ဘၣ်တဂီၤ ယဖိအဆံးတဖၣ် ပာ်လီၤအသးလၢ အကပၢၢ်ထီၣ်ဆိဆိ ဒီးမၤအီၣ်မၤအီ ဂီၤတၢ်အီၣ်လၢအဂီၢ်ဒၣ်ဝဲလီၤ. ပလီၤဘှံးလီၤဘှါတ့ၢ် ဒီတနွံညါအဃိ, ယမါဒီးယၤ ပဂုာ်မံတုၤအစှၤကတၢၢ် ဂီၤနွံနၣ်ရံၣ် ဖဲမုၢ်ဘူၣ်နံၤဂီၤခီန့ၣ်လီၤ. သတူၢ်ကလာ် ယနၢ်ဟူ တၢ်သီၣ်ဖးဒိၣ်တမံၤလီၤ. ယစံၣ်ဟးထီၣ်လၢလီၢ်မံ ဒီးဃ့ၢ်သဘျိၣ်ဆူဟံၣ်ဖီလာ်တဆီ, ဒီးထံၣ်ဘၣ်ယဲ လီခီဖျၢၣ်သ့ၣ်ဖးလီၤကလဲသးတဘ့ၣ် ဒီးဘုကၠူၢ်လၢသ့ၣ်ဘၣ်ခိၣ်လိၤ ဒီတကဘျၣ်, ဒီးပဖိခွါ ယိၤနါဖိလၢအသးအိၣ်ယဲၢ်နံၣ်, ဂုာ်ကျဲးစၢးခွဲစီကွံာ် (ဖျါလၢ အဝဲဒွါဘၣ်အၢတၢ်) တၢ်အကပုာ်ဒီး စဲဘူးစဲထီအသးလၢ သ့ၣ်ဘၣ်ခိၣ်န့ၣ်လီၤ. ယဖိတဖၣ်န့ၣ် သၣ်ဝံၤလီၤဘဲဝဲဒၣ် ဘၣ်ဆၣ် တဃုထၢဝဲဒၣ်လၢ ကဃ့တၢ်မၤစၢၤဘၣ်. လၢတၢ်ယူာ်ဃီၤစုလၢ တၢ်သန့ၤသးအပူၤအလီၢ်န့ၣ်, အဝဲသ့ၣ်ဃုထၢတၢ်သဘျ့လီၤ. ဒီးတၢ်အစၢန့ၣ် လ့ၤတက့ၤ တမ့ၢ် တၢ်ဖီအီၣ်တ့ၤအီၣ် လၢအမုာ်အလၤဘၣ်န့ၣ်လီၤ.
လၢပှၤကညီအကျိၤကျဲန့ၣ်, ဖိသၣ်တဖၣ် ကဘၣ်ဒိၣ်ထီၣ်လၢတၢ်သန့ၤ ဆူတၢ်သဘျ့န့ၣ်လီၤ. မ့မ့ၢ်လၢ ပတၢ်ရ့လိာ်ဘၣ်ထွဲဒီးယွၤတခီန့ၣ်, တၢ်ဒိၣ်တုာ်ခိၣ်ပှဲၤ အခီပညီမ့ၢ်ဝဲ တၢ်သုးအသး လၢတၢ်သဘျ့ ဆူတၢ်သန့ၤသး လၢယွၤအလိၤန့ၣ်လီၤ. တၢ်ထုကဖၣ်န့ၣ် မ့ၢ်တၢ်လၢပမၤလိဂဲၤလိ ပတၢ်သန့ၤသးအဂီၢ်လီၤ. ဖဲကစၢ်ယ့ၣ်ရှူးသိၣ်လိအပျဲၢ်အဘီၣ်တဖၣ်, ဃုာ်ဒီး ပဝဲခဲလၢာ်လၢအစူၢ်က့ၤနာ်က့ၤအီၤတဖၣ်, လၢ မး ၆:၁၁ အပူၤ ပကဘၣ်ထုကဖၣ်, “ကိၣ်လၢတနံၤအဂီၢ်န့ၣ် ဟ့ၣ်လီၤလၢ်ပှၤလၢ မုၢ်မဆါတနံၤအံၤတက့ၢ်”, မ့ၢ်ဒၣ်အဝဲသိၣ်လိ တၢ်သန့ၤသး အတၢ်ထုကဖၣ်န့ၣ်လီၤ. အဆၢဖိ ၁၁-၁၃ ပာ်ဖျါဝဲ ကိၣ်မ့ၢ်တၢ်ကတိၤအဒိတမံၤ လၢတၢ်မူတၢ်ဂဲၤ, တၢ်ထူၣ်ဖျဲး, ဒီးတၢ်ပၢဆှၢနဲၣ်ကျဲအဂီၢ်န့ၣ်လီၤ. ပကဘၣ်သန့ၤသးလၢယွၤ လၢတၢ်ခဲလၢာ်အပူၤ ဒီးတၢ်အါမံၤတဖၣ်အဂီၢ်လီၤ.
ပှၤစူၢ်က့ၤနာ်က့ၤတၢ်ဖိလၢ အအိၣ်ကဲထီၣ် အသးဒၣ်ဝဲန့ၣ် တအိၣ်နီတဂၤဘၣ်. ဒီးပကပူၤဖျဲးထီၣ် လၢယွၤအဘျုးအဖှိၣ်န့ၣ် တသ့နီတဘျီဘၣ်. လၢပသးသမူဒီတစိၤ, မ်ပကစးထီၣ်ပမုၢ်နံၤ ထီဘိလၢတၢ်သန့ၤသးအပူၤ, ဒ် မး ၆:၉ ပာ်ဖျါဝဲအသိး ပကဘါထုကဖၣ်တၢ်ဆူ “အိၣ်လၢမူခိၣ်ပပၢ်ဧၢ” အအိၣ်န့ၣ်တက့ၢ် .
