ၣ်လီၤ. ညီနုၢ်ပမုၢ်လၢ် ခရံာ်အိၣ်ဖျဲၣ်အတၢ်သးခုဒီး တၢ်မၤမုာ်မၤဖှံပှၤသးန့ၣ်လီၤ. ဘၣ်ဆၣ် လၢတၢ်န့ၣ်အလီၢ်န့ၣ်, ထါအဖျၢၣ်တဖၣ် ပာ်ဖျါထီၣ် တၢ်သးအုးဖးဒိၣ်ဒီး ကိးထီၣ်ဝဲ “လၢတၢ်သးဟးဂီၤ ယဆုးလီၤယခိၣ်/ ဒီးစံးတၢ်မုာ်တအိၣ်လၢဟီၣ်ခိၣ်/ မ့ၢ်လၢတၢ်သးဟ့အဂံၢ်ဆူၣ်, ဒုၣ်ဒွဲၣ် ကလူးအတၢ်သးဝံၣ်/ တၢ်အမုာ်လၢဟီၣ်ခိၣ်ချၢ, တၢ်ဂ့ၤ ကဘၣ်ပှၤကညီ”န့ၣ်လီၤ. ဘၣ်ဆၣ်ဒီး တၢ်သးဟးဂီၤအံၤ သုးအသးဆူညါ ဆူတၢ်မုၢ်လၢ်အပူၤ ဒီး မၤမုာ်မၤကျၢၤက့ၤပှၤ, ဒီးစံး “ယွၤတသံဘၣ်, ဒီးယွၤတမံဘၣ်/ တၢ်အၢကဃၣ်ကွံာ်, တၢ်တီမၤနၢၤလုၢ်ဘၢ/ တၢ်အမုာ်လၢဟီၣ်ခိၣ်ချၢ, တၢ်ဂ့ၤတၢ်ဝါကဟဲလီၤဘၣ် ပှၤကညီ” န့ၣ်လီၤ.

တၢ်မုၢ်လၢ်ဟဲထီၣ်ဝဲလၢတၢ်သးအုးထါအက့ၢ်အဂီၤအံၤ ပထံၣ်န့ၢ်အီၤစ့ၢ်ကီးလၢ တၢ်သးအုးအထါတဖၣ် လၢလံာ်စီဆှံအပူၤန့ၣ်လီၤ. မ့ၢ်ဒ်န့ၣ်သတးဒီး, စံးထီၣ်ပတြၢၤ ၄၃:၁ စးထီၣ်ဝဲ လၢပှၤကွဲးထါ အတၢ်ကိးပသူထီၣ် ဘၣ်ဃးဒီး အဒုၣ်အဒါတဖၣ် လၢအဟဲမၤဒၢၣ်အီၤ ဒီး အဆၢဖိ ၂ န့ၣ် ကစၢ်ယွၤန့ၣ် ဖျါလၢ သးပ့ၤနီၣ်တ့ၢ်လံအီၤတဂၤန့ၣ်လီၤ. ဘၣ်ဆၣ် ပှၤသးဝံၣ်တၢ် တဆိကတီၢ်ဝဲ ဖဲတၢ်သးအုးအပူၤဘၣ်, မ့မ့ၢ်အဝဲကွၢ်ထီၣ်တၢ်ဆူကစၢ်ယွၤ လၢတနၢ်ပၢၢ်ဝဲ လၢလၢပှဲၤပှဲၤတဂၤအအိၣ်ဒီး လၢတၢ်နာ်န့ၢ်ဒံးကစၢ်ယွၤအပူၤန့ၣ် သးဝံၣ်ထီၣ်ဝဲလၢ “ဘၣ်မနုၤလၢနသူၣ်ကၢ်နသးလီၤလဲၣ်. ယသးဧၢ, ဒီးနသူၣ်ကိၢ်နသးဂီၤလၢယပူၤဘၣ်မနုၤလဲၣ်. ကွၢ်လၢ်ယွၤအကျဲတက့ၢ်. အဂ့ၢ်ဒ်အံၤ, ယကစံးထီၣ်ပတြၢးဒံးအီၤ, တၢ်အုၣ်က့ၤခီၣ်က့ၤယမဲာ်, ဒီးယကစၢ်လီၤ”(:၃).

တၢ်အိၣ်မူန့ၣ် ပှဲၤဒီးတၢ်သးအုးဖးဒိၣ်အကတီၢ်တဖၣ်, ဒီးပဝဲကိးဂၤ ပဘၣ်လဲၤခီဖျိဘၣ်အီၤ တဘျီမ့တမ့ၢ်တဘျီဘၣ်န့ၣ်လီၤ. ဘၣ်ဆၣ်, ပမ့ၢ်ပျဲတၢ်သးအုးအံၤ ဒုးနဲၣ်ပှၤဆူ တၢ်မုၢ်လၢ်အကစၢ်ယွၤအအိၣ်န့ၣ်, ပသးဝံၣ်တၢ်လၢတၢ်သးခုအပူၤသ့ဝဲ, လၢမဲာ်ထံမဲာ်နိအပူၤဒၣ်လဲာ်လီၤ.