ဖဲ ၁၇၄၂ နံၣ်, နိၣ်ဝ့ဘၢၣ်, တၢ်သဘံၣ်ဘုၣ်ကဲထီၣ်ဝဲဒၣ်လၢ ကီၢ်အ့ၤကလဲၣ်(England), စတဲးဖိးၡဲယါ(Staffordshire) ဟီၣ်ကဝီၤန့ၣ်လီၤ. တၢ်မၤအသး ခီဖျိတၢ်ထီဒါ ခၠါဝဲးစလ့ၣ်(Charles Wesley) စံၣ်တဲၤတဲလီၤ တၢ်သးခုကစီၣ် န့ၣ်လီၤ. ဖျါလၢ ခၠါဒီးအပုၢ်ကၠီ(န) (John) အတၢ်စံၣ်တဲၤတဲလီၤ တၢ်ဘၣ်ထွဲဒီး တၢ်ဆီတလဲ တၢ်အိၣ်ဖှိၣ်အလုၢ်အလၢ်လၢ အိၣ်ပၥ်ယံာ်တ့ၢ်မးအဃိ ဒီးၦၤဝ့ၢ်ဖိတဖၣ်တူၢ်လိၥ်ဝဲတသ့ဘၣ်န့ၣ်လီၤ.
ဖဲကၠီ(န)ဝဲးစလ့ၣ် နၢ်ဟူဝဲတၢ်ထီဒါတၢ်သဘံၣ်ဘုၣ်လၢ စတဲးဖိးၡဲယါန့ၣ်ဒီး လဲၤဝဲ ဒ်သိးကမၤစၢၤအဝဲၢ်န့ၣ်လီၤ. တယံာ်ဘၣ်ဒီး ၦၤထီဒါတၢ်ဖိတဖၣ် ဟဲကဝီၤဝဲ ကၠီ(န) အိၣ်တၢ် အလီၢ်ဒီး လၢတၢ်သူၣ်ဒူသးဒူအပူၤ ကၠီ(န) ထံၣ်လိၥ်ကတိၤသကိး တၢ်မုၥ်မုၥ် ဒီးၦၤထီဒါတၢ်အခိၣ်အနၢ်တဖၣ် ဝံၤၦၤထီဒါတၢ်တဖၣ် တဂၤဘၣ်တဂၤ အတၢ်သူၣ် ဒိၣ်သးဖျိးတဖၣ် ဆံးလီၤစှၤလီၤ ဟးမၢ်ကွံၥ်ဝဲဒၣ်န့ၣ်လီၤ.
ကၠီ(န)ဝဲးစလ့ၣ် အတၢ်ဆီၣ်လီၤသးဒီး အတၢ်သးစူၤန့ၣ် ကဲထီၣ်တၢ်မၤဂၢၢ် ကမျၢၢ် လၢ အသူၣ်ဒိၣ်သးဖျိးန့ၣ်လီၤ. ဘၣ်ဆၣ် အတၢ်သးစူၤဆီၣ်လီၤအသးန့ၣ် တမ့ၢ် အန့ဆၢၣ်ဒၣ်ဝဲ လၢ ဟဲအိၣ်ထီၣ်ဝဲဒၣ်လၢ အသးကံၢ်ပူၤဘၣ်. မ့မ့ၢ် အိၣ်ဟဲဝဲဒၣ်လၢ ကစၢ်ယ့ၣ်ၡူးမ့ၢ်ၦၤလၢ အုၣ်က့ၤခီၣ်က့ၤတၢ်, မ့ၢ်စ့ၢ်ကီးလၢ ကၠီ(န)ဝဲးစလ့ၣ် ပိၥ်ဝဲဘူးဘူးတံၢ်တံၢ်တဂၤ အအိၣ်လီၤ. ကစၢ်စံးဝဲ “ဟံးထီၣ် ယနီၣ်ယိးဘိလၢသုလိၤ, ဒီးမၤလိတၢ် လၢယၤတက့ၢ်. အဂ့ၢ်ဒ်အံၤ, ယသးစူၤဒီး ယသးဆီၣ်လီၤယသးလီၤ. ဒီးသုကထံၣ်န့ၣ် တၢ်အိၣ်ဘှံးလၢသုသးအဂီၢ်လီၤ”. ဖဲမးသဲ ၁၁:၂၉ ပူၤ ဘၣ်တၢ်ပၥ်ဖျါထီၣ်အီၤ န့ၣ်လီၤ. နီၣ်ယိးဘိလၢအမ့ၢ်တၢ်သးစူၤ ဒီး တၢ်ဆီၣ်လီၤသးအံၤ ကဲထီၣ်တၢ်စိတၢ်ကမီၤလၢ စီၤပီလူး တၤတၢ်ဆူ ပဝဲနၤယၤအဂီၢ် ဖျါဝဲ ဖဲ အ့ဖ့းစူး ၄:၂ စံးဝဲ “အိၣ်ဒီး ကယဲၢ်တၢ်ဆီၣ်လီၤသုသး, ဒီးသူၣ်စူၤသးစူၤ, အိၣ်ဒီး တၢ်ဝံသးစူၤဃဲးဃဲး, ဒီးကီၤသုသးသကိးသကိးလၢ တၢ်အဲၣ်တၢ်ကွံအပူၤ” န့ၣ်လီၤ.
ဒ်ပမ့ၢ်ၦၤဟီၣ်ခိၣ်ဖိအသိး တၢ်သးစူၤဒီး တၢ်ဆီၣ်လီၤသးလၢ အဘၣ်တၢ်ပၥ်ဖျါထီၣ်အီၤန့ၣ် ပကဒုးအိၣ်ထီၣ်အဂီၢ် တသ့ဝဲဒၣ်ဘၣ်န့ၣ်လီၤ. ဘၣ်ဆၣ် ခီဖျိသးအတၤသၣ်အိၣ်ပၥ်လၢပပူၤအဃိ တၢ်သးစူၤတၢ်ဆီၣ်လီၤသးလၢ အမ့ၢ်ကစၢ်ယ့ၣ်ၡူးအတၢ်ပၥ်သူၣ်ပၥ်သးအံၤ ကအိၣ်ထီၣ်တၢ်ပၥ်လီၤဆီပသးဒီး ကဲထီၣ်တၢ်စုကဝဲလၢ ပတၢ်အိၣ်မူအိၣ်ဂဲၤ လၢ ဟီၣ်ခိၣ်ချၢအံၤန့ၣ်လီၤ. တၢ်မ့ၢ်မၤအသးဒ်န့ၣ်ဒီး မ့ၢ်တၢ်မၤလၢၦဲၤ စီၤပီလူး အတၢ်ကတိၤ “သုသူၣ်စူၤသးစူၤအံၤ မ်အအိၣ်ဖျါလၢ ၦၤခဲလၢၥ်အမဲၥ်ညါတက့ၢ်” ဖျါဝဲဒၣ်ဖဲ ဖံလံးပံၤ (၄:၅) အပူၤန့ၣ်လီၤ.
