“WALK ON” မ့ၢ်လံာ်တၢ်ကွဲးဂ့ၤလီၤဆီ ဒီးဘၣ်တၢ်ဒုးအိၣ်ထီၣ်လၢဘဲၣ် မဲၣ်ကိၣ်စၢၣ် (Ben Malcolmson) အနီၢ်ကစၢ်အတၢ်ကွဲးနီၣ်န့ၣ်လီၤ. အဝဲမ့ၢ်ကၠိဖိတဂၤ လၢအတၢ်လဲၤခီဖျိလိာ်ကွဲ အမဲရကၤဖျၢၣ်ထူ တအိၣ်ဘၣ်ဆၣ် ပှၤဃုထၢအီၤ ဒ်အမ့ၢ် ပှၤလိာ်ကွဲ မၤပှဲၤတၢ်ဖိတဂၤ လၢ ၂၀၀၇ နံၣ် ကီၢ်စဲၣ်ကဲၣ်လံဖိနယၤကလံၤထံး ဖၠၣ်စိမိၤ ရိး(စ)ဘိ အဖၠဲးကတၢၢ်(Rose Bowl champion)ဖျၢၣ်ထူကရၢန့ၣ်လီၤ. ဒ်အမ့ၢ် ပှၤလၢအကွဲးလံာ်တၢ်ကစီၣ် အလံာ်ပရၢလၢတနံၤအဂီၢ်တနံၤအဂီၢ်အသိး, အဝဲ ပာ်လီၤအသးလၢ ကကွဲးပာ်ဖျါထီၣ် ပှၤလိာ်ကွဲတၢ်ဖိတဖၣ် အတၢ်ဂုာ်ကျဲးစၢး မၤလိဖျၢၣ်ထူလၢ အနီၢ်ကစၢ် အတၢ်လဲၤခီဖျိအသိးအဃိ ဒီးမၤန့ၢ်ဝဲ တၢ်လီၢ်လၢ ပှၤလိာ်ကွဲတၢ်ဖိ တဖၣ်အကျါ တလီၢ်န့ၣ်လီၤ.

ဖဲမဲၣ်ကိၣ်စၢၣ်နုာ်လီၤလိာ်ကွဲ မၤသကိးတၢ်လၢဖျၢၣ်ထူကရၢန့ၣ် အတၢ်စူၢ်တၢ်နာ် မၢဆူၣ်အီၤ လၢကဃုထံၣ်န့ၢ် ကစၢ်ယွၤအတၢ်တိာ်လၢအဂီၢ် ဒ်မၤန့ၢ်ဝဲ တၢ်ခွဲးတၢ်ယာ်လၢအဆၢန့ၢ်ဝဲဘၣ်န့ၣ်လီၤ. မ့ၢ်လၢ အတံၤသကိးပှၤလိာ်ကွဲတၢ်ဖိအဂၤတဖၣ်န့ၣ် လၢတၢ်စံးကတိၤသကိး တၢ်စူၢ်တၢ်နာ်အဂ့ၢ် တၢ်လီၤဆီတအိၣ်အဃိ အဝဲအတၢ်သူၣ်ဆူၣ်သးဂဲၤ ဆံးလီၤစှၤလီၤဝဲဒၣ်န့ၣ်လီၤ. ဖဲအဝဲဃ့ဘါထုကဖၣ် တၢ်လၢကစၢ်ယွၤကဒုးနဲၣ်ကျဲအဂီၢ်အခါန့ၣ် မဲၣ်ကိၣ်စၢၣ်ဖးဘၣ်ဝဲ ကစၢ်ယွၤကလုၢ်ကထါ အိၣ်ပှဲၤဒီး အစိကမီၤတထံၣ်န့ၣ် ဖျါဝဲဒၣ် ဖဲလံာ်ဝံယရှါယၤ ၅၅:၁၁ အပူၤ ကစၢ်ယွၤစံးဝဲ “ယတၢ်ကတိၤလၢ အဟဲထီၣ်လၢ ယထးခိၣ်… မ့ၢ်အကမၤထီၣ်တၢ်လၢအဘၣ်ယသးဒီး ကဒုးကဲထီၣ်တၢ်လၢယမၢ အမၤတၢ်န့ၣ်လီၤ”. ကစၢ်ယွၤကလုၢ်ကထါ လၢလံာ်ဝံယရှါယၤအံၤ ထိၣ်ဟူးထိၣ်ဂဲၤဘၣ်အသးအဃိ, အဝဲဟ့ၣ်နီၤလီၤဝဲလံာ်စီဆှံဂၤဘ့ၣ်ဂၤဘ့ၣ်ဆူ ပှၤလိာ်ကွဲသကိးတၢ်တဖၣ်အအိၣ်န့ၣ်လီၤ. တဘျီအံၤစ့ၢ်ကီး ပှၤတကနၢ်ဃုာ်အီၤဘၣ်. ဘၣ်ဆၣ် အါနံၣ်အါလါ လဲၤပူၤကွံာ်ဝဲဒီးအဝဲသ့ၣ်ညါဝဲလၢ အသကိးပှၤလိာ်ကွဲတၢ်ဖိတဂၤ ဖးဘၣ်ဝဲ လံာ်စီဆှံလၢဟ့ၣ်ဝဲဒၣ်န့ၣ်လီၤ. တချုးအသကိးသံန့ၣ် ဘၣ်သးသ့ၣ်ညါအါထီၣ်ကစၢ်ယွၤအဂ့ၢ်လၢ အဖးဘၣ်ဝဲဒၣ်လၢ လံာ်စီဆှံအပူၤန့ၣ်လီၤ.

တၢ်မၤအသးအံၤလၢ ပဝဲအါဂၤ ပစံးကတိၤနီၤလီၤ ရၤလီၤ ကစၢ်ယ့ၣ်ရှူးအဂ့ၢ် ဆူ ပတံၤကိးဒီးပဒူၣ်ဖိထၢဖိအကျါဘၣ်ဆၣ် တၢ်လီၤဆီတအိၣ် မ့တမ့ၢ်ဘၣ်ဒီး တၢ်တကနၢ်ဘၣ် ပှၤတဘျီဃီန့ၣ်လီၤ. ပတထံၣ်ဘၣ် တၢ်မၤအသးအစဲ တဘျီဃီ သနာ်က့ ကစၢ်ယွၤကလုၢ်ကထါန့ၣ် အိၣ်ပှဲၤဒီး အစိကမီၤအဃိ ဒီးကမၤလၢပှဲၤ ကစၢ်ယွၤအတၢ်တိၢ် အကတီၢ်ဒီး အကတီၢ်ဒၣ်ဝဲန့ၣ်လီၤ.