မၢ်ရံယၤ(Maria)စိာ်ဝဲအမုၢ်ဆါခီတၢ်အီၣ်, တၢ်အီၣ်ညီဆူ စီၢ်နီၤခိၣ်လၢအိၣ်ကလီတဖျၢၣ် အအိၣ်န့ၣ်လီၤ. ဖဲအအီၣ် ကိၣ်ဘၢကၢၢ် (burger)အခါ အမဲာ်ချံလဲၤတုၤဆူ ပှၤသးစၢ်တဂၤ, လၢအအိၣ်ဆ့ၣ်နီၤဝဲလၢ စီၢ်နီၤခိၣ်တဘျုးဖျၢၣ်အယံၤတဂၤန့ၣ်လီၤ. ပှၤတဂၤအံၤ အကူအသိးတဖၣ် ဘၣ်အၢဒီးကပံာ်, အခိၣ်ဆူၣ်လီၤစဲၤအသး, ဒီးအဝဲအစု ဖီၣ်ဃာ် စးခိလီခီတဖျၢၣ်လၢ တၢ်တအိၣ်နီတမံၤလၢအပူၤဘၣ်န့ၣ်လီၤ. ဖျါလၢ ပှၤတဂၤအံၤ တၢ်သၣ်ဝံၤအသးန့ၣ်လီၤ. မ့ၢ်အဝဲမၤစၢၤအီၤ ကသ့ဒ်လဲၣ်. တၢ်ဟ့ၣ်အီၤ ကျိၣ်စ့န့ၣ် တမ့ၢ်ကကြၢးဘၣ်. မ့ၢ်ပှ့ၤန့ၢ်တၢ်အီၣ်ဒီးဟ့ၣ်အီၤန့ၣ်, ကမ့ၢ်တၢ်လီၤမဲာ်ဆှးလၢအဂီၢ်ဧါ.
ဖဲန့ၣ်အခါ မၢ်ရံယၤ သ့ၣ်နီၣ်ထီၣ် နီၢ်ရူၤသးအပူ, ဖဲပှၤကဲဒိၣ်ဟီၣ်ခိၣ်လီၢ်ကစၢ် စီၤဘိၤဧး ကွဲမုာ်ဝဲ မုၢ်ကမဲလၢအဖှီၣ် လၢအဟဲက့ၤနုာ်လီၤအိၣ်ဝဲဆိးဝဲလၢ ကီၢ်အဂၤ ဒ်သိးအကဟဲထၢဖှိၣ် ဘုစဲၤလၢအအိၣ်လီၤတဲာ်တ့ၢ် လၢအစံာ်လီၢ်ပူၤန့ၣ်လီၤ. ရူၤသး ၂:၁၅,၁၆ အပူၤ, အဝဲမၤလိာ်ပာ် အပှၤတဖၣ် ဒ်အံၤ, “ပျဲအကထၢထီၣ်တၢ်လီၤတဲာ်လၢဘုကဒိၣ် အကျါန့ၣ်ဒၣ်လဲာ်, ဒီးဒုၣ်ဒွဲၣ်အီၤတဂ့ၤ. ဒီးမၤပြံပြါ ဘုအစဲၤတနီၤနီၤလၢအဂီၢ်, ဒီးပာ်လီၤတဲာ် ဒ်သိးအကထၢထီၣ်ဝဲ, ဒီးတြီအီၤတဂ့ၤ”. လုၢ်လၢ်ထူသနူၤအိၣ်ဝဲလၢပိာ်မုၣ်တဖၣ် ဘၣ်သန့ၤအသးလၢာ်လၢာ်ဆ့ဆ့ လၢအတၢ်ဘၣ်ထွဲ ဒီးပိာ်ခွါတဖၣ်အလိၤ, ဒီးစီၤဘိၤဧး ဒုးနဲၣ်ဖျါဝဲ ယွၤအတၢ်အဲၣ် အတၢ်လုၢ်အီၣ်လုၢ်အီပှၤန့ၣ်လီၤ. အကတၢၢ်န့ၣ် ရူၤသး ၄:၉-၁၀ ပာ်ဖျါဝဲလၢ စီၤဘိၤဧး ဒိးတ့ဒိးဖျီအသးဒီး နီၢ်ရူၤသး, ဒီးအုၣ်က့ၤခီၣ်က့ၤအီၤလၢ အတၢ်လိၣ်ဘၣ်နီၢ်နီၢ်န့ၣ်လီၤ.
ဖဲ မၢ်ရံယၤ ဂဲၤဆၢထၢၣ်ဟးထီၣ်ဝဲအခါ, အဝဲလဲၤပာ်လီၤ နွဲၣ်တခူဒံၣ်ဆဲးသိ လၢအတအိးထီၣ်ဘၣ်ဒံးတဘိၣ် လၢစီၢ်နီၤခိၣ်လၢ ပှၤတဂၤအဃၢၤတဖျၢၣ်အလိၤ, အဝဲသ့ၣ် အမဲာ်ချံ ကွၢ်လိာ်သး ဖဲအမၤတၢ်အံၤန့ၣ်လီၤ. ပှၤတဂၤအံၤ မ့ၢ်သၣ်ဝံၤအသးဒီး, အဝဲက “ထၢထီၣ်”ဝဲဒၣ် လၢ မၢ်ရံယၤ အ“တၢ်အီၣ်ညီစံာ်ပျီ”အပူၤန့ၣ်လီၤ. ယွၤအသူၣ်အသးန့ၣ် ဘၣ်တၢ်ဒုးနဲၣ်လၢလံာ်စီဆှံအတၢ်တဲပူတဖၣ်အပူၤ, လၢအဒုးထံၣ်ပှၤကျိၤကျဲအသီတဖၣ် လၢတၢ်ဟ့ၣ်ဂံၢ်ဟ့ၣ်ဘါအဂီၢ်န့ၣ်လီၤ.
