ဖဲပပာ်ပသိလ့ၣ်လၢ တၢ်လီၢ်ပျီတတီၤအကပၤဒီး ပလဲၤခီအီၤလၢပခီၣ်ဆူပဟံၣ်အခါ, ထီဘိဃာ်ဃာ် ပထြၢသၣ်အချံတဖၣ် စဲဘူးလၢပကူပသိးတဖၣ်အလိၤ, လီၤဆီဒၣ်တၢ်ဖဲ သ့ၣ်လၣ်လီၤဆှူအကတီၢ်န့ၣ်လီၤ. “ပှၤဒိးပိာ်ပှၤသိလ့ၣ်အခံ” ဆံးဆံးဖိတဖၣ်အံၤ စဲထီဃာ်လၢပကူပသိး, ပခီၣ်ဖံး, ဒီးတၢ်တမံၤလၢ်လၢ် လၢအလဲၤခီအီၤ တဖၣ်အလိၤ, ဒီး လဲၤတုၤဝဲ ဆူတၢ်လီၢ်လၢခံတတီၤန့ၣ်လီၤ. တၢ်အံၤ န့ဆၢၣ်အကျဲတမံၤလၢ အရၤလီၤ ပထြၢသၣ်အချံဖိတဖၣ် လၢယထံလီၢ်ကီၢ်ပူၤ ဒီးလၢဟီၣ်ခိၣ်ဒီဘ့ၣ်န့ၣ်လီၤ.
ဖဲယဂုာ်ကျဲးစၢး ထဲးထုးထီၣ်ကွံာ် ပထြၢသၣ်အချံလၢ အစဲဘူးဃာ်အသးတဖၣ်အံၤ လၢတၢ်ပလီၢ်သူၣ်ပလီၢ်သးအခါ, ညီနုၢ်ယဆိကမိၣ် လံာ်စီဆှံ အတၢ်သိၣ်က့ၤသီက့ၤ ပှၤစူၢ်က့ၤနာ်က့ၤတၢ်ဖိ လၢခရံာ်တဖၣ် လၢ ရိမ့ၤ ၁၂:၉ အပူၤ လၢအက “အိၣ်စဲဘူးဒီးတၢ်ဂ့ၤ” အဂီၢ်န့ၣ်လီၤ. ဖဲပကျဲးစၢးအဲၣ်ပှၤဂၤအခါ, တၢ်တၤပှၤသ့ဝဲန့ၣ်လီၤ. ဘၣ်ဆၣ်, ဒ်သးမုာ်စီဆှံ အတၢ်မၤစၢၤပှၤ လၢပကဟံးဖှီၣ်တံၢ်ဃာ် လၢာ်သး တၢ်လၢအဂ့ၤန့ၣ်ဒီး, ပတြီကွံာ်တၢ်အၢတၢ်သီ ဒီး ဒ်သးစီဆှံ ဆှၢဒုးနဲၣ်ပှၤအသိး ပတၢ်အဲၣ်တၢ်ကွံတၢ်န့ၣ် ကမ့ၢ်ဝဲတီဝဲဒၣ်န့ၣ်လီၤ.
တၢ်တြူာ်ကွံာ် ပထြၢသၣ်အချံတဖၣ် ထဲဒၣ်လၢ ပစုန့ၣ် တလီၤတဲာ်ကွံာ်ညီညီဘၣ်. အဝဲသ့ၣ်အိၣ်စဲထီသးလၢပလိၤန့ၣ်လီၤ. ပဝဲဒၣ်စ့ၢ်ကီး, ဖဲပကွၢ်စၢၢ်ဆၢ တၢ်လၢအဂ့ၤတမံၤဧိၤ ဒီးထီဘိဆိကမိၣ် ကစၢ်ယွၤအတၢ်အဲၣ်သးကညီၤတၢ်ဒီး အတၢ်မၤလိာ် တဖၣ်န့ၣ် လၢကစၢ်ယွၤအဂံၢ်အဘါအပူၤ ပအိၣ်စဲဘူးဒီးပှၤ လၢပအဲၣ်အီၤတဖၣ် သ့ဝဲဒၣ်န့ၣ်လီၤ. ယွၤမၤစၢၤပှၤ ဒ်သိးပကအဲၣ်လိာ်ကွံလိာ်ပသး “ဒ်ဒီပုၢ်ဝဲၢ်တံၢ်တံၢ်အသိး,” ဒီးသ့ၣ်နီၣ် ပာ်ပှၤဂၤအတၢ်လိၣ်တဖၣ် လၢပတၢ်လိၣ်အမဲာ်ညါန့ၣ်လီၤ (:၁၀).
မ့ၢ်မးပထြၢသၣ်အချံတဖၣ်အံၤ မၤကီမၤခဲတၢ်သ့ဝဲလီၤ. ဘၣ်ဆၣ် အဝဲသ့ၣ် မၤသ့ၣ်နီၣ်စ့ၢ်ကီး တၢ်လၢပကအိၣ်စဲဘူးဒီးပှၤဂၤ လၢတၢ်အဲၣ်အပူၤ, ဒီးခီဖျိ ယွၤအစိအကမီၤန့ၣ် ပကစှီၤဃာ်ဃံးဃံး “တၢ်ဂ့ၤ” (:၉, ကွၢ်စ့ၢ်ကီး ဖံလံးပံၤ ၄:၈-၉)န့ၣ်လီၤ.
