ဖဲပိာ်မုၣ်ပိာ်မၢၤ တၢ်မၤလိလံာ်စီဆှံလၢ ဘၣ်တၢ်ဒုးအိၣ်ထီၣ်သီအံၤအပူၤ ဖဲပိာ်မုၣ်ပိာ်မၢၤတဖၣ် မ့ၢ်ဘၣ်ကွၢ်ဆၢၣ်မဲာ်ဒီး တၢ်ဘၣ်မိၣ်ဘၣ်မးတဖၣ် လၢအပိာ်ထွဲလိာ်အခံတမံၤဘၣ်တမံၤအခါ, လၢတၢ်တပာ်သူၣ်ပာ်သးအပူၤ, ပဟ့ၣ်ခီဟ့ၣ်နီၤလိာ် ပတၢ်လဲၤခီဖျိတဖၣ် လၢပပာ်ထဲဒၣ်လၢပနီၢ်ကစၢ်အသးအပူၤဒၣ်ပဝဲန့ၣ်လီၤ. တၢ်လဲၤခီဖျိ ဒ်အမ့ၢ် တၢ်လီၤမၢ်ပၢ်တဂၤ, တၢ်သးဘၣ်ဒိလၢ တၢ်ဖျီအတၢ်ဆၢက့ၤအကတီၢ် ဖဲနီၢ်ဒီမိၤဝၤ လီၤဖးဝံၤအလီၢ်ခံ, တၢ်အိၣ်ဖျဲၣ်ထီၣ် ဖိလၢအနၢ်တဟူတၢ်နီတစဲး, တၢ်ဘၣ်ဃ့ၢ်ဆှၢဖိဆံးတဂၤ ဆူဂ့ၢ်ဂီၤအူတၢ်ဆါဒၢးတဖၣ်န့ၣ် လၢပှၤတဂၤဂ့ၤတဂၤဂ့ၤအဂီၢ် မ့ၢ်တၢ်ဂ့ၢ်အကီခဲဒိၣ်မး လၢအကဝံယိးဝဲထဲတဂၤဧိၤန့ၣ်လီၤ. ပှၤတဂၤဘၣ်တဂၤ အတၢ်လိၣ်ဘၣ် တၢ်ကဟုကယာ်န့ၣ် ဆှၢအီၤဆူ တၢ်တဲဖျါထီၣ် အတၢ်လဲၤခီဖျိတဖၣ်န့ၣ်လီၤ. ပမဲာ်ထံလီၤသကိးဒီး ဘါထုကဖၣ်သကိးတပူၤဃီ, ဒီးတၢ်လၢအစးထီၣ် ဒ်ပှၤစီစၣ်ဖိတဖုန့ၣ် လၢစှၤနွံအတီၢ်ပူၤ ကဲထီၣ် တံၤသကိးလၢအဘူးအတံၢ်တဖုန့ၣ်လီၤ.
ဒ်တၢ်အိၣ်ဖှိၣ်အက့ၢ်အဂီၤတဖၣ်အကျါ, ပှၤစူၢ်က့ၤနာ်က့ၤတၢ်ဖိတဖၣ် လၢယ့ၣ်ရှူးခရံာ်အပူၤန့ၣ် အိၣ်သဃဲၤဒီးပှၤတဖၣ် လၢအဘၣ်အိၣ်ဒီးတၢ်နးတၢ်ဖှီၣ်အပူၤ လၢကျဲအဒိၣ်အယိာ်ဒီး ဘူးဘူးတံၢ်တံၢ်သ့ဝဲန့ၣ်လီၤ. တၢ်ရ့လိာ်ဘၣ်ထွဲအပျံၤ လၢအစၢဃာ် ဒီပုၢ်ဝဲၢ်မုၣ်, ဒီပုၢ်ဝဲၢ်ခွါတဖၣ် လၢခရံာ်အပူၤန့ၣ် တသန့ၤထီၣ်အသးလၢ တၢ်ဆၢကတီၢ် အယံာ်လၢ ပသ့ၣ်ညါလိာ်သကိးပသးအဃိမ့ၢ်ဂ့ၤ, တၢ်ဒ်သိးလိာ်သး လၢအအိၣ်ဒီး ပှၤအဃိမ့ၢ်ဂ့ၤဘၣ်. လၢတၢ်န့ၣ်အလီၢ်န့ၣ်, မ့ၢ်ဒၣ် ပ “ဝံလိာ်တၢ်ဝံတၢ်ဃၢသကိးသကိး” ဒ်စီၤပီလူးစံးဝဲ လၢကလၤ ၆:၂ အပူၤအသိးန့ၣ်လီၤ. ခီဖျိတၢ်သန့ၤသးလၢ ယွၤအဂံၢ်အဘါအလိၤ, ပဒိကနၣ်, ပဒိသူၣ်ဒိသး, ပမၤစၢၤတၢ်ဖဲပမၤသ့, ဒီးပဘါထုကဖၣ်န့ၣ်လီၤ. ကလၤ ၆:၁၀ ပာ်ဖျါဝဲလၢ ပဃုထံၣ်ကျဲသ့ လၢပက “မၤဂ့ၤတၢ်လၢ ပှၤကညီကိးဂၤဒဲး”, “အါတက့ၢ်လၢပှၤစူၢ်က့ၤနာ်က့ၤတၢ်အဟံၣ်”အဂီၢ်လီၤ . စီၤပီလူးစံးဝဲဒၣ် လၢကလၤ ၆:၂ အပူၤ ဖဲပမ့ၢ်မၤဒ်သိးအံၤန့ၣ်, မ့ၢ်ပမၤလၢပှဲၤခရံာ်အတၢ်သိၣ်တၢ်သီ, လၢအမ့ၢ် တၢ်အဲၣ်ယွၤဒီးတၢ်အဲၣ်ပှၤလၢပဃၢၤ ဒ်ပအဲၣ်လီၤပသးဒၣ်ဝဲအသိးန့ၣ်လီၤ. တၢ်အိၣ်မူအတၢ်ဝံတၢ်ယိး ဃၢဝဲသနာ်က့ ကစၢ်ဟ့ၣ်တ့ၢ်ပှၤ ပတၢ်အိၣ်ဖှိၣ်အဟံၣ်ဖိဃီဖိ ဒ်သိးကမၤဖှံထီၣ် တၢ်ဝံတၢ်ယိးအဂီၢ်လီၤ.
