လၢကီၢ်စဲၢ်ကိၣ်လိၣ်ရၣ်ဒိၣ်(Colorado) ဖဲပအိၣ်တၢ်အလီၢ်န့ၣ်, တၢ်ကိၢ်အဖီးတဖၣ် လဲလိၥ်ချ့မး, တဘျီဘျီလၢတၢ်ဆၢကတီၢ်စှၤမံးနံးအတီၢ်ပူၤန့ၣ်လီၤ. အဃိ, ယဝၤသးဘိ ဒဲၢ်(န)( Dan), အဲၣ်ဒိးသ့ၣ်ညါဒိၣ်မး တၢ်ကိၢ်တၢ်ခုၣ်အတၢ်လီၤဆီလၢပဟံၣ်အလဲပူၤ ဒီးအကပိၥ်အကပၤ န့ၣ်လီၤ. ဒ်အဝဲမ့ၢ်ၦၤအဲၣ်တၢ်ပိးတၢ်လီကဲဘျုး အဆံးဖိတဖၣ်အသိး, အသူၣ်ပိၢ်အသးဝးဝဲ ဖဲအဝဲအိးထီၣ်ကွၢ် အ“တၢ်လိၥ်ကွဲ” လၢခံကတၢၢ်တမံၤလၢအမ့ၢ် သမီမံထၢၣ် လၢအဒုးနဲၣ်ပဟံၣ် အ‘လီၢ်ကဝီၤ’ လွံၢ်တီၤအတၢ်ကိၢ်အဖီးတဖၣ် အခါန့ၣ်လီၤ. ယတဲလိၥ်ကွဲအီၤလၢ တၢ်န့ၣ်မ့ၢ်တၢ်ပိးတၢ်လီနါစိၤဖိတခါလီၤ. ဘၣ်ဆၣ်ဒီး ယကမၢကမၣ် ဖဲယနီၢ်ကစၢ်ဒၣ်ယဲ စ့ၢ်ကီး ယလဲၤကွၢ်ထံသမံသမိး တၢ်ကိၢ်အဖီးတဖၣ် ခဲအံၤခဲအံၤ န့ၣ်လီၤ. ဟံၣ်ပူၤ ဒီးဟံၣ်ချၢအတၢ်လီၤဆီတဖၣ် ထုးန့ၢ်ယသးဒိၣ်မးလီၤ.

ကစၢ်ယ့ၣ်ၡူးဆူးကါဝဲ တၢ်ကိၢ်တၢ်ခုၣ်ဒ်သိး အကတဲဖျါထီၣ် တၢ်အိၣ်ဖှိၣ် လၢ “အလၢၤ”တဖု လၢဝ့ၢ်လီၤဒံၤကံ, ဝ့ၢ်နွံဖျၢၣ်လၢအဘၣ်တၢ်ယၢၤထီၣ်လၢလံၥ်လီၣ်ဖျါအပူၤအကျါတဖျၢၣ်န့ၣ်လီၤ. ဝ့ၢ်အံၤ မ့ၢ်ဝ့ၢ်လၢ အထူးတီၤကတၢၢ်အကျါတဖျၢၣ်, ဒီးမ့ၢ်လီၢ်ခၢၣ်သး လၢအၦဲၤဒီးတၢ်ဟူးတၢ်ဂဲၤဘၣ်ဃးဒီး စ့တၢးအတၢ်ဖံးတၢ်မၤ, တၢ်ကူတၢ်သိး, ဒီးကသံၣ်ကသီတဖၣ်န့ၣ်လီၤ. ဝ့ၢ်အတၢ်ကီတၢ်ခဲ တၢ်တံၥ်တၥ် မ့ၢ်ဝဲ တၢ်တန့ၢ်ဘၣ်ထံဂ့ၤဂ့ၤဘၣ်ဘၣ် လၢလၢလီၣ်လီၣ်ဘၣ်. အဃိ အဝဲလိၣ်ဘၣ် တၢ်ကျိၤလၢ ထံကယွၤထီၣ်ယွၤလီၤလၢအပူၤ, ဒ်သိးကစိၥ်ဆှၢထံလၢ ထံကိၢ်ထီၣ်ပၢၢ် တတီၤ ဆူဝ့ၢ်ပူၤအဂီၢ်လီၤ. နၥ်သက့, တုၤမ့ၢ်ထံကီၢ်အံၤ တုၤဃီၤဆူ ဝ့ၢ်လီၤဒံၤကံန့ၣ်, ထံန့ၣ် ကိၢ်ဧီၢ်တကိၢ်, ခုၣ်ဧီၢ်တခုၣ်လၢၤဘၣ်.

ဒ်န့ၣ်အသိး တၢ်အိၣ်ဖှိၣ်စ့ၢ်ကီး တအိၣ်ဒီးတၢ်သူၣ်ဆူၣ်သးဂဲၤဘၣ်. ယ့ၣ်ၡူးစံးဝဲ, “ယသ့ၣ်ညါ နတၢ်ဖံးတၢ်မၤလၢ ခုၣ်ဧီၢ်တခုၣ်, ကိၢ်ဧီၢ်တကိၢ်ဘၣ်လီၤ. နခုၣ်မ့ၢ်ဂ့ၤ, နကိၢ်မ့ၢ်ဂ့ၤ, ယသးအိၣ်လၢနကမ့ၢ်တၢ်တမံၤမံၤလီၤ. မၤသးဒ်န့ၣ်ဒီး, နတခုၣ်ဘၣ်, နတကိၢ်ဘၣ်, မ့ၢ်နလၢၤဒီး, ယကဘှိထီၣ်ကွံၥ်နၤလၢ ယကိၥ်ပူၤလီၤ” (လီၣ် ၃:၁၅-၁၆). ဒ်ခရံၥ်စံးဝဲအသိး “ဖဲဒၣ်ၦၤလၢႇအဲၣ်အီၤတဖၣ်န့ၣ်, ယသိၣ်ဃီၣ်အီၤ, ဒီးယသိၣ်က့ၤသီက့ၤအီၤလီၤ. မၤသးဒ်န့ၣ်ဒီး, ဂဲၤလိၥ်ဒီးပီၢ်ယၢ်လီၤက့ၤနသးတက့ၢ်” (:၁၉).

ပၦၤအုၣ်က့ၤခီၣ်က့ၤကစၢ်အတၢ်သကွံၢ်ကညးအံၤ မ့ၢ်ဒံးစ့ၢ်ကီးတၢ်လၢ ပကဘၣ်မၤအီၤ တဘျီဃီန့ၣ်လီၤ. နနီၢ်သးန့ၣ် မ့ၢ်တၢ်လၢအတကိၢ်တခုၣ်ဧါ. တူၢ်လိၥ်နဲ ကစၢ်အတၢ်ဘှီဘၣ်က့ၤတၢ်ဒီး ဃ့အီၤလၢအကမၤစၢၤနၤ ဒ်သိးနကမူလၢ အဂဲၤလိၥ်ဒီးကဲၤဆူၣ်ထီၣ်အဂီၢ်တက့ၢ်.