ဖဲ ၁၄၇၈ နံၣ်န့ၣ်, လီၣ်ရဲၣ်စိၣ် ဒံၢ် မဒံၢ်ခၠံၣ်(Lorenzo de Medici), ၦၤပၢဝ့ၢ်ဖလီရဲး(စ) (Florence) လၢကီၢ်အံၣ်တလံၣ်(Italy), ဃ့ၢ်ပူၤဖျဲးကွံၥ်ဝဲလၢ တၢ်မၤဒၢၣ်အသးသမူန့ၣ်လီၤ. ဖဲအၦၤထံဖိကီၢ်ဖိတဖၣ် ကျဲးစၢး မၤဆၢက့ၤ တၢ်မၤဒၢၣ်အၦၤခိၣ်နၢ်အခါ, တၢ်ဒုးတၢ်ယၤအိၣ်ထီၣ်ဝဲန့ၣ်လီၤ. တၢ်အိၣ် အသးမၤအသး နးထီၣ်ဝဲ, ဒီးစီၤပၤအအၢအသီ ဖၣ်ရဲၣ်တ့-တၢ(Ferrante I) လၢ ဝ့ၢ်န့ပဲ(Naples) ကဲထီၣ် လီၣ်ရဲၣ်စိၣ်အဒုၣ်အဒါန့ၣ်လီၤ. ဘၣ်ဆၣ် အတၢ်မၤအဒူအဃိၤ တမံၤန့ၣ် လဲလိၥ်ကွံၥ် တၢ်ခဲလၢၥ်လီၤ. အဝဲလဲၤအိၣ်သကိး စီၤပၤ, လဲၤဝဲထဲစုယၢ်ခီ ဒီးထဲတဂၤဧိၤန့ၣ်လီၤ. တၢ်မၤအဒူအံၤ, ဃုၥ်ဒီး အတၢ်သ့ထုးသူၣ်ထုးသးဒီး အတၢ်ကူၣ်သ့ကူၣ်ဘၣ်န့ၣ်, မၤန့ၣ် ဖၣ်ရဲၣ်တ့ အတၢ်ဘၣ်သူၣ်ဘၣ်သး, ဒီးတၢ်ဒုးတၢ်ယၤကတၢၢ်ဝဲ န့ၣ်လီၤ.

စီၤဒၤနံးယ့လးစ့ၢ်ကီး လဲလိၥ်စီၤပၤတဂၤအသးန့ၣ်လီၤ. လၢဘၤဘူလိၣ်အပူၤ ၦၤလၢအတဲဖျါထီၣ် စီၤပၤနဘူၤကးန့စၢ်အတၢ်မံမီၢ် လၢအလီၤသးတံၥ်တၥ်တခါ ဒီး ဖးတၢ်မံမီၣ်အခီပညီသ့ဝဲန့ၣ် တအိၣ်နီတဂၤဘၣ်. တၢ်အံၤ မၤဒိၣ်ထီၣ်စီၤပၤအသးယ တုၤဒၣ်လဲၥ် အဝဲပၥ်လီၤအသးလၢ အကမၤသံကွံၥ် အၦၤကူၣ်လိၥ်တၢ်ခဲလၢၥ်တဖၣ်, ပၣ်ဃုၥ်ဒီး စီၤဒၤနံးယ့လးဒီးအတံၤသကိးတဖၣ်လီၤ. ဘၣ်ဆၣ် စီၤဒၤနံးယ့လး ဃ့လဲၤဆူစီၤပၤ လၢအအဲၣ်ဒိးမၤသံအီၤ တဂၤအအိၣ်လီၤ (ဒၤ ၂:၂၄).

စီၤဒၤနံးယ့လး အိၣ်ဆၢထၢၣ်ဖဲ စီၤနဘူၤကးန့စၢ်အမဲၥ်ညါ, ဒီးဟ့ၣ်လၤ ဟ့ၣ်ကပီၤခဲလၢၥ် ဆူယွၤအအိၣ် လၢအလီၣ်ဖျါထီၣ် တၢ်မံမီၢ်အတၢ်ခူသူၣ်အဃိ န့ၣ်လီၤ. ဖဲဝံံဒၤနံးယ့လး တဲဖျါထီၣ် တၢ်မံမီၢ်ဒီးဖးတၢ် အခီပညီအခါ, စီၤပၤနဘူၤကးန့စၢ် ဟ့ၣ်ဝဲ တၢ်လၤကပီၤဆူ “ကစၢ်တဖၣ်အကစၢ်ယွၤ ဒီးစီၤပၤတဖၣ်အယွၤ” (:၄၇,ခ့ခါ) န့ၣ်လီၤ. စီၤဒၤနံးယ့လးအတၢ်သးဒူ လၢပတထံၣ်ညီနုၢ်, လၢအဟဲအိၣ်ထီၣ်လၢ အတၢ်နၥ်လၢယွၤအပူၤန့ၣ် မၤပူၤမၤဖျဲးအဝဲဒီး အတံၤသကိးတဖၣ်, ဒီးၦၤကူၣ်လိၥ်တၢ် အဂၤတဖၣ် လၢတၢ်သံ ဖဲမုၢ်နံၤအဝဲန့ၣ်န့ၣ်လီၤ.

လၢပတၢ်အိၣ်မူအပူၤ, ဆၢကတီၢ်တဖၣ်အိၣ်ဝဲ ဖဲပလိၣ်ဘၣ်တၢ်သူၣ်ဒူ သးဒူ လၢပကဒုးသ့ၣ်ညါ တၢ်ကစီၣ်လၢ အကါဒိၣ်တဖၣ်အဂီၢ်န့ၣ်လီၤ. မ်ယွၤပၢဆှၢ ပတၢ်ကတိၤတဖၣ် ဒီးဟ့ၣ်ၦၤတၢ်ကူၣ်သ့ လၢပကသ့ၣ်ညါ တၢ်လၢပကဘၣ် စံးကတိၤ ဒီးတၢ်သ့တၢ်ဘၣ်လၢ ပကစံးကတိၤအီၤဂ့ၤဂ့ၤဘၣ်ဘၣ်တက့ၢ်.