၁၉၇၂ နံၣ်အပူၤ တၢ်ဒုးအိၣ်ထီၣ် တၢ်ဃုမၤလိတၢ်တမံၤ ဒီးဘၣ်တၢ်သ့ၣ်ညါအီၤ လၢ “ကိၣ်မးရှမဲလိ(Marshmallow) တၢ်မၤကွၢ်” လၢအမ့ၢ် တၢ်ထိၣ်တဲၥ်မၤကွၢ်ဖိသၣ်တဖၣ် အတၢ်ကီၤသူၣ်ကီၤသးန့ၣ်လီၤ. ဖိသၣ်တဖၣ် ဘၣ်တၢ်ဟ့ၣ်အီၤတဂၤန့ၣ် ကိၣ်တလိၣ်စုၥ်စုၥ် လၢကအီၣ်အဂီၢ်, ဘၣ်ဆၣ်ဒီးပှၤတဲအီၤလၢ မ့ၢ်တအီၣ်ဝဲတဘျီဃီဒီးမ့ၢ်ခိးဝဲ ဆူမဲၥ်ညါအမံးနံးတဆံန့ၣ်ဒီး ပှၤကဟ့ၣ်အါထီၣ်အီၤကိၣ်လၢခံတလိၣ်န့ၣ်လီၤ. ဖိသၣ်သၢပူတပူကီၤအသးန့ၢ်ဝဲ ဒ်သိးကဒိးန့ၢ်အါထီၣ်ကိၣ်အဂီၢ်န့ၣ်လီၤ.(ဖိသၣ်အဂၤသၢပူတပူခိးဝဲတကဲဘၣ်ဒီး အီၣ်ကွံၥ်ဝဲလၢသၢဆံစဲးကီးအတီၢ်ပူၤန့ၣ်လီၤ).”
ဘၣ်သ့ၣ်သ့ၣ် ပဝဲစ့ၢ်ကီး ပကဘၣ်ဂဲၤလိၥ်ကီၤသူၣ်ကီၤသး ဖဲပှၤဟ့ၣ်ပှၤတၢ်တမံၤမံၤလၢ ပသးလီအီၤ အဆၢကတီၢ်ဒီး ပမ့ၢ်သ့ၣ်ညါစ့ၢ်ကီးလၢ ပမ့ၢ်အိၣ်ခိးတၢ်လၢပကမၤန့ၢ်အီၤ ခါဆူညါန့ၣ် ဂ့ၤဒိၣ်ဝဲဒၣ်လဲၣ်န့ၣ်လီၤ. လံာ် ၂ ပ့းတရူး ၁:၅-၆ အပူၤ စီၤပ့းတရူးဟ့ၣ်သဆၣ်ထီၣ်ပခံလၢ ပကပာ်ဖှိၣ်အါထီၣ် တၢ်ဂ့ၤတၢ်ဝါအါမံၤ ဃုာ်ဒီး ပတၢ်ကီၤသူၣ်ကီၤသး လၢပတၢ်စူၢ်တၢ်နာ်အပူၤန့ၣ်လီၤ. ဖဲလၢပအိၣ်ဒီးတၢ်နၥ်လၢခရံၥ်အပူၤဝံၤဒီး လၢ ၂ ပ့း ၁:၅-၈ အပူၤ စီၤပ့းတရူးဟ့ၣ်ဂံၢ်ဟ့ၣ်ဘါ ပှၤဖးလံၥ်ဖိတဖၣ် ဒီးပဝဲနၤယၤ လၢပကဒိၣ်ထီၣ်ဆူညါလၢတၢ်ဂ့ၤတၢ်ဝါ, တၢ်သ့ၣ်ညါ, တၢ်ကီၤပသး, တၢ်ဝံသးစူၤ, တၢ်ယူးယီၣ်ယွၤ, တၢ်အဲၣ်ပုၢ်အဲၣ်ဝဲၢ်ဒီးတၢ်အဲၣ်တၢ်ကွံအပူၤန့ၣ်လီၤ. တၢ်သ့ၣ်တဖၣ်အံၤမ့ၢ်ဒိၣ်ထီၣ်အါထီၣ်လၢပပူၤဒီးကမ့ၢ်ပတၢ်နၥ်အတၢ်အုၣ်အသးန့ၣ်လီၤ.
လုၢ်လၢ်အဂ့ၤအဝါတဖၣ်အံၤအဃိ တမ့ၢ် ပကဒိးန့ၢ်ယွၤအတၢ်ဘၣ်သးဘၣ်, တမ့ၢ်လၢပကဒိးန့ၢ်ဘၣ်မူခိၣ်ဘီမုၢ်အဂီၢ်ဘၣ်.မ့မ့ၢ်လုၢ်လၢ်ဂ့ၤဝါတဖၣ်အံၤ ပၥ်ဖျါထီၣ်ပနီၢ်ကစၢ်ဒၣ်ပဝဲဒီးပှၤလၢဘၣ်ထွဲဒီးပှၤတဖၣ်န့ၣ် မ့ၢ်လၢကစၢ်ယွၤဟ့ၣ်ပှၤတၢ်ကူၣ်သ့ဒီး တၢ်ဂံၢ်တၢ်ဘါအဃိ အလီၢ်အိၣ်လၢ ပကဘၣ်အိၣ်မူအိၣ်ဂဲၤ ဒီးတၢ်ကီၤသူၣ်ကီၤသးအပူၤန့ၣ်လီၤ.လၢတၢ်ခဲလၢၥ်အံၤအဖီခိၣ် တၢ်အဂ့ၤကတၢၢ်မ့ၢ်ဝဲ အဝဲဟ့ၣ်ပှၤတၢ်ကိးမံၤဒဲးလၢပလိၣ်ဘၣ်အီၤ ဒ်သိးပကအိၣ်မူပှဲၤဒီး တၢ်ယူးယီၣ်ယွၤန့ၣ်လီၤ. ခီဖျိသးမုၢ်စီဆှံအစိအကမီၤအဃိန့ၣ် တၢ်အိၣ်မူယူးယီၣ်ယွၤမ့ၢ် တၢ်လၢအမၤမုၥ်ယွၤအသးန့ၣ် ပကထံၣ်ဘၣ် ဖဲအဆၢဖိ ၃ န့ၣ်လီၤ.
