တၢ်ကိၢ်အကတီၢ် မုၢ်နံၤလၢအလၢၤတနံၤန့ၣ် ယလံၤမုၣ်ဖိ မီၣ်လံၣ်အသးအိၣ် (၄) နံၣ် ဒီးယၤ ပလိၥ်ကွဲဖျၢၣ်သလၢၣ် ဒီးပအိၣ်ဘှံးတစိၢ်ဖိန့ၣ်လီၤ. ဖဲပဆ့ၣ်နီၤအိၣ်လၢ ဟံၣ်မဲၥ်ညါပဲတြီအခိၣ်ဒီအလီၢ်, ဃုၥ်ဒီး ထံအီလီခီဆှံတဖၣ်အခါ, မီၣ်လံၣ် ကွၢ်ဃီၤဆူ ကရၢၢ်ပူၤဒီးစံးဝဲ “ကွၢ် မုၢ်အတၢ်ကပီၤ အတၢ်ကလိၥ်ပူၤတဖၣ်တဘီ” မုၢ်အတၢ်ကပီၤန့ၣ် ဟဲနုၥ်ဖျိလီၤ သ့ၣ်လၣ်တီၣ်တဖၣ်အကျါ ဒီးဒုးအိၣ်ထီၣ် တၢ်ကပီၤအကံၣ်ဒိလၢ တၢ်အကဒုခံးတဖၣ်အကျါန့ၣ်လီၤ.

မုၢ်အတၢ်ကပီၤ အတၢ်ကလိၥ်ပူၤဖိတဖၣ်. တၢ်အံၤတမ့ၢ်ဘၣ် တၢ်ဂီၤဃံလၤ တဘ့ၣ်လၢ တၢ်ကထံၣ်န့ၢ် တၢ်မုၢ်လၢ်လၢ မုၢ်နံၤမုၢ်သီလၢ အခံးသူတဖၣ်အပူၤအဂီၢ်ဘၣ်ဧါ. လၢတၢ်တၤအကတီၢ်တဖၣ်အပူၤ, ဖဲတၢ်ကစီၣ်အမုၥ် အိၣ်စှၤမးအခါ, လၢတၢ်ကွၢ်ထဲ တၢ်အကဒုတဖၣ်အလိၤ အလီၢ်န့ၣ်, ပကွၢ်စူၣ်တၢ်လၢ တၢ်ကပီၤအလိၤ သ့ဝဲဒၣ်လီၤ.

‘တၢ်ကပီၤ’န့ၣ် အိၣ်ဒီးအမံၤ, မ့ၢ်ဝဲယ့ၣ်ၡူးန့ၣ်လီၤ. လံၥ်မးသဲ ဟံးန့ၢ် ဝံယရှါယၤအတၢ်ကတိၤဒီး တဲဖျါထီၣ်တၢ်ကပီၤလၢ အဟဲနုၥ်လီၤဆူ ဟီၣ်ခိၣ်ချၢ ဖဲကစၢ်ယ့ၣ်ၡူး ဟဲတုၤအခါ န့ၣ်လီၤ. “ၦၤဂီၢ်မုၢ်လၢ အဆ့ၣ်နီၤလၢတၢ်ခံးကျါန့ၣ် ထံၣ်လံတၢ်ကပီၤဖးဒိၣ်လံ, ဒီးၦၤဆ့ၣ်နီၤလၢ တၢ်သံအကီၢ်ဒီးအကဒုပူၤတဖၣ်န့ၣ်, တၢ်ကပီၤဟဲထီၣ်န့ၢ်အီၤလံ” (မး ၄:၁၆, ကွၢ်ဃုၥ် ယၡါ ၉:၂ တက့ၢ်). တၢ်ဒဲးဘးအတၢ်မၤဘၣ်ဒိဘၣ်ထံးတဖၣ် အိၣ်ဝးတရံးၦၤ, ဒ်ပအိၣ်လၢ “တၢ်သံအကီၢ်ဒီးအကဒုပူၤ” အသိးန့ၣ်လီၤ. ဘၣ်ဆၣ် တၢ်လၢ အဆဲးကပီၤဖျိ တၢ်အကဒုန့ၣ် မ့ၢ်ယ့ၣ်ၡူး, ဟီၣ်ခိၣ်အတၢ်ကပီၤလၢ အလီၤဘီလီၤမုၢ်ဒီး ၦဲၤဒီးအလၤကပီၤန့ၣ်လီၤ (ယိၤဟၣ် ၁:၄-၅).

ကစၢ်ယ့ၣ်ၡူးအတၢ်အဲၣ်ဒီးအတၢ်သးကညီၤအတၢ်ကပီၤန့ၣ် ဆဲးဖျိတၢ် အကဒု ဒီးဟ့ၣ်ၦၤ “တၢ်ကပီၤအကလိၥ်ပူၤတဖၣ်” ဒ်သိးကမၤကပီၤထီၣ် ပမုၢ်နံၤဒီး မၤဖှံထီၣ်ပသးလၢတၢ်မုၢ်လၢ်န့ၣ်လီၤ.