ဖဲ၁၉၁၆ နံၣ်န့ၣ် နဲလစဲၣ်ဘဲ(Nelson Bell)ဖျိထီၣ်ဝဲ ကသံၣ်တၢ်မၤလိဖဲ အိၣ်ဖျဲၣ်အလီၢ် လၢကီၢ်စဲၣ်ဘကၠံနယၢၤ(Virginia)န့ၣ်လီၤ. တၢ်လၢနံၣ်အံၤအပူၤ အဝဲဒိးတ့ဒိးဖျီအသးဒီးအမါဝံၤ ဃုလါ အတီၢ်ပူၤန့ၣ်လဲၤတုၤဝဲဒၣ်ဆူတရူးကီၢ်န့ၣ်လီၤ. ဖဲအသးအိၣ်ဝဲ (၂၂)နံၣ်န့ၣ် အဝဲဘၣ်မၤဝဲ ကသံၣ်သရၣ် လၢအကွဲးကါကူစါတၢ်ဖဲ တၢ်အဲၣ်ဒီးတၢ်သးကညီၤတၢ်ဆါဟံၣ်န့ၣ်လီၤ. တၢ်ဆါဟံၣ်အံၤ အိၣ်ဝဲဒၣ်ထဲတဖျၢၣ်ဧိၤဒီး ဟီၣ်ကဝီၤန့ၣ် ပှၤအိၣ်ဆိးဝဲ ကအိၣ် ခံကကွဲၢ်ဘျဲၣ်န့ၣ်လီၤ. နဲလစဲၣ် ဃုာ်ဒီးအဟံၣ်ဖိဃီဖိတဖၣ် ကွၢ်ထွဲတၢ်ဆါဟံၣ် အတၢ်ဖံးတၢ်မၤ, ကွဲးကါကူစါပှၤဆါ, စံၣ်တဲၤတဲလီၤတၢ်သးခုကစီၣ် ဆူညါ ၂၄ နံၣ်ဆူ ပှၤတရူးဖိလၢအကထိတဖၣ်အကထိအကျါန့ၣ်လီၤ. အပူၤကွံာ် ပှၤတရူးဖိလၢတနာ်ဝဲ ပှၤထံဂၤကီၢ်ဂၤဖိသ့ၣ်တဖၣ်န့ၣ် ကိးအီၤလၢ ‘ပှၤတခီဘီမုၢ်ပှၤအၢပှၤသီ’, လၢခံနဲလစဲၣ်န့ၣ် အမံၤဟူသၣ်ဖျါလၢ “ဘဲလၢပှၤတရူးဖိတဖၣ်အဲၣ်ဝဲ” န့ၣ်လီၤ. အဖိမုၣ်ရူၤသးန့ၣ်လၢခံဒိးတ့ဒိးဖျီအသးလၢ ပှၤမၤတၢ်သးခုကစီၣ်သရၣ်ဖးဒိၣ် ဘ့လ့ၣ်ကရ့ၣ်ဟၣ်န့ၣ်လီၤ.
နဲလစဲၣ် မ့ၢ်ပှၤစဲၣ်နိးတဂၤလၢ ကွဲးကါကူစါတၢ်ဒီးသိၣ်လိလံာ်စီဆှံသရၣ်တဂၤဘၣ်ဆၣ် တၢ်သ့တၢ်ဘၣ်တဖၣ်န့ၣ် တမ့ၢ်ဆှၢပှၤဆူ ကစၢ်ယ့ၣ်ရှူးခရံာ်အအိၣ်ဘၣ်. ခီဖျိ အတၢ်အိၣ်မူသကဲးပဝာ် ဒီးအိၣ်မူအိၣ်ဂဲၤ ဒ်ကစၢ်ယွၤကလုၢ်ကထါပာ်ဖျါဝဲအသိး အဃိ ခရံာ်တၢ်သးခုကစီၣ်အတၢ်မၤကဲထီၣ်လိၣ်ထီၣ်ဝဲဒၣ်န့ၣ်လီၤ. စီၤတံတူးလၢအမ့ၢ် ပှၤတခီဘီမုၢ်ဖိလၢ ကွၢ်ထွဲခရံာ်တၢ်အိၣ်ဖှိၣ်လၢ ကြ့တ့ၤ(Crete)ဒီး ဒ်အမ့ၢ် ပှၤသးစၢ်ခိၣ်နၢ်တဂၤအသိး စီၤပီလူးသိၣ်သီအီၤလၢ တံတူး ၂:၁၀ အပူၤ “တၢ်အိၣ်မူအိၣ်ဂဲၤ ဒ်ကစၢ်ခရံာ်အသိးန့ၣ် မ့ၢ်တၢ်အကါဒိၣ် ဒ်သိးအကမၤကယၢကယဲတၢ်အုၣ်က့ၤခီၣ်က့ၤပှၤဒီး ယွၤအတၢ်သိၣ်တၢ်သီတၢ်လၢတၢ်ခဲလၢာ်အပူၤ”န့ၣ်လီၤ. အဆၢဖိ ၁၂ ပာ်ဖျါဝဲလၢ တၢ်သးခုကစီၣ်တၢ်မၤအပူၤ ပကအိၣ်မူအိၣ်ဂဲၤလၢ “တၢ်ပာ်ပသးသပှၢ်ပှၢ်(ဒ်ပှၤကီၤအသး)(:၁), အိၣ်ဒီးပသူၣ်တီပသးလိၤ, ဒီးတၢ်ယူးယီၣ်ယွၤ” အပူၤကသ့အဂီၢ် ကစၢ်ယွၤကဆိၣ်ဂ့ၤမၤစၢၤပှၤ ဒီးတမ့ၢ်ဘၣ်လၢ ပဂံၢ်ပဘါအဃိန့ၣ်ဘၣ်.
လၢပခိၣ်ပဃၢၤ ပှၤလၢအတသ့ၣ်ညါ ခရံာ်အတၢ်သးခုကစီၣ်န့ၣ် အိၣ်ဝဲဒၣ်အါမးန့ၣ်လီၤ. ဘၣ်ဆၣ် အဝဲသ့ၣ်န့ၣ်သ့ၣ်ညါပှၤန့ၣ်လီၤ. မ်ကစၢ်ယွၤကမၤစၢၤပှၤ ဒ်သိး ပကပာ်ဖျါဒုးနဲၣ်အကလုၢ်ကထါ လၢတၢ်ထုးန့ၢ်ထုးသးအဂီၢ်န့ၣ်တက့ၢ်.
