မဲၣ်ခၢၣ်(Michael)ယူၤထံလၢ တၢ်ဃုန့ၢ်ပီၣ်လဲၣ်သဒီၣ်ကိၤ(lobster)အခါ လဲၤစဲထီဃာ်လၢ ပီၣ်လဲၣ်ညၣ်မိၢ်ပှၢ် (ညၣ်တီသွ့- humpback whale)အကိာ်ပူၤလီၤ. ညၣ်မိၢ်ပှၢ်အညၣ်ထူၣ်တဖၣ် ဆီၣ်နုာ်အီၤအခါ အဝဲဆီၣ်ကဒါဆၢက့ၤသး ဆူတၢ်လီၢ်ခံ လၢတၢ်ခံးကၠိၢ်ကလာ်အပူၤလီၤ. အဝဲဆိကမိၣ်လီၤသးလၢ အဝဲတမူလၢၤဘၣ်. မ့မ့ၢ်, ပီၣ်လဲၣ်ညၣ်မိၢ်ပှၢ်န့ၣ် တသးအိၣ်အီၣ် ပှၤဃုသဒီၣ်ကိၤဘၣ်, ဒီးစဲးကီး ၃၀ ဝံၤအလီၢ်ခံန့ၣ် ညၣ်ဖးဒိၣ်အံၤ ဘှိးဖျိးကွံာ် မဲၣ်ခၢၣ် လၢကလံၤကျါလီၤ. မဲၣ်ခၢၣ်အဃံတကၢ်နီတဘိဘၣ်န့ၣ် မ့ၢ်တၢ်လီၤကမၢကမၣ်လီၤ. ထဲဒၣ် တၢ်လုးလါပိာ်ဃံာ်ပိာ်ဃ့လီၢ်ဖးလဲၢ်အိၣ်ထီၣ် ဒီးတၢ်အံၤမ့ၢ် ပီၣ်လဲၣ်ညၣ်မိၢ်ပှၢ်တၢ်တဲဖိတခါန့ၣ်လီၤ.
အဝဲတမ့ၢ်ပှၤအဆိကတၢၢ်တဂၤဘၣ်. စီၤယိၤနါ ဘၣ်တၢ်ယူၢ်လီၤလၢညၣ်ဖးဒိၣ်တဘ့ၣ် (ယိၤနါ ၁:၁၇), ဒီးအဝဲအိၣ်ဘၣ်လၢညၣ်အဟၢဖၢပူၤ တချုးဘၣ်တၢ်ဘှိးထီၣ်ဆူခိ ၃ သီညါလီၤ (၁:၁၇, ၂:၁၀). တမ့ၢ်ဒ်မဲၣ်ခၢၣ် ဘၣ်တၢ်ဖီၣ်န့ၢ် ဘၣ်ဆၢၣ်ဘၣ်တီၤဘၣ်, စီၤယိၤနါ ဘၣ်တၢ်ယူၢ်လီၤန့ၣ် မ့ၢ်လၢအသးဟ့ ပှၤအံၣ်စရ့လးဖိအဒုၣ်ဒါတဖၣ်ဒီး တအဲၣ်ဒိးဝဲလၢ ပှၤနံၤနဝ့ဖိတဖၣ် ကပီၢ်ယၢ်လီၤသးဘၣ်. ဖဲကစၢ်ယွၤစံးဘၣ်စီၤယိၤနါလၢ ကလဲၤစံၣ်တဲၤတဲလီၤတၢ်ဆူ ဝ့ၢ်နံၤနဝ့န့ၣ်, စီၤယိၤနါဒိးထီၣ်ကဘီတဘ့ၣ် ဒီးလဲၤဆူကျဲအဂၤတဘိလီၤ. အဃိ, ကစၢ်ယွၤဆှၢလီၤ ညၣ်ဖးဒိၣ် ထဲပီၣ်လဲၣ်ညၣ်မိၢ်ပှၢ်အသိး ဒ်သိးစီၤယိၤနါ ကတရံးကဒါအသးဆူ ယွၤအအိၣ်လီၤ.
ယဘၣ်သူၣ်ဘၣ်သး လၢစီၤယိၤနါသးဟ့ ပှၤအၤရှူၢ်ဖိ(Assyrians)တဖၣ်အဂ့ၢ်လီၤ. အဝဲသ့ၣ် မၤတံာ်တာ်တ့ၢ် ပှၤအံၣ်စရ့လးဖိတဖၣ်လၢ ခါပူၤကွံာ်န့ၣ်, ဒီးလၢအနံၣ်(၅၀)အတီၢ်ပူၤ အဝဲသ့ၣ် က့ၤဖီၣ်ပှၤအံၣ်စရ့လးဖိလၢ ကလံၤစိးတကပၤ တုၤပှၤတဖၣ်အံၤ လီၤမၢ်ကွံာ်လီၤစိၤန့ၣ်လီၤ. စီၤယိၤနါအသးဆါလၢ ပှၤအၤရှူၢ်ဖိတဖၣ်အတၢ်ကမၣ် ဘၣ်တၢ်ပျၢ်အဖီခိၣ် ပနၢ်ပၢၢ်သ့လီၤ.
စီၤယိၤနါ တီဒီးယွၤအပှၤကညီတဖၣ် ဒိၣ်အါန့ၢ် တီဒီးပှၤကညီခဲလၢာ်အကစၢ်ယွၤလီၤ. ကစၢ်ယွၤအဲၣ် ပှၤအံၣ်စရ့လးဖိတဖၣ်အဒုၣ်အဒါတဖၣ်ဒီး သးအိၣ်မၤပူၤဖျဲးအဝဲသ့ၣ်လီၤ. ယွၤအဲၣ်ပဒုၣ်ပဒါတဖၣ် ဒီးအဲၣ်ဒိးအုၣ်က့ၤခီၣ်က့ၤအဝဲသ့ၣ်လီၤ. မ်ပလဲၤဆူ ပဒုၣ်ဒါတဖၣ်အအိၣ် စိာ်ဃုာ်တၢ်သးခုအကစီၣ် ဘၣ်ဃးယ့ၣ်ရှူးခရံာ်တက့ၢ်.
