ဖဲတိာ်ဖးထီခံဖျၢၣ် “World Trade Center”လီၤတကူၢ် ဖဲလါစဲးပထ့ဘၢၣ် ၁၁ သီ, ၂၀၀၁ အနံၣ်န့ၣ်, ကရၢး ရိဒရံၣ်ကၠဲး(Greg Rodriguez) သံစ့ၢ်ကီးဝဲလၢ တၢ်ဟးဂူာ်ဟးဂီၤအလ့ၢ်အက့တဖၣ်အကျါလီၤ. အဝဲအမိၢ် ဖံလ့း(စ) (Phyllis)ဒီးအပၢ်, မိၢ်ပၢ်ခံဂၤ သူၣ်အုးသးအုးအဃိ, အဝဲသ့ၣ်ဆိကမိၣ်လီၤတံၢ်ဝဲလၢ ကမၤဆၢက့ၤ တၢ်ဒုးလၢအလီၤပျံၤနးမး ဒ်သိးန့ၣ် ဒ်လဲၣ်အဂ့ၢ်လီၤ. ဖဲ ၂၀၀၂ အနံၣ်န့ၣ်, မိၢ်ဖံလ့း(စ) ထံၣ်လိာ်သးဒီး အ့ခၠၢၣ် အၢ-ဝ့ဖၢၣ်(Aicha el-Wafe)လၢအမ့ၢ် ပှၤမၤစၢၤ ပှၤကမၤဟးဂီၤတိာ်ဖးထီခံဖျၢၣ်အံၤ အမိၢ်လီၤ. မိၢ်ဖံလ့း(စ) န့ၣ်စံးဝဲ “အဝဲသုးဘူးဆူ မိၢ်တဂၤန့ၣ် အိၣ်, တယၢ်ထီၣ်အစုခံခီ, ဖိးဟုလိာ်သး ဒီးဟီၣ်ဝဲ… အ့ခၠၢၣ် ဒီးယၤ, ပျံၤတဃာ်တဘိ စၢကဝီၤပှၤတကီၢ်ခါ… ပဝဲးခံဂၤလၢာ် ပသးဘၣ်ဒိလၢ ပဖိခွါတဖၣ်အဃိလီၤ”.
ဖံလ့း(စ) ထံၣ်လိာ်သးဒီး အ့ခၠၢၣ်လၢ တၢ်သးဆါဒီးတၢ်သးအုးဒ်သိးလိာ်သးအပူၤလီၤ. ဖံလ့း(စ) နာ်ဝဲလၢ တၢ်သးအိၣ်တပျုာ်တပျီၤလၢ အဖိခွါဘၣ်သံအဃိ မ့ၢ်တၢ်လၢအကြၢးဝဲဘၣ်ဆၣ်, မၤဘျါအဝဲအတၢ်သးဘၣ်ဒိဆါတန့ၢ်ဘၣ် ခီဖျိလၢနၢ်ဟူဘၣ်ဝဲ အ့ခၠၢၣ် အဟံၣ်ဖိဃီဖိအဂ့ၢ်အဃိ, ဖံလ့း(စ) အတၢ်သးကညီၤအံၤန့ၣ် တြီဆၢက့ၤတၢ်လ့ပစီလၢ အဒုးထံၣ် အ့ခၠၣ်အဟံၣ်ဖိဃီဖိလၢ အမ့ၢ်ဒုၣ်ဒါန့ၣ်လီၤ. တၢ်သးကညီဆီတလဲကွံာ် အသူၣ်အသးန့ၣ်လီၤ. ဖံလ့း(စ) သးလီတၢ်တီတၢ်လိၤ, ဘၣ်ဆၣ် နာ်ဝဲလၢ ပကဘၣ်ပျဲပူၤ တၢ်လ့ပစီ ဒ်သိးပကမၤအၢဆၢက့ၤတၢ်လီၤ. တၢ်မၤအၢမၤဆၢကဒါအံၤ အါစုအါဘျီ စှီၤတံၢ်ဃာ်ပှၤ ဖဲပမၤကမၣ်ဘၣ်တၢ်န့ၣ်လီၤ.
ပှၤတၢ်မၢဖိစီၤပီလူး နီၤဟ့ၣ်တၢ်စူၢ်တၢ်နာ်ကျၢၤမုဆှုအံၤ, သိၣ်က့ၤသီက့ၤပှၤ ဒ်သိး “ပကပာ်တ့ၢ်ကွံာ် တၢ်အခၣ်, တၢ်သးဒိၣ်, တၢ်သးဟ့…ဒီးကယဲၢ်တၢ်အအၢအသီခဲလၢာ်” လီၤ (အ့ဖ့း ၄:၃၁). ဖဲပစူးကွံာ်ညိကွံာ်စိကမီၤ မၤဟးဂီၤတၢ်တဖၣ်အံၤအခါ, ကစၢ်ယွၤ အသးစီဆှံ မၤပှဲၤပှၤဒီးတၢ်ထံၣ်အသီလီၤ. စီၤပီလူး စံးဝဲဖဲ အဆၢဖိ ၃၂ န့ၣ် လၢ “ဝံသးစူၤလိာ်သုသး, သူၣ်ကညီၤသးကညီၤလိာ်သုသး” န့ၣ်လီၤ. မ့ၢ်စ့ၢ်ကီး တၢ်မၤတမံၤလၢ ပကမၤဘၣ်က့ၤ တၢ်အကမၣ်တဖၣ် ဖဲပဂ့ၢ်လိာ်တၢ်မၤကၣ်မၤဆၢတၢ်အၢလၢ တၢ်သးဒိၣ် တပျုာ်တပျီၤအပူၤလီၤ. မ်သးစီဆှံ မၤစၢၤပှၤလၢ ပကဒုးနဲၣ် တၢ်သးကညီၤလၢအမၤနၢၤကွံာ် တၢ်အခၣ်တဖၣ်တက့ၢ်.
