ညီနုၢ် ယပျံၤမုၢ်ဆၣ်အနံၤတဖၣ်လီၤ. ဖဲယလဲၤဆူ ယတၢ်မၤလၢညါတခါန့ၣ် ယလဲၤဒိးလ့ၣ်မ့ၣ်အူလီၤ. တဘျီဘျီ ယဆ့ၣ်နီၤတစိၢ်ဖိ ဖဲလ့ၣ်မ့ၣ်အူသန့ ဒ်သိးယတလဲၤတုၤဆိဆိတဂ့ၤအဂီၢ်လီၤ. ဖဲယဆိကမိၣ်ထီၣ် တၢ်မၤလၢပကဘၣ်မၤဝံၤအီၤ ဒ်တၢ်သ့ၣ်ဆၢဖးကတီၢ်အသိး ဒီးတဘျီဃီ တၢ်ဘၣ်ရ့လိာ်ဘၣ်ထွဲဒီး တၢ်မၤအခိၣ် လၢအသးဖုၣ်သးချ့ဒိၣ်မးတဂၤအဂ့ၢ်န့ၣ် ယသးဘၣ်ကိၢ်ဘၣ်ဂီၤန့ၣ်လီၤ. လၢပဝဲတနီၤအဂီၢ် လီၤဆီဒၣ်တၢ် ပကဘၣ်စးထီၣ် နွံအခီၣ်ထံးလၢတၢ်သးအုးအံၤ ကမ့ၢ်တၢ်ကီလၢပဂီၢ်လီၤ. လၢပတၢ်မၤအပူၤ ဘၣ်သ့ၣ်သ့ၣ် ပသးကဘၣ်တံာ်တာ် ဒီးတၢ်တတဲဂ့ၤပှၤဘၣ်. စီၤပၤရှလိၤမိၤပာ်ဖျါ တၢ်မၤတၢ် ကိၢ်ကိၢ်ဂီၤဂီၤ ဒီးစံးဝဲ, “အဂ့ၢ်ဒ်အံၤ, ပှၤကညီလၢအမၤတၢ်ခဲလၢာ်အဃိ, ဒီးလၢအသးကိၢ်လၢ တၢ်လၢအမၤဝဲ လၢမုၢ်အဖီလာ်အဃိန့ၣ် မ့ၢ်မနူၤလဲၣ်. အဂ့ၢ်ဒ်အံၤ, အမုၢ်နံၤခဲလၢာ်တဖၣ် မ့ၢ်တၢ်သူၣ်အုးသးအုး ဒီးအတၢ်မၤန့ၣ် မ့ၢ်တၢ်မၤကိၢ်မၤဂီၤ ဒီးအသးတအိၣ်ဘှံးဘၣ်လၢ မုၢ်နၤဒၣ်လဲာ်ဘၣ် (စံၣ်တဲၤတဲ ၂:၂၂-၂၃).

စီၤပၤကူၣ်သ့ တဟ့ၣ်ကူၣ်ပှၤကျိၤကျဲ လၢပကဘၣ်မၤ တၢ်မၤလၢအတၢ်ဆီၣ်တံၢ် ပှၤစှၤ ဒီးကဲဘျုးလၢ ပဂီၢ်အါအါဒ်လဲၣ်န့ၣ်ဘၣ်. မ့မ့ၢ်ဟ့ၣ်ပှၤ တၢ်ဆိကမိၣ်ဒီး လဲလိာ် ပတၢ်ထံၣ်နၢ်ပၢၢ်တဖၣ်န့ၣ်လီၤ. ကွၢ်ဖဲပတၢ်မၤကကီဒၣ်ဝဲ အဝဲဟ့ၣ်ဂံၢ်ဟ့ၣ်ဘါပှၤလၢ “ပကမုာ်လၤတၢ်ဂ့ၤ” ခီဖျိယွၤအတၢ်မၤစၢၤလီၤ(:၂၄). ဘၣ်သ့ၣ်သ့ၣ် တၢ်မၤစၢၤအံၤကဟဲ ဖဲသးစီဆှံကစၢ်အတၢ်မၤစၢၤပှၤ ဒ်သိးပကဒုးနဲၣ် သကဲာ်ပဝးလၢလီၤဂာ်ဒီးခရံာ်လီၤ. မ့တမ့ၢ် ဖဲပနၢ်ဟူဘၣ် ပှၤတဂၤဂၤ လၢအဘၣ်ဆိၣ်ဂ့ၤ ခီဖျိပတၢ်ဖံးတၢ်မၤ မ့တမ့ၢ်, ခီဖျိ ပသ့ၣ်နီၣ်ထီၣ် တၢ်ကူၣ်သ့လၢယွၤဟ့ၣ်ပှၤ ဒ်သိးပကကွၢ်ဆၢၣ်မဲာ် တၢ်မၤသးအကီအခဲတဖၣ်လီၤ. ပတၢ်မၤ မ့ၢ်ကီမ့ၢ်ခဲဘၣ်ဆၣ် ပယွၤလၢအတီဒီးပှၤတဂၤ အိၣ်ဒီးပှၤလီၤ. အတၢ်အိၣ်ဒီးပှၤ ဒီးအစိကမီၤ မၤကပီၤထီၣ် ပမုၢ်နံၤတဖၣ်လၢ အခံးဒီးလီၤသးအုးတဖၣ်လီၤ. ခီဖျိ အတၢ်မၤစၢၤန့ၣ် ပစံးဘျုးအီၤလၢ မုၢ်ဆၣ်အနံၤသ့ဝဲလီၤ.