ပှၤဃုတီၤဖိတဖၣ် အတၢ်လိၣ်ကွဲဖျၢၣ်သွ့တြၤလဲၤအသးဂ့ၤဂ့ၤဘၣ်ဘၣ် အဖၢမုၣ်လီၤ. မိၢ်ပၢ်ဖံဖုတဖၣ် ဟ့ၣ်ဂံၢ်ဟ့ၣ်ဘါဆီၣ်ထွဲ ပှၤလိာ်ကွဲတၢ်ဖိတဖၣ် လၢတၢ်သးခု, ဖဲပှၤလိာ်ကွဲတၢ်ဖိတဖၣ်အပုၢ်ဆံး မုၢ်ခွါဖိတဖၣ် သူၣ်ဖှံသးညီလိာ်သး လၢကၠိအမဲာ်ညါ ဒၢးပျီအပူၤန့ၣ်လီၤ. သတူၢ်ကလာ် ပီၤအူရူၤတဖၣ် သီၣ်သတြီထီၣ်ဒီး လီမ့ၣ်အူဖျၢၣ်တဖၣ် ဟ့ၣ်တၢ်ပနီၣ်လၢတၢ်လိာ်ကွဲ ဒၢးဖးဒိၣ်အပူၤန့ၣ်လီၤ. တၢ်ဟ့ၣ်ပလီၢ်မ့ၣ်အူအပီးအလီအမဲာ်ခွဲးတခါ ဘၣ်တၢ်လဲၤတိၢ်အီၤလံ. တယံာ်ဘၣ်, ပှၤဒီပုၢ်ဝဲၢ်ဖိတဖၣ် ဟဲက့ၤဃ့ၢ်နုာ်လီၤကဒါက့ၤဒီဂီၢ် ဆူတၢ်လိာ်ကွဲဒၢးဖးဒိၣ် လၢတၢ်ပျံၤတၢ်ဖုးအပူၤ, ဒီးကွၢ်ဃုအမိၢ်အပၢ်တဖၣ်န့ၣ်လီၤ.
တမ့ၢ် မ့ၣ်အူအီၣ်တၢ်ဘၣ်. မ့ၢ်ဒၣ် လၢတၢ်တပာ်သူၣ်ပာ်သးအပူၤ, တၢ်ဟ့ၣ်ပလီၢ်မ့ၢ်အူန့ၣ် ဘၣ်တၢ်ထိၣ်ဂဲၤအီၤန့ၣ်လီၤ. ဘၣ်ဆၣ် ဒ်ယကွၢ်တၢ်မၤအသးအံၤ ဒီး, တၢ်ဆိကမိၣ်ဟဲနုာ်လၢယသးပူၤ လၢဖိသၣ်တဖၣ် တုၤမ့ၢ်အကလၢၢ်ဘၣ် တၢ်ဘၣ်ယိၣ်တၢ်ဂ့ၢ်ကီတမံၤမံၤ မ့ၢ်အိၣ်ထီၣ်န့ၣ်, အိၣ်တသ့တဘၣ်လၢၤဘၣ်, ဃ့ၢ်ဖိးဟုဝဲအမိၢ်အပၢ်တဖၣ်န့ၣ်လီၤ. မ့ၢ်တၢ်ဂီၤတဘ့ၣ် လၢအဒုးနဲၣ်ဖျါတၢ်နာ်န့ၢ် ပှၤလၢအဟ့ၣ်တၢ်ဘံၣ်တၢ်ဘၢ ဒီးတၢ်မၤမုာ်မၤကျၢၤက့ၤတၢ်, ဖဲတၢ်ပျံၤတၢ်ဖုးအဆၢကတီၢ်အပူၤန့ၣ်လီၤ.
လံာ်စီဆှံပာ်ဖျါ တၢ်အကတီၢ်တကတီၢ် ဖဲစီၤဒၤဝံး ဘၣ်လဲၤခီဖျိ ကွၢ်ဆၢၣ်မဲာ်ဝဲ တၢ်ပျံၤတၢ်ဖုး ဖးဒိၣ်န့ၣ်လီၤ. ၂ ရှမူၤ ၂၂:၁ ပာ်ဖျါဝဲ စီၤစီလူး ဒီးဒုၣ်ဒါအဂုၤအဂၤအါမးတဖၣ် လူၤဖီၣ်အီၤလီၤ. ဖဲယွၤအုၣ်က့ၤခီၣ်က့ၤစီၤဒၤဝံး ဆူတၢ်ဘံၣ်တၢ်ဘၢအလီၢ်န့ၣ်, စီၤပၤဖးဒိၣ်တဂၤအံၤ သးဝံၣ်ထီၣ် တၢ်စံးထီၣ်ပတြၢၤအတၢ်သးဝံၣ်တယုၢ် လၢအပာ်ဖျါထီၣ်အတၢ်သးကလၢၢ်ဘၣ် သ့သ့ဘၣ်ဘၣ်, ဘၣ်ဃးဒီးယွၤအတၢ်မၤစၢၤအဂ့ၢ်န့ၣ်လီၤ. ၂ ရှမူၤ ၂၂:၂အပူၤ အဝဲကိးဝဲယွၤ ဒ်အမ့ၢ် “ယလ့, ယတိာ်, ဒီးတၢ်မၤပူၤမၤဖျဲးယၤ” န့ၣ်လီၤ. အဆၢဖိ ၆ ဒီး၇ အပူၤ ဖဲ “တၢ်ပျုၤပူၤအပျံၤတဖၣ်” ဒီး “တၢ်သံအပျံၤသကွီၤတဖၣ်”, လူၤပိာ်အီၤအခါ, စီၤဒၤဝံး “ကိးထီၣ်”ယွၤဒီး အ “ဃ့ကညးတၢ် လဲၤနုာ်လၢ (ယွၤ) အနၢ်ပူၤလီၤ”. လၢခံကတၢၢ်န့ၣ်, ၂ ရှမူၤ ၂၂:၁၈, ၂၀ ဒီး ၄၉ အပူၤ စီၤဒၤဝံးဘိးဘၣ်သ့ၣ်ညါဝဲလၢ ယွၤ “မၤပူၤမၤဖျဲးယၤ”န့ၣ်လီၤ.
အဆၢဖိ ၃၂ ပာ်ဖျါထီၣ်ဝဲ လၢတၢ်ပျံၤတၢ်ဖုး ဒီးတၢ်တလီၤတံၢ်လီၤဆဲးအကတီၢ်, ပဃ့ၢ်ဆူ ပ“လၢၢ်” အအိၣ်သ့ဝဲလီၤ. ၂ ရှမူၤ ၂၂:၂-၃ ဒုးသ့ၣ်ညါပှၤ ဖဲပကိးထီၣ်ယွၤအမံၤန့ၣ်, ထဲအဝဲဒၣ်ဧိၤ ဟ့ၣ်ပှၤတၢ်အိၣ်တဒၢ အလီၢ် လၢပလိၣ်ဘၣ်န့ၣ်လီၤ.
