ကလီး(Claud)မ့ၢ် ပှၤလၢဘၣ်တၢ်လုၢ်ဒိၣ်ထီၣ်အီၤ လၢဟံၣ်ဒူၣ်ဃီထၢ လၢမၤသဘံၣ်ဘုၣ်တၢ်အကျါအဃိ အဝဲစးထီၣ်ဆါဝဲ ကသံၣ်မူၤဘှီးညါဖီ (marijuana) ဖဲအသးအိၣ် (၁၅)နံၣ်, ဒီးဟံရိအ့(heroin) ဖဲအသးအိၣ် (၂၅)နံၣ်န့ၣ်လီၤ. လၢအတၢ်ဆါတၢ်ပှ့ၤကသံၣ်မူၤဘှီးတဖၣ်အဂီၢ် လိၣ်ဘၣ်ဝဲ တၢ်ဒီသဒၢအဃိ အဝဲကဲထီၣ် ပှၤသးစၢ်တဖၣ်အခိၣ်လၢ ကဒုးနဲၣ်တၢ်အဂီၢ်န့ၣ်လီၤ. တယံာ်ဘၣ်ခီဖျိလၢ အမဲန့ၤကၠၣ်(manager)တဂၤ လၢအစူၢ်က့ၤနာ်က့ၤ ကစၢ်ယ့ၣ်ရှူးတဂၤအဃိ ကလီးန့ၣ် အဲၣ်ဒိးသ့ၣ်ညါအါထီၣ် ကစၢ်ယ့ၣ်ရှူးအဂ့ၢ်န့ၣ်လီၤ. ဖဲအဝဲဃုမၤလိတၢ်သိၣ်လိဘၣ်ဃးဒီး ခရံာ်ဖိအတၢ်စူၢ်တၢ်နာ် အတီၤတဖၣ်ဝံၤန့ၣ် ကလီးန့ၣ် တၤတၢ်ဒီးကစၢ်ယ့ၣ်ရှူး ဒ်သိးကဟဲနုာ်ဆူအသးပူၤ, အတၢ်အိၣ်မူပူၤန့ၣ်လီၤ. အဝဲစံးဝဲလၢ “ယပလၢၢ်ဘၣ် တၢ်တူၢ်လိာ်မုာ်လၢ ကစၢ်ယ့ၣ်ရှူးခရံာ် အိၣ်ဆိးလၢယသးပူၤ”န့ၣ်လီၤ. ပှၤထံၣ် ယတၢ်အိၣ်မူဆီတလဲအသး တဘျီဃီအဃိ ဒီးလၢဟီၣ်ခိၣ်ချၢအံၤ ယမ့ၢ်ပှၤလၢ အဆါကသံၣ်မူၤဘှီးလၢ အပှဲၤဒီးတၢ်သူၣ်ခုသးခုဒိၣ်ဒိၣ်ကလဲာ် န့ၣ်လီၤ.
ကစၢ်ယ့ၣ်ရှူးအတၢ်မၤလၢအဂီၢ်န့ၣ် တအိၣ်ပတုာ်ဝဲဒၣ် ဖဲန့ၣ်ဘၣ်. လၢခံတသီ ကလီး ဝံစိာ်ထီၣ်ဝဲ ကိးက့(cocaine)အဘိၣ် ဒ်သိးကလဲၤဆါဝဲအဂီၢ်အခါန့ၣ် ဆိကမိၣ်လီၤက့ၤအသးဒီး စံးဝဲ အတၢ်မၤအံၤတဂ့ၤဘၣ်. ယမ့ၢ်ပှၤလၢ အဟ့ၣ်တၢ်စုာ် (ကသံၣ်ဘုၣ်)ဆူ ပှၤဂၤအိၣ်န့ၣ်လီၤ. အဝဲသ့ၣ်ညါနၢ်ပၢၢ်ဝဲဒၣ် ဒီးဆိကတီၢ် အတၢ်ဆါတၢ်ပှ့ၤကသံၣ်မူၤဘှီး ဒီးဃုမၤ တၢ်ဖံးတၢ်မၤအဂၤန့ၣ်လီၤ. ခီဖျိ သးစီဆှံကစၢ်အတၢ်မၤစၢၤအဃိ အဝဲမၤပံာ်ဝဲ အကွဲၤဒီနၢ် ဒီးတက့ၤကဒါက့ၤဆူ အတၢ်အိၣ်မူလီၢ်လံၤလၢၤဘၣ်န့ၣ်လီၤ.
တၢ်ဆီတလဲသး ဒ်သိးအံၤန့ၣ် မ့ၢ်တၢ်လၢစီၤပီလူးကွဲးပာ်ဖျါဝဲဒၣ်ဆူ အ့းဖ့းစူးတၢ်အိၣ်ဖှိၣ်ဖိသ့ၣ်တဖၣ် အအိၣ်န့ၣ်လီၤ. စီၤပီလူးဟ့ၣ်ပလီၢ်ဝဲ အ့းဖ့းစူးတၢ်အိၣ်ဖှိၣ်ဖိတဖၣ် အသုတအိၣ်လီၤဖးလိာ်သးဒီး ကစၢ်ယွၤတဂ့ၤန့ၣ်, ဒီးအဝဲဟ့ၣ်ဂံၢ်ဟ့ၣ်ဘါဝဲ လၢ အ့ဖ့း ၄:၂၂,၂၄ အပူၤ “ဒ်သိး သုကဘ့ၣ်လီၤကွံာ်, သုနီၢ်လီၢ်လံၤ ဘၣ်ဃးဒီးသုတၢ်မၤလၢပျၢၤ လၢအအုၣ်သံဝဲ ဒ်တၢ်လီတၢ်ဝ့ၤ အတၢ်သးကွံအသိးန့ၣ်, … ဒီးကူထီၣ်သိးထီၣ် သုနီၢ်သီ – တ့အသးလၢ တၢ်လီၤဂာ်ယွၤအသိး, လၢတၢ်တီတၢ်လိၤ, ဒီးတၢ်စီဆှံနီၢ်နီၢ်အပူၤလီၤ”န့ၣ်လီၤ. တၢ်ကွဲးအက့ၢ်အဂီၤ လၢစီၤပီလူးစူးကါဝဲဒၣ်န့ၣ် ပကဘၣ်ကူသိးထီၣ်နီၢ်သီ ဒ်ဘၣ်တၢ်တ့အသး လၢအလီၤဂာ်ဒီးကစၢ်ယွၤန့ၣ်လီၤ.
