အမဲရကၤ ၦၤလိၥ်ကွဲၦၤစိၥ်တၢ်ဃၢ(weightlifter)လၢအမ့ၢ် ပီအဲန်ဒၣ်စၢၣ်(Paul Anderson), တဘျီ ဘၣ်တၢ်သ့ၣ် ညါအီၤ ဒ်ဟီၣ်ခိၣ်ဒီဘ့ၣ် ၦၤဂံၢ်ဘါအဆူၣ်ကတၢၢ်ယ ကဲထီၣ် မၤနၢၤတၢ်သတြီၤ ဖဲ 1956 နံၣ်အိၣ်လါပံး(Olympic) ဖဲဝ့ၢ်မဲလ်ဘိ(Melbourne), ကီၢ်အီးစတြ့လယၣ်(Australia), ဖဲလၢမ့ၢ်ဘၣ်တူၢ်တၢ်ဆါအယၢ် လၢအမၤဘၣ်ဒိအနၢ်ပူၤ ဒီးအတၢ်ကိၢ်အိၣ် ၁၀၃ ဒံၢ်ကရံၣ်(103-degree)ကတီၢ်န့ၣ်လီၤ. အဝဲလီၤဃံၤ လၢၦၤလၢ အဖျါလၢကမၤနၢၤအီၤအမဲၥ်ညါ, ဒီးအဝဲအတၢ်ခွဲးတၢ်ယာ်ထဲတမံၤ လၢကဒိးန့ၢ် ထူမဲးဒၢၣ်အံၤ မ့ၢ်ဝဲတၢ်ဆၢကတီၢ်လၢခံကတၢၢ်န့ၣ်လီၤ. အဝဲအတၢ်ဂုၥ်ကျဲးစၢးလၢ အမဲၥ်ညါခံဘျီ လီၤမၣ်ကွံၥ်အၢအၢသီသီန့ၣ်လီၤ.

လၢတၢ်အံၤအဃိ, ၦၤဒိၣ်ၦၤသွါဖးဒိၣ်အံၤ မၤတၢ်ဒ်ၦၤအစၢ်ကတၢၢ်လၢပကျါ မၤဝဲသ့အသိးန့ၣ်လီၤ. အဝဲကိးထီၣ်ကစၢ်ယွၤလၢတၢ်ကဒိးန့ၢ်ဂံၢ်ဘါလီၤဆီ, ပျဲပူၤကွံၥ် အကစၢ်အဂံၢ်အဘါလၢအဆူၣ်တ့ၢ်ဝဲန့ၣ်လီၤ. လၢခံအဝဲစံးဝဲလၢ, “တၢ်အံၤတမ့ၢ်တၢ်လၢ ယမၤအီၤ ဒ်တၢ်ပှ့ၤတၢ်တမံၤ လၢအစှၤန့ၢ်ဒံးအပှ့ၤကလံၤန့ၣ်ဘၣ်. ယလိၣ်ဘၣ်ယဲ တၢ်မၤစၢၤလီၤ”. ဃုၥ်ဒီးတၢ်စိၥ်ထီၣ် တၢ်ဃၢလၢခံကတၢၢ်တဘျီ, အဝဲယူာ်ထီၣ် တၢ်အဃၢလၢအအိၣ် ၄၁၃.၅ ပီၣ်(pound) (၁၈၇.၅ ကံၣ်လိၣ်(kg)) လၢအခိၣ်လိၤန့ၣ်လီၤ.

ၦၤတၢ်မၢဖိစီပီလူးကွဲးဖျါထီၣ်ဝဲလၢ, “တုၤယဂံၢ်စၢ်ယဘါစၢ်ဒီး, ယအိၣ်ဒီး ယစိယကမီၤလီၤ” (၂ ကရံၣ် ၁၂:၁၀). စီၤပီလူးကတိၤတၢ်ဂ့ၢ်လၢအဘၣ်ထွဲ ဒီးနီၢ်သးအတၢ်ဂံၢ်ဆူၣ်ဘါဆူၣ်, ဘၣ်ဆၣ် အဝဲသ့ၣ်ညါလၢ ကစၢ်ယွၤအစိကမီၤ မ့ၢ်စိကမီၤ လၢ အ“လၢထီၣ်ၦဲၤထီၣ် လၢတၢ်အဂံၢ်စၢ်အဘါစၢ်အပူၤလီၤ” (:၉). ဒ်ဝံယၡါယၤ ကိးသတြီထီၣ်ဝဲအသိး “ၦၤလၢအလီၤဘှါန့ၣ် ယွၤဟ့ၣ်ဝဲလၢအဂံၢ်အဘါလီၤ ဒီးၦၤလၢအဂံၢ်အဘါ တအိၣ်ဘၣ်န့ၣ် ဒုးဆူၣ်ထီၣ်ဝဲ အဂံၢ်အဘါလီၤ” (ယၡါ ၄၀:၂၉).

ကျဲအိၣ်ဝဲမနုၤဆူ တၢ်ဂံၢ်ဆူၣ်ဘါဆူၣ် ဒ်သိးအံၤန့ၣ်လဲၣ်. မ့ၢ်တၢ်အိၣ်ဆိးလၢ ယ့ၣ်ၡူးန့ၣ်လီၤ. အဝဲစံးဝဲလၢ “မ့တမ့ၢ် ဘၣ်လၢယၤဘၣ်ဒီး, သုမၤတၢ်တသ့ဘၣ် နီတမံၤဘၣ်” (ယိၤ ၁၅:၅). ဒ်ၦၤလိၥ်ကွဲစိၥ်တၢ်ဃၢ အဲန် ဒၢၣ်စၢၣ်စံးဝဲ တလီၢ်လီၢ်, “ဖဲလၢ ၦၤအဂံၢ်ဘါဆူၣ်ကတၢၢ်လၢ ဟီၣ်ခိၣ်, တနံၤမ့ၢ် တမၤန့ၢ် တၢ်စိကမီၤ လၢယ့ၣ်ၡူး, မ့ၢ်တၢ်မနုၤကအိၣ်ဒီးနၤ ဒံးလဲၣ်”. ဒ်သိးတၢ်ကထံၣ်န့ၢ်တၢ်အံၤ, ပကဘၣ်ပျဲပျၢ်ကွံၥ် ပတၢ်သန့ၤထီၣ်သးလၢ ပကစၢ်ဒၣ်ဝဲအဂံၢ်အဘါ, ဒီးဃ့ယွၤလၢကဟ့ၣ်လီၤလၢနၤ လၢအဝဲအဂံၢ်အဘါလၢအဆူၣ်ဒီးအတၢ်မၤစၢၤလၢတၢ်ဆၢကတီၢ်လီၤလီၤဆီဆီအဂီၢ်န့ၣ်တက့ၢ်.