တၢ်ကိၢ်ခါအဆၢကတီၢ် မုၢ်ဟဲထီထီၣ်ဒီး ပှၤအိၣ်လၢယဟံၣ်ကပၤတဂၤ ထံၣ်ယၤလၢဟံၣ်မဲၥ်ညါကရၢၢ်ပူၤ ဒီးနံၤကမှံၤထီၣ်ဝဲဒီး ကိးကသွံယၤ လၢယကလဲၤကွၢ်တၢ်လီၤ. ယအဲၣ်ဒိးသ့ၣ်ညါတၢ်မနုၤမၤအသးအဃိ ယသံကွၢ်က့ၤအီၤ တၢ်မနုၤလဲၣ်န့ၣ်လီၤ. အဝဲယူၥ်ဃီၤအစုဆူကလံၤဒၢလွဲ လၢအအိၣ်လၢအဟံၣ်မဲၥ်ညါ တၢ်လဲၤနုၥ်ခိၣ်ဒုးန့ၣ်လီၤ. ဖဲန့ၣ်ယထံၣ်ဘၣ်ထိၣ်အသွံဆံးဆံးဖိ အိၣ်လၢဟီၣ်လၥ်သွဲးဃီသွါအခိၣ်ထိးန့ၣ်လီၤ. အဝဲစံးကသွံဒံဝဲ “ထိၣ်ကနဲဖိအသွံ, နထံၣ်ထိၣ်ဖိတဖၣ်ဧါ” ထိၣ်အနိးဖိခံဘိ, ဆံးဆံးဖိဒ်ထးခိၣ်စူအသိး ယူၥ်ထီၣ်အသးအံၤပထံၣ်အီၤ တဖျါကဲၣ်ဆိးဘၣ်. “အဝဲသ့ၣ်အိၣ်ခိးအမိၢ်” ပဆၢထၢၣ်ဖဲန့ၣ် လၢတၢ်ကမၢကမၣ်အပူၤ, ယယူၥ်ထီၣ်ယလီတဲစိ ဒ်သိးယကဒိတၢ်ဂီၤအဂီၢ်လီၤ. ယသကိးမုၣ်စံးဘၣ်ယၤ “တဘၣ်လဲဘူးကဲၣ်ဆိးတဂ့ၤ, ယတအဲၣ်ဒိးလၢထိၣ်အမိၢ်ဖိ ကပျံၤတၢ်ဒီးယူၤထီၣ်ကွံၥ်ဝဲဘၣ်. စးထီၣ်ဖဲန့ၣ် ပလုၢ်ဖိထိၣ်ကနဲဖိတဒူၣ်အံၤလၢ အအိၣ်ဟဲဝဲဒၣ်လၢတၢ်လီၢ်အယံၤန့ၣ်လီၤ.
ဘၣ်ဆၣ်တယံၥ်ဘၣ်. လၢခံတနွံန့ၣ်ဒီး ထိၣ်အမိၢ်ဒီးအဖိတဖၣ်တအိၣ်လၢၤဘၣ်. ဒ်အဝဲသ့ၣ် ဟဲတုၤဝဲဘှ့ၣ်ဘှ့ၣ်ဘှီၣ်ဘှီၣ်အသိး ဟးထီၣ်ကွံၥ်ဝဲဘှ့ၣ်ဘှ့ၣ်ဘှီၣ်ဘှီၣ်န့ၣ်လီၤ. ဘၣ်ဆၣ် မ့ၢ်မတၤကကွၢ်ထွဲအဝဲသ့ၣ်လဲၣ်.
လံၥ်စီဆှံဟ့ၣ်ပှၤတၢ်စံးဆၢလၢအဂ့ၤဒိၣ်မး ဒီးလၢပညီနုၢ်နၢ်ဟူအီၤန့ၣ်လီၤ. ညီနုၢ်ကဲၣ်ဆိးအဃိ ဘၣ်သ့ၣ်သ့ၣ်ပကသးပ့ၤနီၣ် အတၢ်အၢၣ်လီၤတဖၣ်လီၤ. လၢ မး ၆:၂၅ အပူၤ ကစၢ်ယ့ၣ်ရှူးစံးဝဲ “သုတဘၣ်ယိၣ်လၢသုသးသမူအဂီၢ်တဂ့ၤ” . မ့ၢ်တၢ်နဲၣ်ကျဲယိယိဖိဘၣ်ဆၣ်ဃံလၤဝဲလီၤ. လၢအဆၢဖိ ၂၆ အပူၤ အဝဲစံးကဒီးဝဲ “ကွၢ်ထိၣ်ဖိလံၣ်ဖိလၢတၢ်ဖးဖီန့ၣ်တက့ၢ်. အဂ့ၢ်ဒ်အံၤတဖှံတၢ်ဘၣ်, တကူးဘၣ်တၢ်ဘၣ်, တဂၢ်ဖှိၣ်တၢ်လၢသိၣ်ပူၤဖီပူၤဘၣ်. ဒီးသုပၢ်အိၣ်လၢမူခိၣ်န့ၣ်လုၢ်အီၣ်လုၢ်အီအီၤလီၤ”.
ဒ်ကစၢ်ယွၤသးအိၣ်ဘၣ်ထိၣ်ဖိတဖၣ်အသိးန့ၣ် အဝဲကဟုကယၥ်သးအိၣ်ပှၤလီၤ. အဝဲဒုးဒိၣ်ထီၣ်ပှၤလၢနီၢ်ခိ, နီၢ်သး ဒီးသးလၢအဟဲလၢယွၤန့ၣ်လီၤ. အအံၤမ့ၢ်တၢ်အၢၣ်လီၤလၢအလီၤကဟုကညီၢ်ဒိၣ်မးလီၤ. မ်ပကကွၢ်ထီၣ်တၢ်ဆူအအိၣ်ကိးနံၤဒဲး, ပကယူၤဝ့ၤဝီၤလၢတၢ်ဖးဖီ ဒီးတၢ်ဘၣ်ယိၣ်ဘၣ်ဘီအလီၢ်တအိၣ်ဘၣ်န့ၣ်လီၤ.
