ဖဲယဖိမုၣ်ဒိးန့ၢ်ဘၣ် ဆွဲၣ်မိၢ်ဖါဖိတစူၣ် ဒ်သိးကဘူၣ်ကွၢ်ကီအဂီၢ်အခါန့ၣ်, အဝဲမၤပှဲၤထီၣ်ထံဒၢမဲၥ်ထံကလၤလၢမဲး ဒ်သိးဆွဲၣ်သ့ၣ်တဖၣ်ကစွါထီၣ် ဒီးခူၣ်အဝံသ့ၣ်တဖၣ် ကသ့အဂီၢ်န့ၣ်လီၤ. အဝဲထၢနုၥ်န့ၢ်ဝဲထံ, တၢ်အီၣ်အစီ (protein) ဒီးတၢ်ဒိးတၢ်လၣ်အက့အခီသ့ၣ်တဖၣ် ဒ်သိးဆွဲၣ်တဖၣ် ကအီၣ်ဝဲအဂီၢ်လီၤ. ပကွၢ်ဒီး ဖျါလၢဆွဲၣ်သ့ၣ်တဖၣ် သးဖှံဝဲအဃိ ဘၣ်တနံၤ ဖဲလၢပတထံၣ်လၢၤဘၣ် အဝဲသ့ၣ်န့ၣ် ပဖုးဘၣ်ပသးလီၤ. ပလူၤဃုကွၢ်အဝဲသ့ၣ်လၢ တၢ်လီၢ်ကိးပူၤဒဲးလီၤ. လၢခံကတၢၢ်ပသ့ၣ်ညါလၢ
အဝဲသ့ၣ်ကအိၣ်ဝဲဖဲ မဲးသ့ၣ်တဖၣ်အဖီလၥ်သ့ၣ်သ့ၣ်လီၤ. ဒီးကအိၣ်ဖဲန့ၣ် ခံလါဃၣ်ဃၣ် လၢအဝဲသ့ၣ်ကသဘျုးလီၤ အဖံးအကုအဂီၢ်န့ၣ်လီၤ.

ခံလါလၢၥ်လံ. ဒီးလၢခံတလါစ့ၢ်ကီးလဲၤပူၤလံ. ယဘၣ်ယိၣ်လၢမ့ၢ်အဝဲသ့ၣ်သံလံဧါန့ၣ်လီၤ.ပဘၣ်ခိးတၢ်ဆၢကတီၢ်ယံၥ်ထီၣ်ဒီး ပသးတစူၤလၢၤဘၣ်. အကတၢၢ် ပထံၣ်ဘၣ်တၢ်ပနီၣ်လၢ အဝဲသ့ၣ်အိၣ်မူဒံးဒီး အဝဲသ့ၣ်ဟဲဖျါထီၣ်လၢ မဲးတဖၣ်အကျါန့ၣ်လီၤ.

ယဆိကမိၣ်ကွၢ်လၢ ပှၤအံၣ်စရ့လးဖိတဖၣ် ဖဲအဘၣ်တၢ်က့ၤစိာ်မၢကဲကုၢ်လၢ ဘၤဘူၤလိၣ် အဆၢကတီၢ်, မ့ၢ်ကအိၣ်ဒီးတၢ်သးဒ့ဒီလၢ ယွၤအတၢ်တဲဆိပာ်စၢၤ ခီဖျိ ဝံတဖၣ်န့ၣ် ဘၣ်ကလၢပှဲၤဧါန့ၣ်လီၤ. မ့ၢ်အဝဲသ့ၣ်အသးဟးဂီၤဧါ. မ့ၢ်အဝဲသ့ၣ်အသးကိၢ်လၢ အဝဲသ့ၣ်ကဘၣ်အိၣ်ဖဲန့ၣ်လီၤစိၤလီၤထီဧါ. ယံး ၂၉:၁၀ အပူၤ ခီဖျိလၢဝံယံးရမံယၤန့ၣ် ကစၢ်ယွၤစံးဝဲဒၣ် “အဂ့ၢ်ဒ်အံၤ, ယွၤစံးဝဲဒၣ်အနံၣ်နွံဆံပှဲၤထီၣ်လၢဘၤဘူၤလိၣ်အပူၤအလီၢ်ခံန့ၣ် ယကအိၣ်သကိးသု, ဒီးမၤလၢထီၣ်ပှဲၤထီၣ် ယတၢ်ကတိၤဂ့ၤ လၢသုဂီၢ်, ဒီးမၢသုဟဲက့ၤကဒါက့ၤဆူ တၢ်အလီၢ်အံၤလီၤ”န့ၣ်လီၤ. မ့ၢ်ဝဲတီဝဲသပှၢ်ကတၢၢ်လီၤ. အနံၣ်နွံဆံပှဲၤထီၣ်ဝံၤအလီၢ်ခံ, ယွၤထိၣ်ဂဲၤ ပၤရၣ်အစီၤပၤကိရ့ၣ်အသး ဒ်သိးကပျဲက့ၤပှၤအံၣ်စရ့လးဖိသ့ၣ်တဖၣ် ဆူဝ့ၢ်ယရူၤရှလ့ၣ် ဒီးသူၣ်ထီၣ်ဘှီထီၣ်က့ၤဝဲဒၣ် ယွၤအတၢ်လုၢ်ဟံၣ်န့ၣ် ပကထံၣ်ဘၣ်ဖဲ ဧ့ၤစြၤ ၁:၁-၄ အပူၤန့ၣ်လီၤ.

ဖဲပဘၣ်အိၣ်ခိးကွၢ်လၢ်တၢ်အဆၢကတီၢ်ဒီး ဖျါလၢတၢ်ကဲထီၣ်လိၣ်ထီၣ် တအိၣ်ဘၣ်နီတမံၤအခါဒၣ်လဲၥ်, ကစၢ်ယွၤ တသးပ့ၤနီၣ်ပှၤဘၣ်. ဖဲလၢယွၤအသးစီဆှံ မၤစၢၤပှၤ ဒ်သိးပတၢ်သူၣ်စူၤသးစူၤကအါထီၣ်အခါန့ၣ်, ပသ့ၣ်ညါလၢယွၤမ့ၢ် ကစၢ်လၢအဟ့ၣ်ပှၤတၢ်မုၢ်လၢ်, ကစၢ်လၢအတီဒီးအတၢ်အၢၣ်လီၤအီလီၤ, ဒီးကစၢ်လၢအပၢပၢၤတၢ်လၢ အကဟဲကဲထီၣ်အသး ခါဆူညါခဲလၢာ်န့ၣ်လီၤ.