လၢအပူၤကွံာ်စှၤနံၣ်အခါ, ပှၤပိာ်ခွါတဂၤ လဲၤတၢ်လၢယမဲာ်ညါ, ကအိၣ်တၢ်သူၣ်ထီၣ်ဖးဒိၣ်တဖျၢၣ်အယံၤန့ၣ်လီၤ. ယထံၣ်ဘၣ် လၢအစုပူၤ ပှဲၤဒီးတၢ်ဘိၣ်တဖၣ်လီၤ. သတူၢ်ကလာ် အခီၣ်ဘၣ်တိၢ်, ဒီးအတၢ်ဖိတၢ်လံၤခဲလၢာ် လီၤတဲာ်ကွံာ်ဝဲလီၤ. ပှၤခံဂၤ ဝံၢ်ဆၢထၢၣ်ထီၣ်က့ၤအီၤ ဒီးထၢဖှိၣ်စၢၤက့ၤ တၢ်လီၤတဲာ်တဖၣ်လီၤ. ဘၣ်ဆၣ် အဝဲသ့ၣ်ထၢထီၣ်တၢ်န့ၣ် တၢ်အိၣ်တ့ၢ်တမံၤ, လၢအမ့ၢ်ပှၤတဂၤအံၤ အကျိၣ်စ့ထၢၣ်လီၤ. ယထၢထီၣ်အီၤ ဒီးဃ့ၢ်သဖှိပိာ် ပှၤစီစၣ် (ပှၤတမှံၤတပျီၤ)တဂၤအံၤအခံ ဒ်သိးယကဟ့ၣ်က့ၤ အတၢ်ဖိတၢ်လံၤ လၢအကါဒိၣ်တမံၤအံၤန့ၣ်လီၤ. ယကိးပသူ “Sir, Sir!”, ဒီးလၢခံကတၢၢ် အဝဲနၢ်ဟူဝဲလီၤ. အဝဲဃၣ်တရံးလီၤဝဲ, ဖဲယလူၤချုးန့ၢ်အီၤအခါန့ၣ်လီၤ. ဖဲယဟ့ၣ်လီၤကျိၣ်စ့ထၢၣ်အခါ, အဝဲကွၢ်ယၤလၢ တၢ်ကမၢကမၣ်အပူၤ အမဲာ်န့ၣ် ဖျါဒ်ပှၤအသးဖှံထီၣ် ဒီးလၢတၢ်စံးဘျုးစံးဖှိၣ်ဘၣ်ယၤ န့ၣ် ယတသးပ့ၤနီၣ် နီတဘျီလၢၤဘၣ်န့ၣ်လီၤ.

တၢ်လၢအစးထီၣ် ဒ်တၢ်လူၤပိာ်ပှၤတဂၤအံၤအခံန့ၣ် ကဲထီၣ်တၢ်လၢအလီၤဆီဒိၣ်မးတမံၤန့ၣ်လီၤ. ဖဲထါစံးထီၣ်ပတြၢၤ ၂၃ လၢ ပညီနုၢ်ဒီးအီၤ အကတၢၢ်တဆၢအပူၤ, တၢ်ကွဲးကျိာ်ထံလၢ ကိၤလၤကျိာ်အါဘ့ၣ်န့ၣ် စူးကါ တၢ်ကတိၤ “လူၤပိာ်” န့ၣ်လီၤ. အဆၢဖိ ၆ ပာ်ဖျါဝဲ “ထဲတၢ်ဂ့ၤဒီး တၢ်ဘျုးတၢ်ဖှိၣ်န့ၣ် ကလူၤပိာ်ယခံတစိၤဒၣ်ယၤ” န့ၣ်လီၤ. တၢ်ကတိၤ “လူၤပိာ်”န့ၣ် ကြၢးဝဲဘၣ်ဝဲလီၤ. ဘၣ်ဆၣ် ဧ့ၤဘြံၤအတၢ်ကတိၤနီၢ်နီၢ် လၢတၢ်စူးကါဃာ်အီၤန့ၣ် ဆူၣ်န့ၢ်အန့ၣ်, အိၣ်ဒီးတၢ်ပာ်လီၤသးဒၣ်လဲာ်လီၤ. အခီပညီမ့ၢ် “လူၤပိာ် မ့တမ့ၢ် လူၤဖီၣ်တၢ်”နီၢ်နီၢ်, ဒ်ဆၣ်ဖိကီၢ်ဖိတဒု လူၤဖီၣ်အတၢ်အီၣ်အသိး (ဆိကမိၣ်ထီၣ် ဒ်ထွံၣ်မံၤလူၤဖီၣ်သိဖိတဖၣ်အသိး)န့ၣ်လီၤ.

ယွၤအတၢ်ဂ့ၤဒီး တၢ်အဲၣ်န့ၣ် တမ့ၢ်တၢ်လၢ လူၤပိာ်ထွဲပခံ လၢတၢ်တပာ်သူၣ်ပာ်သးအပူၤ, တလဲၤတၢ်ချ့ချ့န့ၣ်ဘၣ်. တၢ်မၤအသးနီၢ်နီၢ် မ့ၢ်ဝဲ ပဘၣ်တၢ်လူၤပိာ်ထွဲပှၤ, ဃ့ၢ်လူၤပှၤဒၣ်လဲာ်, လၢတၢ်ပညိၣ်အပူၤန့ၣ်လီၤ. ဒ်တၢ်လူၤပိာ်ပှၤတဂၤဂၤအခံ ဒ်သိးကဟ့ၣ်က့ၤအတိၢ်ထၢၣ်အသိး, ပဘၣ်တၢ်လူၤပိာ်ပှၤ လၢပှၤကွၢ်သိလၢအဂ့ၤတဂၤ လၢအအဲၣ်ပှၤလၢတၢ်အဲၣ်အထူအယိာ်န့ၣ် ပကထံၣ်ဘၣ်လၢ စံး ၂၃:၁,၆ အပူၤန့ၣ်လီၤ.