“လၢမဲၥ်ထံကလၤအပူၤန့ၣ်မ့ၢ်မတၤတဂၤလဲၣ်” တၢ်အံၤမ့ၢ်တၢ်သံကွၢ်တခါလၢ သးဂ့ၢ်ပီညါပှၤကူၣ်သ့တဖၣ်လၢ အသမံသမိးသံကွၢ်ဖိဒံဖိသၣ်တဖၣ် အတၢ်သ့ၣ်ညါတိၢ်နီၣ်လီၤ အသးဘၣ်, တဘၣ်အခါန့ၣ်လီၤ. ဖိသၣ်လၢအသးအိၣ် တဆံဃိးလါဒီးအဖီလၥ်တဖၣ်န့ၣ် ညီနုၢ်တိၢ်နီၣ်မၤဘၣ်ထွဲအသးဒီးအက့ၢ်အဂီၤ လၢအဖျါလၢမဲၥ်ထံကလၤအပူၤတန့ၢ်ဘၣ်. ဘၣ်ဆၣ်ဖဲအဒိၣ်ထီၣ်ဝဲန့ၣ်, ဖိသၣ်တဖၣ်နၢ်ပၢၢ်ထီၣ်ဝဲလၢ အဝဲသ့ၣ်ကွၢ်လီၤဒၣ်အသးလၢမဲၥ်ထံကလၤအပူၤလီၤ. တၢ်သ့ၣ်ညါထံလီၤသးအံၤ မ့ၢ်တၢ်ဒိၣ်ထီၣ်ဒီးတၢ်ဒိၣ်တုၥ်ခိၣ်ပှဲၤ လၢတၢ်အိၣ်ဆူၣ်အိၣ်ချ့အပူၤအပနီၣ် လၢအကါဒိၣ်တခါန့ၣ်လီၤ.

တၢ်အံၤမ့ၢ်တၢ်လၢအကါဒိၣ်စ့ၢ်ကီး လၢပှၤစူၢ်က့ၤနၥ်က့ၤခရံၥ်တဖၣ် အတၢ်ဒိၣ်ထီၣ်အပူၤန့ၣ်လီၤ. စီၤယၤကိၥ်ပၥ်ဖျါတၢ်ဂ့ၢ်အတကွီၣ်ဘၣ်ဃးဒီး မဲၥ်ထံကလၤအတၢ်မၤကွၢ်န့ၣ်လီၤ. မဲၥ်ထံကလၤအံၤ မ့ၢ်ဝဲယွၤအတၢ်မ့ၢ်တၢ်တီအကလုၢ်လီၤ(ယၤကိၥ် ၁:၁၈) . ဖဲပဖးလံၥ်စီဆှံအခါပထံၣ်တၢ်မနုၤတဖၣ်လဲၣ်. ဖဲလံၥ်စီဆှံပၥ်ဖျါ တၢ်အဲၣ်ဒီးတၢ်ဆီၣ်လီၤသးအခါ မ့ၢ်ပထံၣ်လီၤက့ၤပသးဧါ. ဖဲလၢပဖးဘၣ်တၢ်လၢ ကစၢ်ယွၤမၢပှၤတဖၣ်အခါန့ၣ် မ့ၢ်ပထံၣ်လီၤက့ၤ ပတၢ်ဖံးတၢ်မၤတဖၣ်ဧါ. ဖဲပကွၢ်လီၤက့ၤပသးဒီး သမံသမိးက့ၤပတၢ်ဖံးတၢ်မၤတဖၣ်အခါန့ၣ် လံၥ်စီဆှံမၤစၢၤဒုးထံၣ်သ့ၣ်ညါပှၤလၢ ပတၢ်ဖံးတၢ်မၤတဖၣ်န့ၣ် လီၤပလိၥ်ဝဲဒီး ကစၢ်ယွၤအတၢ်အဲၣ်ဒိးလၢပဂီၢ်ဧါ. မ့တမ့ၢ်, မ့ၢ်ပလိၣ်ဘၣ်တၢ်ပီၢ်ယၢ်လီၤပသးဒီး လဲလိၥ်က့ၤပသးန့ၣ်ဧါ.

အဆၢဖိ ၂၂ အပူၤ စီၤယၤကိၥ် ဟ့ၣ်ပလီၢ်ပှၤဒ်သိး ပသုတမ့ၢ်ပှၤလၢအဖးလံၥ်စီဆှံဝံၤ ဒီးဟးထီၣ်, ပှၤလီလီၤအသး, ဒီးသးပ့ၤနီၣ်ကွံၥ်တၢ်လၢပထံၣ်, ပဖးတဖၣ်န့ၣ်တဂ့ၤအဂီၢ်န့ၣ်လီၤ.လံၥ်စီဆှံဟ့ၣ်ပှၤ ဟီၣ်ခိၣ်ဂီၤအတၢ်နဲၣ်ကျဲဒ်သိး ဒီးပကအိၣ်မူလၢတၢ်ကူၣ်သ့အပူၤ ဒ်ယွၤအတၢ်ဘၣ်အသးအသိးန့ၣ်လီၤ.ဖဲလၢပဖးလံၥ်စီဆှံ, မုၥ်လၤဆိကမိၣ်အီၤဒီး မၤနၢ်ပၢၢ်အီၤဂ့ၤဂ့ၤဘၣ်ဘၣ်အခါန့ၣ် ပဃ့ကစၢ်ယွၤလၢကဟ့ၣ် ပှၤမဲၥ်ချံဒ်သိးပကထံၣ်လီၤက့ၤပသးဒီး ဂံၢ်ဘါလၢပကလဲလိၥ်တၢ်လၢ ပကြၢးလဲလိၥ်တဖၣ်န့ၣ်လီၤ.