လၢယမဲာ်အတၢ်ထံၣ်န့ၣ်, ခရံာ်အိၣ်ဖျဲၣ်သ့ၣ်တမုၢ်အံၤ ဖျါလီၤဂာ် ဒ်အကဲၤကပျီၤသးလၢမ့ၣ်အူပူၤန့ၣ်လီၤ. တမ့ၢ်လၢတၢ်ကပီၤအယီၤ(အတု) အပျံၤဘိဖိတဖၣ်အဃိဘၣ်, မ့မ့ၢ်လၢ မ့ၣ်အူနီၢ်နီၢ်န့ၣ်လီၤ. ပဟံၣ်ဖိဃီဖိ ဘၣ်တၢ်ကွဲမုာ်ပှၤဆူ တံၤသကိးတဂၤအမူး လၢ “ပှၤကၠၢၢ်မၢၣ်လၢပျၢၤမၤဝဲ” (altdeutsche Tradition), ဖဲအဝဲသ့ၣ်ကတဲာ်ကတီၤဃာ်ဝဲ လုၢ်လၢ်ထူသနူတၢ်အီၣ်ဆၢအဝံၣ်အဘဲတဖၣ် ဒီးသ့ၣ်ဖိတထူၣ်လၢ တၢ်ဒွဲၣ်ဃာ်ပနဲတၢၣ်နီၢ်နီၢ်တဖၣ် လၢအလိၤန့ၣ်လီၤ. (လၢတၢ်ဘံၣ်တၢ်ဘၢအဂီၢ်, သ့ၣ်ထူၣ်လၢတၢ်ကူးတဲာ်ဃာ်အီၤ သံကစဲးန့ၣ်, တၢ်ဒွဲၣ်ကပီၤဃာ်အီၤ ထဲတနၤဧိၤန့ၣ်လီၤ).

ဖဲယကွၢ်ကီ သ့ၣ်ထူၣ်လၢအဖျါဝဲ ဒ်မ့ၣ်အူအီၣ်အီၤအခါ, ယဆိကမိၣ်ထီၣ် စီၤမိၤရှ့အတၢ်သဂၢၢ်ဒီးယွၤ လၢတပှိာ် လၢမ့ၣ်အူပူၤန့ၣ်လီၤ. ဖဲအဝဲကွၢ်သိတဖၣ် လၢပှၢ်မုၢ်ကနၢအခါ, လၢတၢ်ကမၢကမၣ်အပူၤ ထံၣ်ဘၣ်ဝဲ တပှိာ်လၢမ့ၣ်အူလၣ်အကျါ ဘၣ်ဆၣ် တဘၣ်တၢ်အီၣ်ကွံာ်အီၤဘၣ်န့ၣ်လီၤ. ဖဲအဝဲလဲၤသုးဘူးအသးဆူတပှိာ် ဒ်သိးအကလဲၤကွၢ်ထံအီၤအခါ, ယွၤကိးထီၣ်အီၤန့ၣ်လီၤ. တၢ်ကစီၣ်လၢအဟဲလၢ သပှိာ်မ့ၣ်အူအီၣ်အပူၤန့ၣ် တမ့ၢ်တၢ်စံၣ်ညီၣ်အကစီၣ်ဘၣ်, မ့မ့ၢ် မ့ၢ်တၢ်အုၣ်က့ၤခီၣ်က့ၤ အတၢ်ကစီၣ်လၢပှၤအံၣ်စရ့လးဖိတဖၣ်အဂီၢ်လီၤ. ၂ မိၤရှ့ ၃:၈ ပာ်ဖျါဝဲ ယွၤထံၣ်ဘၣ်တ့ၢ် အပှၤဂီၢ်မုၢ်တဖၣ် အတၢ်နးတၢ်ဖှီၣ်လၢကုၢ်အလီၢ် လၢကီၢ်အဲၤကူပတူးအပူၤ ဒီးအဝဲ “ဟဲလီၤဒ်သိး (အ) ကမၤပူၤမၤဖျဲးအီၤ” အဂီၢ်န့ၣ်လီၤ.

ယွၤအုၣ်ခီၣ်က့ၤ ပှၤအံၣ်စရ့လးဖိတဖၣ် လၢပှၤအဲၤကူပတူးဖိတဖၣ်အစုပူၤလံ နာ်သက့, ပှၤဟီၣ်ခိၣ်ဖိခဲလၢာ်အလီၢ်အိၣ်ဒံးဝဲဒၣ် လၢတၢ်ကဘၣ်အုၣ်က့ၤခီၣ်က့ၤအီၤအဂီၢ်, တမ့ၢ်ထဲလၢ နီၢ်ခိအတၢ်နးတၢ်ဖှီၣ်ဘၣ်, မ့ၢ်စ့ၢ်ကီးလၢ တၢ်ဘၣ်တီၢ်ဘၣ်ထံးလၢ အဘၣ်တၢ်ဟဲစိာ်န့ၢ်အီၤဆူ ဟီၣ်ခိၣ်ချၢအံၤ ခီဖျိတၢ်အၢတၢ်သီဒီးတၢ်သံန့ၣ်လီၤ.နံၣ်လၢအကယၤတဖၣ် ပူၤကွံာ်ဝံၤအလီၢ်ခံ, ယိၤ ၁:၉-၁၀ ပာ်ဖျါဝဲ ယွၤဆှၢလီၤန့ၢ် တၢ်ကပီၤ, လၢအမ့ၢ်ယွၤအဖိခွါ ကစၢ်ယ့ၣ်ရှူးဒီး, ယိၤ ၃:၁၇ အပူၤန့ၣ်, ဆှၢလီၤဝဲ တမ့ၢ် ဒ်သိး “အကစံၣ်ညီၣ်ဟီၣ်ခိၣ်ဖိဘၣ်. မ့ၢ်ဒ်သိး ဟီၣ်ခိၣ်ဖိကဘၣ်တၢ်အုၣ်က့ၤခီၣ်က့ၤလၢအီၤလီၤ” .