ပိၥ်မုၣ်ဖိတဂၤ ဟးဂဲၤထံ ဖဲပီၣ်လဲၣ်ကပၤထံကျိၤဖိအပူၤ ဒီးအပၢ်ကွၢ်ထွဲအီၤလီၤ. အရီးဘၢၣ် ခီၣ်ဖံးဖိ ထီတုၤအခီၣ်လ့ၢ်ခိၣ်လီၤ. လီၤဝဲထံကျိၤဖိအဆီတဆီဆူလၥ်တကပၤ သီၣ်ပြံၥ်ပြူၥ် တုၤလၢထံဘျံးအခီၣ်ဖံးဖိန့ၣ်လီၤ. ဖဲအဝဲလဲၤဆူညါတသ့လၢၤန့ၣ် ကဲးကိးပသူထီၣ်, “ပါပၢ် ယလီၤဘျၢလံ” အပၢ်ခါထီၣ်သၢဘီ ဒီးတုၤဆူအကပၤ ဒီး တွံၢ်ထီၣ်အီၤဆူကၢၢ်ခိၣ် အိၣ်ဒီးတပံၢ်လါဟ့လီၤ. အဝဲ တၢၤကွံၥ်ထံလၢ အခီၣ်ဖံးပူၤ ဒီးနံၤဝဲလီၤ.

ဖဲယွၤဒုးပူၤဖျဲး ၦၤကွဲးထါစီၤဒၤဝံးလၢ အဒူၣ်အဒါအစုဝံၤန့ၣ် အဝဲဆ့ၣ်နီၤ တစိၢ်ဖိ ဒီးထုးကွံၥ်အခီၣ်ဖံး ဒီးပျဲအသးမုၥ်ထီၣ်ဆူၣ်ထီၣ်ဝဲလီၤ. အဝဲကွဲးတၢ်သးဝံၣ်လၢ ပၥ်ဖျါထီၣ် အတၢ်သးပလၢၢ်ဘၣ် ဒ်အံၤ, “ယကိးထီၣ်ယွၤလၢ အဘၣ်တၢ်စံးထီၣ်ပတြၢၤ, ဒီးယကတုၤလၢ တၢ်အုၣ်က့ၤခီၣ်က့ၤလၢယဒုၣ်ယဒါလီၤ” (၂ ၡမူၤ ၂၂:၄). အဝဲ စံးထီၣ်ပတြၢၤယွၤ ဒ်အမ့ၢ်အလၢၢ်, အတိၥ်, အကတီၤ ဒီးအတၢးထီၣ်ထီလီၤ (:၂-၃). ဆူညါတတီၤ ခီဃီၤဆူထါလၢ မၤဆၢက့ၤယွၤအတၢ်ဟ့ၣ်ဆၢတဖၣ်လီၤ. ဟီၣ်ခိၣ် ကနိးကစုၥ်လီၤ. ယွၤဟဲလီၤလၢမူခိၣ်လီၤ. လၢအမဲၥ်ညါ မ့ၣ်အူခုၣ်ဟဲထီၣ်ဝဲလီၤ. အကလုၢ်သီၣ် ဒ်လီသီၣ်အသိး ဒီးထုးထီၣ်အီၤလၢထံအါအကျါလီၤ (:၈, ၁၀, ၁၃-၁၅, ၁၇).

တနံၤအံၤ, ဘၣ်သ့ၣ်သ့ၣ် နပလၢၢ်ဘၣ်လၢ ၦၤထီဒါနၤအိၣ်ဝးတရံးနၤလီၤ. နကလီၤဘျၢလၢ တၢ်ဒဲးဘးသ့ၣ်သ့ၣ်ဒီး ကီလၢနဂီၢ်လၢ နကဒိၣ်ထီၣ်အါထီၣ်လၢ သူၣ်လၢသးလီၤ. လၢခါလၢအပူၤကွံၥ် ယွၤမၤစၢၤနၤဒ်လဲၣ်န့ၣ် မၤဖျါထီၣ်ကဒါက့ၤ ဒီးစံးဘျုးအီၤဒီးဃ့ကညးအီၤလၢ ကမၤကဒီးဝဲအသီတဘျီတက့ၢ်. စံးဘျုးအီၤ လီၤဆီဒၣ်တၢ်လၢ မၤထူၣ်ဖျဲးနၤ ခီဖျိဆှၢက့ၤနၤဆူ အဘီမုၢ်ပူၤတက့ၢ် (ကလီး ၁:၁၃).