လၢပှၤလၢအဲၣ်ဒိးဖး လံာ်တၢ်တဲလၢ အခီၣ်ထံးတုၤ အကတၢၢ်တဖၣ်အဂီၢ် တၢ်ဖးဆိလံာ်လၢ အကတၢၢ်တဆၢဒိၣ်လၢညါန့ၣ် မ့ၢ်တၢ်ဆိကမိၣ်အအၢတမံၤလၢအဂီၢ်လီၤ. ဘၣ်ဆၣ် ပှၤတနီၤနီၤ အဝဲသ့ၣ်မ့ၢ်သ့ၣ်ညါဝဲ တၢ်တဲကတၢၢ် ဒ်လဲၣ်မး ဖးဝဲဒီဘ့ၣ်ကဲ ဖးဝဲမုာ်န့ၣ်လီၤ.
ဖဲ “ဖးကဒါက့ၤလၢလီၢ်ခံ” လံာ်အပူၤန့ၣ်, ရံးခၠး(ဒ)ဟ့(စ)(Richard Hays)ဒုးနဲၣ်ဝဲလၢ ပမ့ၢ်ကျဲးစၢးမၤလ့ၤဒ်န့ၣ်ဒီး ကဲဘျုးလၢပဖးလံာ်စီဆှံအဂီၢ် ဒ်သိးပကနၢ်ပၢၢ်အီၤလီၤ. လံာ်စီဆှံအဆၢတဖၣ် အတၢ်ပညိၣ်အိၣ်ဒ်လဲၣ်, တဲဖျါကဒါက့ၤ တၢ်ဂ့ၢ်မနုၤလဲၣ်. လံာ်စီဆှံအဆၢ တဆၢဒီးတဆၢ မၤဖျါလိာ်သးအခီပညီဒ်လဲၣ်န့ၣ် အဝဲတဲဖျါက့ၤဝဲလၢ တၢ်အဒိအတဲာ်လီၤ. သရၣ် ဟ့(စ) အတၢ်ဟ့ၣ်ဒိဟ့ၣ်တဲာ်အံၤ ဟ့ၣ်ပှၤ တၢ်ဂ့ၢ်တၢ်ကျိၤလၢ ပဖးလံာ်စီဆှံန့ၣ် ပဘၣ်ဖးဆူညါ ဒ်န့ၣ်အသိး ဒီးပဘၣ်ဖးကဒါက့ၤ လၢလီၢ်ခံစ့ၢ်ကီးလီၤ.
ဟ့(စ) ဒုးသ့ၣ်နီၣ်ပှၤဖးတၢ်ဖိတဖၣ် လၢယ့ၣ်ရှူးဂဲၤဆၢထၢၣ်သမူထီၣ်က့ၤအလီၢ်ခံမး အပျဲၢ်အဘီၣ်တဖၣ်နၢ်ပၢၢ် ယ့ၣ်ရှူးအတၢ်တဲ လၢကမၤလီၤပှီၢ် ဒီးသူၣ်ထီၣ်က့ၤတၢ်လုၢ်ဟံၣ်လၢ (၃)သီ န့ၣ်လီၤ. စီၤယိၤဟၣ်တဲပှၤ, “အဝဲဒၣ်ကတိၤတၢ်လၢတၢ်လုၢ်ဟံၣ်ဘၣ်ဃးဒီး အနီၢ်ခိအဂ့ၢ်လီၤ”(ယိၤ ၂:၂၁). ထဲန့ၣ်မး အဝဲသ့ၣ်နၢ်ပၢၢ် တၢ်မၤဘူၣ်လဲၤကပာ်အခီပညီ လၢအပူၤကွံာ် တသ့ၣ်ညါဝဲဘၣ်လီၤ (ကွၢ် မး ၂၆:၁၇-၂၉). တၢ်လၢအမၤအသးခဲအံၤအဂ့ၢ်န့ၣ် ပကဘၣ်ကွၢ်ဆိကမိၣ်ဒီး တၢ်ဂ့ၢ်လၢညါလီၤ. လၢပျၢၤ စီၤပၤတဂၤ အိၣ်ဒီးတၢ်သူၣ်ပိၢ်သးဝး ဘၣ်ထွဲဒီးယွၤအဟံၣ်လီၤ (စံး ၆၉:၉, ယိၤ ၂:၁၆-၁၇). တၢ်ဂ့ၢ်အံၤ မ့ၢ်ဆိကမိၣ်ဝဲလၢ ကစၢ်ယ့ၣ်ရှူးအတၢ်မၤလၢပှဲၤတၢ်အဂ့ၢ်မး အခီပညီမနုၤလဲၣ်န့ၣ် အဝဲသ့ၣ်ကနၣ်ပၢၢ်ဝဲလီၤ. ဖဲအဝဲသ့ၣ်ကွၢ် ကစၢ်ယ့ၣ်ရှူးအနီၢ်ကစၢ် လၢအမ့ၢ်ယွၤအတၢ်လုၢ်ဟံၣ် ဒီးဖးကဒါက့ၤ အလံာ်လဲာ်တဖၣ်န့ၣ် အဝဲသ့ၣ် ကနၢ်ပၢၢ်အါထီၣ် အံၣ်စရ့လးအတၢ်ဘါအလုၢ်အလၢ်ဒီး မ့းရှံအၤဘၣ်ထွဲလိာ်သးဒ်လဲၣ်, ဒီးမၤဖျါထီၣ်အခီပညီ ယၢ်ခီယၢ်ခီဒ်လဲၣ်န့ၣ်လီၤ.
ဒီးခဲအံၤ, ထဲဒၣ်လၢပဖးလံာ်စီဆှံဆူညါဒီး ဖးကဒါက့ၤလၢလီၢ်ခံန့ၣ်မး ပကထံၣ် တၢ်လၢပဝဲတဂၤစုာ်စုာ်လိၣ်ဘၣ် ဒီးဆၢန့ၢ်ဘၣ်တဖၣ် အိၣ်လၢကစၢ်ယ့ၣ်ရှူးအပူၤန့ၣ်လီၤ.
