အမဲၣ်ဒၢ်(Amanda)မၤတၢ် ဒ်ပှၤကွၢ်ပှၤဆါ ဟးတပူၤဘၣ်တပူၤ, လၢတၢ်ကွၢ်ပှၤဆါအဟံၣ်တဖၣ် ဒီးညီနုၢ်လဲၤကိး အဖိမုၣ်ဆံတနံၣ်ဖိ နီၢ်ရူၤဘံၢ်လီၤ. နီၢ်ရူၤဘံၢ်(Ruby)န့ၣ် အဝဲညီနုၢ်သံကွၢ် ပှၤအိၣ်ဖဲတၢ်သူၣ်ထီၣ်တဖၣ် လၢ “နမ့ၢ်အိၣ်ဒီး တၢ်သၢမံၤလၢ နကဃုထၢန့ၣ် နကဃုထၢဒ်လဲၣ်”. ဒီးကွဲးနီၣ်ဝဲ အတၢ်စံးဆၢလီၤ. လီၤကမၢကမၣ်လၢ မ့ၢ်အဝဲသ့ၣ် အတၢ်ဆၢန့ၢ်ဘၣ်တဖၣ် မ့ၢ်တၢ်အဆံးဖိတဖၣ် လၢအမ့ၢ် ထိးပှံာ်ဘိ(sausages), ကိၣ်ခၠီးကလဲး, တၢ်နူၢ်ထံလီၤသကၤ(cheese), ဒီးသၣ်ဝံၣ်သိသၣ် (avocados)တဖၣ်န့ၣ်လီၤ. ဒီးရူၤဘံၢ်ဒုးအိၣ်ထီၣ် “လဲၤမၤဘူၣ်ယၤ” (Go Fund Me) တၢ်ရဲၣ်တၢ်ကျဲၤ ဒ်သိးအဝဲကမၤပှဲၤဘၣ် ပှၤအတၢ်ဆၢမုၢ်လၢ်ဖိတဖၣ်လီၤ. ဖဲအဝဲလဲၤဆှၢတၢ်ဟ့ၣ်ဖိတဖၣ်န့ၣ် အဝဲ ဖိးဟုဒံး အဝဲသ့ၣ်န့ၣ်လီၤ. ဒီးစံးဝဲ, “တၢ်အံၤမၤသးဖှံထီၣ် အဝဲသ့ၣ်အနီၢ်ကီၢ်လီၤ”.

ဖဲပဒုးနဲၣ်တၢ်သူၣ်ကညီၤသးကညီၤ ဒီးတၢ်မၤဂ့ၤတၢ် ဒ်ရူၤဘံၢ်အသိးန့ၣ် ပမၤဖျါထီၣ်က့ၤ ယွၤလၢ “သူၣ်ကညီၤသးကညီၤတၢ် ဒီးသူၣ်အိၣ်သးအိၣ်တၢ်… ဒီးအဘျုးအဖှိၣ်ဒိၣ်နီၢ်မးလီၤ” (စံး ၁၄၅:၈). တၢ်န့ၣ်အဃိ စီၤပီလူး မၤဆူၣ်ထီၣ်ပှၤ ဒ်ယွၤအပှၤဂီၢ်မုၢ်အသိး လၢပက“ကူထီၣ်သိးထီၣ် တၢ်သးကညီၤ, တၢ်မၤဂ့ၤတၢ်, တၢ်ဆီၣ်လီၤသး, တၢ်သးစူၤ, တၢ်ဝံသးစူၤသ့ၣ်တဖၣ်”လီၤ (ကလီး ၃:၁၂). မ့ၢ်လၢယွၤဒုးနဲၣ် အတၢ်သးကညီၤဖးဒိၣ် လၢပဖီခိၣ်အဃိ ဒ်အလုၢ်အလၢ်အသိး ပဆၢဟ့ၣ်နီၤ အတၢ်သးကညီၤဆူ ပှၤဂၤတဖၣ်အအိၣ်လီၤ. ဒီးဒ်ပမၤလၢတၢ်တိာ်ပာ်ပသးနီၢ်နီၢ်န့ၣ် ပကူထီၣ်သိးထီၣ်လၢအပူၤလီၤ.

စီၤပီလူးစံးပိာ်ထွဲဝဲ, “တၢ်န့ၣ်တဖၣ်ခဲလၢာ်အဖီခိၣ် ကူထီၣ်သိးထီၣ်တၢ်အဲၣ်တၢ်ကွံ လၢအမ့ၢ်တၢ်လၢတၢ်ပှဲၤအပျံၤ စၢဃာ်တၢ်န့ၣ်တက့ၢ်”(:၁၄). ဒီးအဝဲဒုးသ့ၣ်နီၣ်ထီၣ်ပှၤ ဒ်သိး ပ“ကမၤတၢ်ခဲလၢာ် လၢကစၢ်ယ့ၣ်ရှူးအမံၤ”န့ၣ်လီၤ(:၁၇). ဖဲပသ့ၣ်နီၣ်ထီၣ်လၢ တၢ်အဂ့ၤခဲလၢာ် ဟဲလၢကစၢ်ယွၤအအိၣ်, ဒီးဖဲပသးကညီၤမၤဂ့ၤပှၤဂၤတဖၣ်န့ၣ် ပသးဘၣ်တၢ်မၤဖှံထီၣ်အီၤဆူထးလီၤ.