ပှၤခိးတၢ်ဘံၣ်တၢ်ဘၢလၢ တၢ်ဆါဟံၣ်တဖျၢၣ်တဂၤနၢ်ဟူဘၣ် ဖိသၣ်ဟီၣ်အကလုၢ်အဃိ, ကွၢ်ဃုဝဲဒၣ်, ဒီးထံၣ်ဘၣ်ဝဲ ဖိသၣ်ပိၥ်ခွါဖိတဂၤလၢ အအိၣ်ဖျဲၣ်ထီၣ်သီ, တပှဲၤဒံးဘၣ်တသီဖိတဂၤ, လၢအဘၣ်တၢ်ဘိၣ်ဘံတ့ၢ်ဃး လၢထၢၣ်တဖျၢၣ်ဒီး ဘၣ်တၢ်စူးကွံၥ်အီၤ ဖဲပှၤပၥ်ကတီၢ်သိလ့ၣ်သ့ၣ်တဖၣ်အလီၢ်လီၤ. အဃိစးထီၣ်လၢပှၤထံၣ်န့ၢ်အီၤဝံၤ တနံၣ်ဘျဲၣ်ဘျဲၣ်အတီၢ်ပူၤန့ၣ် ပှၤကိးဒၣ်အီၤလၢ ဖိသၣ်ပိၥ်ခွါဖိ (Baby Boy) န့ၣ်လီၤ.
ပှၤဃုထံၣ်န့ၢ်ဖိသၣ်ဖိတဂၤအံၤဝံၤ တယံၥ်ဘၣ်န့ၣ်, ပှၤဂ့ၢ်ဝီတၢ်မၤလီၢ်တဖၣ် ဆဲးကျိးဝဲဒၣ်ပှၤလၢ အအဲၣ်ဒိးလုၢ်ဖိ ဖိသၣ်သ့ၣ်တဖၣ်အအိၣ်န့ၣ်လီၤ. နီၢ်ဒီမိၤဝၤခံဂၤ ဟဲဟံးန့ၢ်ဖိသၣ်တဂၤအံၤ ဒီးကိးဝဲလၢ ကရ့စၢၣ် (Grayson) (တမ့ၢ်အမံၤနီၢ်ကီၢ်ဘၣ်)န့ၣ်လီၤ. လၢခံကတၢၢ် ဖဲတၢ်ပတံထီၣ်တၢ်လုၢ်ဖိ ဖိသၣ်အတၢ်ဖံးတၢ်မၤ ဒ်တၢ်သိၣ်တၢ်သီအိၣ်ဝဲအသိး ဝံၤဝဲအလီၢ်ခံ, ဖိသၣ်ဖိအမံၤလၢအမ့ၢ် ကရ့စၢၣ်အံၤ ဘၣ်တၢ်ပၥ်ဂၢၢ်ပၥ်ကျၢၤအီၤန့ၣ်လီၤ. တနံၤအံၤ, နကထံၣ်ဘၣ်ဖိသၣ်ဖိအံၤ လၢအကတိၤတၢ်ဒီးနၤ လၢတၢ်သးခုသးမုၥ်အပူၤ, လၢအကတိၤတၢ်တပံၥ်တကျါကဲၣ်ဆိးဒံးဘၣ်လီၤ. တမ့ၢ်နကဆိကမိၣ်လၢ အဝဲမ့ၢ် ဖိတဂၤလၢတဘျီဘၣ် တၢ်စူးကွံၥ်အီၤဒီးထံၣ်န့ၢ်အီၤလၢ ထၢၣ်တဖျၢၣ်အပူၤဘၣ်န့ၣ်လီၤ.
ဖဲစီၤမိၤရှ့အသးပှၢ်ထီၣ်အဆၢကတီၢ်န့ၣ်, အဝဲကွၢ်ထံဆိကမိၣ်က့ၤဝဲ ယွၤအသူးအသ့ၣ်စိကမီၤတဖၣ် ဒီးတၢ်လၢအဝဲမၤတ့ၢ်ဝဲလၢ ပှၤအံၣ်စရ့လးဖိသ့ၣ်တဖၣ်အဂီၢ်လီၤ. ၅ မိၤရှ့ ၁၀:၁၅ အပူၤ အဝဲဒုးသ့ၣ်ညါ ပှၤအံၣ်စရ့လးဖိသ့ၣ်တဖၣ်လၢ “ထဲတၢ်ဘၣ်ယွၤအသးလၢအကအဲၣ်နပၢ်တဖၣ်”န့ၣ်လီၤ. ဒီးယွၤအတၢ်အဲၣ်အံၤအိၣ်ဒီး အတကွီၣ်လၢအလဲၢ်ဒိၣ်မး ဒီးတုၤဃီၤဝဲဒၣ်လဲၥ်ဆူပှၤဖိၣ်ဃဲ, မုၢ်ကမဲဒီးပှၤတခီဘီမုၢ်ဖိသ့ၣ်တဖၣ်န့ၣ် ပကထံၣ်ဘၣ်ဖဲ ၅ မိၤ ၁၀:၁၈ အပူၤန့ၣ်လီၤ. ၅ မိၤ ၁၉:၂၁ အပူၤ စီၤမိၤရှ့စံးဘၣ် ပှၤအံၣ်စရ့လးဖိသ့ၣ်တဖၣ်လၢ, “အဝဲဒၣ်န့ၣ် မ့ၢ်နတၢ်စံးထီၣ်ပတြၢၤအလီၢ်, ဒီးအဝဲဒၣ်န့ၣ် မ့ၢ်နကစၢ်”န့ၣ်လီၤ.
ပကဲထီၣ်ယွၤအဖိ ခီဖျိပဘၣ်တၢ်လုၢ်ဖိပှၤမ့ၢ်ဂ့ၤ, ခီဖျိလၢအတၢ်အဲၣ်ဒီးတၢ်ဖံးတၢ်မၤအဃိမ့ၢ်ဂ့ၤ, ပဝဲကိးဂၤ ဘၣ်တၢ်ကိးပှၤ ဒ်သိးပကပၥ်ဖျါကပီၤဆၢက့ၤ ယွၤအတၢ်အဲၣ်န့ၣ်လီၤ. ခီဖျိလၢအလုၢ်ဖိက့ၤကရ့စၢၣ်အဃိ, နီၢ်ဒီမိၤဝၤခံဂၤကဲထီၣ်ဝဲဒၣ် ယွၤအစုဒီးအခီၣ်လၢဘၣ်တၢ်စူးကါအီၤလၢ ကယူၥ်ထီၣ်အတၢ်အဲၣ်ဆူပှၤတဂၤဂၤ လၢဘၣ်သ့ၣ်သ့ၣ် ပှၤတပၥ်သူၣ်ပၥ်သးအီၤ မ့တမ့ၢ် မတၤမးတအဲၣ်ဒိးအီၤတဂၤဂၤအဂီၢ်န့ၣ်လီၤ. ပဝဲစ့ၢ်ကီး ပဒိးသူလီၤပသး ဒ်သိးပကကဲထီၣ်ယွၤအစုဒီးအခီၣ်သ့ဝဲန့ၣ်လီၤ.
