ပှၤအခိၣ်တဂၤ သံကွၢ်ယၤ လၢမ့ၢ်ယကလဲၤကတိၤတၢ်ဒီးပိာ်မုၣ်တဂၤ လၢအိၣ်ဒီးမဲာ်ထံမဲာ်နိ လၢပှၤကတိၤဟ့ၣ်ကူၣ်တၢ်အဒၢးပူၤန့ၣ်လီၤ. ကၤရ့ၤ(Karen)န့ၣ် အသးနံၣ်အိၣ်ဝဲ ၄၂ နံၣ် ဒီးဆၢမုၢ်လၢ်ဝဲလၢ
ကဒိးတ့ဒိးဖျီအသးလၢ ပှၤဘၣ်သူၣ်ဘၣ်သးဒီးအီၤ တဂၤန့ၣ်လီၤ. ဘၣ်ဆၣ် ပှၤတဂၤန့ၣ် မ့ၢ်အတၢ်ဖံးတၢ်မၤကစၢ် လၢအအိၣ်ဒီးအဖိအမါန့ၣ်လီၤ.
ကၤရ့ၤန့ၣ် ဘၣ်အိၣ်ဝဲဒၣ်ဒီး ဒီပုၢ်ဝဲၢ်ခွါလၢကတိၤအၢလိာ်လ့အီၤ ဒီးအပၢ်လၢတပာ်ဖျါတၢ်အဲၣ်တၢ်ကွံ လၢအလိၤအဃိ လၢအနီၢ်ဆံးလံၤလံၤ အဝဲသ့ၣ်ညါဝဲလၢ အနီၢ်ခိနီၢ်သး ဘၣ်ဒိဘၣ်ထံးအါလၢ ပိာ်ခွါသ့ၣ်တဖၣ်အဃိန့ၣ်လီၤ. ဖဲအတၢ်စူၢ်တၢ်နာ် ဘၣ်တၢ်မၤသီထီၣ်က့ၤဝံၤအလီၢ်ခံ ကဘၣ်အိၣ်မူအိၣ်ဂဲၤဒ်လဲၣ်န့ၣ်
မၤလိသ့ၣ်ညါဘၣ်ဝဲ, ဘၣ်ဆၣ် အတၢ်ဆၢမိၢ်န့ၢ်သးလီ တၢ်အဲၣ်လၢအဲၣ်ဒိးမၤန့ၢ်ဝဲန့ၣ် အိၣ်တ့ၢ်ဒ်အဖၢမုၢ် ဒီးတဒိးန့ၢ်ဘၣ်ဝဲအဃိ ကဲထီၣ်တၢ်သးဘၣ်ဖှီၣ်လၢအဂီၢ်န့ၣ်လီၤ.
ဖဲယစံးကတိၤသကိးတၢ်ဒီး ကၤရ့ၤဝံၤန့ၣ်ဒီး ပဆုးလီၤပခိၣ်ဒီးပဃ့ဘါထုကဖၣ်တၢ်န့ၣ်လီၤ. ခီဖျိတၢ်ထုကဖၣ်အစိကမီၤအဃိ ကၤရ့ၤတဲဘၣ်ကစၢ်ယွၤ တၢ်လၢအလ့ပစီအီၤတဖၣ် ဒီးအၢၣ်လီၤဝဲလၢ ကမၤကတၢၢ် အတၢ်ရ့လိာ်ဘၣ်ထွဲလိာ်သးဒီး အတၢ်မၤကစၢ်, ဒီးပာ်ထီၣ်ဝဲဒၣ် အနီၢ်ကစၢ်တၢ်မိၢ်န့ၢ်သးလီတၢ်တဖၣ် ဆူကစၢ်ယွၤအစုပူၤန့ၣ်လီၤ. ဖဲအဝဲဟးထီၣ်ဝဲဒၣ်လၢ ဒၢးပူၤအဆၢကတီၢ် ဖျါဝဲဒၣ်လၢ တၢ်သးဖှံအိၣ်ပှဲၤဒီးအီၤန့ၣ်လီၤ.
ဖဲန့ၣ် ယနၢ်ပၢၢ်အါထီၣ် တၢ်ရ့လိာ်မၤဘၣ် ဒီပုၢ်ဝဲၢ်မုၣ်ခွါ လၢတၢ်စူၢ်တၢ်နာ်တမံၤဃီအပူၤ ဖဲစီၤပီလူး ဟ့ၣ်ကူၣ်ဝဲလၢ ၁တံၤ ၅:၁-၂ အပူၤန့ၣ် မ့ၢ်တၢ်လၢအကါဒိၣ်နီၢ်မးန့ၣ်လီၤ. ဟီၣ်ခိၣ် လၢအချ့ဝဲလၢ တၢ်နီၤဖးပဲာ်ဖးကတိၤဒုၣ်ဒွဲၣ်တၢ်အပူၤ ဖဲပကွၢ်ပှၤတဂၤဂၤ ဒ်အမ့ၢ် ပဒူၣ်ဖိထၢဖိအသိးန့ၣ် ကကဲထီၣ်တၢ်မၤစၢၤ
ဒ်သိးပကရ့လိာ်မၤဘၣ်အီၤ လၢတၢ်သးအိၣ်လၢအကြၢးဝဲဘၣ်ဝဲန့ၣ်လီၤ. ဒီပုၢ်ဝဲၢ်မုၣ်ခွါအတၢ်ပာ်သး မ့ၢ်တီဝဲလိၤဝဲ ဒီးဂ့ၤဝဲဒၣ်န့ၣ် ပတမၤကီခဲလိာ်သး, မၤဟးဂီၤလိာ်သးလၢတဂၤဒီးတဂၤ အဘၢၣ်စၢၤဘၣ်န့ၣ်လီၤ.
ကၤရ့ၤန့ၣ် ဘၣ်ကွၢ်ဆၢၣ်မဲာ် ရ့လိာ်ဝဲဒၣ်ထဲလၢ ပိာ်ခွါတဖၣ်လၢအတပာ်လုၢ်ပာ်ပှ့ၤအီၤ, မၤတရီတပါအီၤ ဒီးတကနၢ်ဃုာ်အီၤတဖၣ်န့ၣ်အဃိ လိၣ်ဘၣ်ဝဲ ဒီပုၢ်ဝဲၢ်ပိာ်ခွါ လၢအကကတိၤသကိးတၢ် ဒ်အဒ့မုၣ်အသိးန့ၣ်လီၤ. တၢ်သးခုကစီၣ်အတၢ်ဃံတၢ်လၤ မ့ၢ်ဝဲ တၢ်ကတဲာ်ကတီၤန့ၢ်ပှၤ ဒီပုၢ်ဝဲၢ်မုၣ်ခွါအသီသ့ၣ်တဖၣ် ဒ်သိးကမၤစၢၤဘှါရှဲသကိး တၢ်ဂ့ၢ်ကီ လၢပသးသမူအပူၤန့ၣ်လီၤ.
