တၢ်မၤအဆိကတၢၢ်လၢ ယမၤ ဖဲယထီၣ် တီၤထီကၠိအနံၣ်တဖၣ်အပူၤန့ၣ် မ့ၢ်ဖဲပိၥ်မုၣ်အကူအသိးအကျးန့ၣ်လီၤ. ဖဲန့ၣ် ပိၥ်မုၣ်လၢ အပၢၤကျးအတၢ်ဘံၣ်တၢ်ဘၢတဂၤန့ၣ် ကူကၤဃၥ် ဒ်ၦၤပှ့ၤတၢ်တဂၤအသိး ဒီးလူၤပိၥ်ၦၤပိၥ်မုၣ်တဖၣ် လၢအဝဲဆိကမိၣ်လၢဘၣ်သ့ၣ်သ့ၣ် ကဟုၣ်ကျးပနံၥ်တဖၣ်န့ၣ်လီၤ. ၦၤတနီၤနီၤအက့ၢ်အဂီၤန့ၣ် လီၤပလိၥ်အသးဒီး ၦၤတဖၣ်လၢကျးကစၢ်ထံၣ်ဝဲ ဒ်အလီၤသးဒ့ဒီန့ၣ်လီၤ. မ့မ့ၢ်ၦၤအဂၤလၢ အတလီၤဘၣ်ယိၣ်တဖၣ်န့ၣ် တဘၣ်တၢ်လူၤပိၥ်ကွၢ်ဟုၣ်အီၤဘၣ်. ယနီၢ်ကစၢ်ဒၣ်ယဲ ယဘၣ်တၢ်ထံၣ်ယၤ ဒ်ၦၤတလီၤနၥ်တဂၤအသိး လၢကျးတဖၣ်အပူၤ ဒီးတၢ်လူၤပိၥ်ယခံန့ၣ်လီၤ. ယသ့ၣ်ညါနီၣ် အကျဲကူၣ်တရံးဒံးအဖၢ, ဒီးမ့ၢ်တၢ်လဲၤခီဖျိတခါ လၢအလီၤသးစဲန့ၣ်လီၤ.

လၢအလီၤဆီလိၥ်သးဖးဒိၣ်အပူၤ, စီၤဒၤဝံး စံးဝဲလၢအဘၣ်တၢ်လူၤပိၥ်အခံ လၢယွၤအတၢ်ဆိၣ်ဂ့ၤ လၢအမ့ၢ် ယွၤအတၢ်ဂ့ၤဒီးတၢ်ဘျုးတၢ်ဖှိၣ်န့ၣ်လီၤ. တၢ်ဟ့ၣ်ခံ မံၤအံၤ ထီဘိအိၣ်ဘူးလိၥ်အသး, ဒီးလူၤပိၥ်အဝဲဒၣ်အခံ, တမ့ၢ်လၢတၢ်သးဒ့ဒီအပူၤဘၣ်. မ့မ့ၢ်လၢတၢ်အဲၣ်နီၢ်နီၢ်န့ၣ်လီၤ. ဒ်ၦၤစိၥ်တၢ်သးခုကစီၣ်သရၣ် ခၠါ(လ)စပၢကၠၢၣ်(Charles Spurgeon) စံးဝဲအသိး “မူခိၣ်ကလူး တဃံၥ်လၢ အကဟုကယၥ်တၢ်” န့ၣ် လူၤပိၥ် ၦၤစူၢ်က့ၤနၥ်က့ၤ တၢ်ဖိတဖၣ်အခံ လၢမုၢ်နံၤမုၢ်သီလၢအခံးဒီးအကပီၤ ခံမံၤလၢၥ်အပူၤန့ၣ်လီၤ. “ တၢ်ဂိၢ်တၢ်ခုၣ်အကတီၢ်အမုၢ်နံၤတဖၣ်လၢ အအုးသကျုၥ်ဒီး တၢ်ကိၢ်အကတီၢ်အမုၢ်နံၤတဖၣ် လၢအကပီၤ ခံမံၤလၢၥ်အပူၤ, ယွၤအတၢ်ဂ့ၤမၤလၢမၤၦဲၤန့ၢ် ပတၢ်လိၣ်တဖၣ်, ဒီးယွၤအဘျုးအဖှိၣ် ထုးသံကွံၥ် ပတၢ်ဒဲးဘးတဖၣ်လီၤ”.

ဒ်တဘျီ စီၤဒၤဝံးမ့ၢ်တ့ၢ် ၦၤကွၢ်သိတဂၤအသိး, အဝဲနၢ်ပၢၢ်ဝဲ တၢ်ပၥ်သဃဲၤ တၢ်ဂ့ၤဒီး တၢ်ဘျုးတၢ်ဖှိၣ် ဒ်ယွၤအတၢ်ကတဲၥ်ကတီၤအသိးန့ၣ်လီၤ. တၢ်ဂုၤတၢ်ဂၤ လၢအမ့ၢ် တၢ်ပျံၤတၢ်ဖုး, တၢ်ဘၣ်ယိၣ်ဘၣ်ဘီ, တၢ်လ့တၢ်ပစီ, တၢ်သးဒ့ဒီတဖၣ်န့ၣ် လူၤပိၥ်ၦၤစူၢ်က့ၤနၥ်က့ၤတၢ်ဖိတဖၣ်အခံသ့ဝဲလီၤ. ဘၣ်ဆၣ်, လၢတၢ်လီၤတံၢ်လီၤဆဲး, တအိၣ်ဒီးတၢ်သးဒ့ဒီဘၣ်အပူၤ, စီၤဒၤဝံး စံးဝဲဂၢၢ်ဂၢၢ်ကျၢၤကျၢၤ “ထဲ”ယွၤအတၢ်ဂ့ၤတၢ်ဝါ ဒီးတၢ်အဲၣ်အဘျုးအဖှိၣ်န့ၣ် ကလူၤပိၥ်ပခံထီဘိန့ၣ်လီၤ.

ဒ်စီၤဒၤဝံး သူၣ်ခုသးခုဝဲအသိး, “ထဲတၢ်ဂ့ၤ, ဒီးတၢ်ဘျုးတၢ်ဖှိၣ်န့ၣ် ကလူၤ ပိၥ်ယခံတစိၤဒၣ်ယၤ, ဒီးယကအိၣ်ကဆိးလၢ ယွၤအဟံၣ်လီၤစိၤလီၤထီလီၤ” (စံး ၂၃:၆). မ့ၢ်တၢ်ဟ့ၣ်လၢအလီၤလးမးလၢ အကလူၤပိၥ်ပခံဆူဟံၣ်န့ၣ်လီၤ.