ဖဲၦၤဆါတၢ်အီၣ်တၢ်အီအကရၢတဖု, ၦၤတဂၤဂၤ မ့ၢ်ၦၤအီၣ်အီအဝဲသ့ၣ်အတၢ်အီၣ် အစှၤကတၢၢ် အခါတဆံန့ၣ် ကဒိးန့ၢ်ဘၣ်တၢ်ခွဲးလၢ ကလဲၤတၢ်ဒီးကဘီယူၤ မံးလၥ်တကထိအဂီၢ်န့ၣ်လီၤ. ဖဲန့ၣ် ၦၤတဂၤထံၣ်သ့ၣ်ညါဝဲလၢ တၢ်အီၣ်အပှ့ၤအစှၤကတၢၢ်လၢ အဝဲသ့ၣ်ဆါဝဲန့ၣ် ခၠီးကလဲးပူၣ်ဒ့(chocolate pudding)န့ၣ်လီၤ. ၦၤတဂၤန့ၣ် ပှ့ၤဝဲအခါ တကလးခံကထိ လီၤလဲ ဒီလၣ် ၃၀၀၀ ဒီးအဝဲမၤန့ၢ်ဝဲ ထူအပတီၢ်ဃုၥ်ဒီးတစိၤသး အဝဲဒီး အဟံၣ်ဖိဃီဖိတဖၣ် ဒိးန့ၢ်တၢ်လဲၤတၢ်လၢ ကဘီယူၤအကလီန့ၣ်လီၤ. အဝဲဟ့ၣ်မၤဘူၣ်ဒုးအီၣ်ပူၣ်ဒ့တဖၣ် ဆူကရၢဟ့ၣ်နီၤလီၤတၢ်အဃိ မၤန့ၢ်ဃုၥ်ဝဲတၢ်အခိအသွဲအဂီၢ် ဒီလၣ် ၈၀၀ ဘၣ်တၢ်မၤစှၤလီၤထုးကွံၥ်ဝဲန့ၣ်လီၤ.

ကစၢ်ယ့ၣ်ၡူး ကတိၤပၥ်ဖျါဝဲ တၢ်တဲဟ့ၣ်ဒိဘၣ်ဃးဒီး တၢ်မၢဖိအခိၣ်လၢအၢသီဝဲတဂၤလၢ ၦၤထုးထီၣ်ကွံၥ်အီၤလၢ တၢ်ဖံးတၢ်မၤအခါ အဝဲဒၣ်ကိးဖှိၣ်ဝဲ, ၦၤလၢအဒ့ၣ်ကမၢ်အိၣ်ဒီး အကစၢ်တဖၣ်ဒီး ဘှီစှၤလီၤဝဲ ၦၤတဖၣ်အဒ့ၣ်ကမၢ် တဖၣ်န့ၣ်လီၤ. မ့ၢ်လၢအဝဲသ့ၣ်ညါလၢ မုၢ်တနံၤအတၢ်မၤအံၤ ကကဲထီၣ် တၢ်မၤစၢၤလၢ ခါဆူညါအဂီၢ် န့ၣ်လီၤ. ကစၢ်ယ့ၣ်ၡူးတမ့ၢ် ပတြၢၤဝဲ တၢ်မၢခိၣ်တဂၤအံၤ လၢအမၤဝဲတၢ်တတီတလိၤအဖီခိၣ်ဘၣ်. ဒ်သိးပကမၤလိန့ၢ်တၢ်လၢ တၢ်သ့ကူၣ်ဒုးကဲထီၣ်ကျဲအသီ အါဘိလၢအတၢ်မၤအဂီၢ်န့ၣ်လီၤ. ကစၢ်ယ့ၣ်ၡူးစံးဝဲ “စုလီၢ်, တတီခီၣ်ခိၣ်တလိၤဘၣ်န့ၣ်, ဒုးကဲထီၣ်အီၤလၢသုတံၤသုသကိး, ဒ်သိးတုၤအလၢၥ်ကွံၥ်ဒီး, အဝဲသ့ၣ် ကတူၢ်လိၥ်သု ဆူဟံၣ်လီၤထူလီၤယိာ်တဖၣ်အပူၤတက့ၢ်” န့ၣ်လီၤ. ဒ်သိးၦၤပှ့ၤပူၣ်ဒ့လၢ စ့တသံးကဲဘျုးလၢ ကဒိးဘၣ်ကဘီယူၤအသိးန့ၣ် ပမ့ၢ်စူးကါ ပ “ဟီၣ်ခိၣ်နီၢ်ခိတၢ်ထူး တၢ်တီၤ” တဖၣ်လၢ ပကဒိးန့ၢ် “တၢ်ထူးတၢ်တီၤ နီၢ်နီၢ်လၢမူခိၣ်”အဂီၢ်န့ၣ်တက့ၢ် (:၁၁).

တၢ်ထူးတၢ်တီၤလၢ ကစၢ်ယ့ၣ်ၡူးစံး “ဟ့ၣ်လီၤကွံၥ်ဆူ ၦၤဖှီၣ်ဖိယၥ်ဖိ”တဖၣ်န့ၣ် မ့ၢ်တၢ်မနုၤလဲၣ်. “မၤန့ၢ်သုဂီၢ်လၢထၢၣ်လၢ အလီၢ်လံၤဝဲတသ့ဘၣ်. တၢ်လုၢ်ဒိၣ်ပှ့ၤဒိၣ်လၢ အလၢၢ်တသ့ဘၣ်လၢ မူခိၣ်, ဖဲတၢ်ဘျၣ်တသုးဘူးဘၣ်အသးဒီး တၢ်အဃၢ်တအီၣ်ဂီၤဘၣ်တၢ်န့ၣ်တက့ၢ်” (လူၤ ၁၂:၃၃). ပတၢ်ထၢနုၥ်စ့ပၥ်ဖှိၣ်မၤတၢ်န့ၣ် တမ့ၢ်လၢ တၢ်အုၣ်က့ၤခီၣ်က့ၤၦၤအဂီၢ် တၢ်အဒိးအလဲဘၣ်. မ့ၢ်တၢ်မၤဂၢၢ်ပတၢ်အုၣ်က့ၤခီၣ်က့ၤ, “ဖဲသုတၢ်လုၢ်ဒိၣ်ပှ့ၤဒိၣ်အိၣ်ဝဲ အလီၢ်န့ၣ် သုသးကအိၣ်ဝဲ ဖဲန့ၣ်လီၤ”(:၃၄).