ၦၤဒၢး(ချ) ခ့ခါၦၤတ့တၢ်ဂီၤ အဲးဘၢးမီဒၢၣ်မဲ အတၢ်ဂီၤလၢ အတ့ဝဲ “ကူၤရ့ၤန့ ဖိစီၤၡံမိၣ်” တဂၤ ဒ်အဖျါလၢ တၢ်တ့ပူၤအသိး အမဲၥ်လီၤသၦၢ်လီၤ. စီၤၡံမိၣ်အမဲၥ်ချံတဖၣ် ပၥ်ဖျါထီၣ် တၢ်ဝံဃၢလၢ အနီၢ်ခိဒီးအသး မ့ၢ်လၢမူဒါလၢ ဘၣ်မၤဝဲအဃိလီၤ. ဒ်လံၥ်စီဆှံအတၢ်ဂ့ၢ်ဖျါ ဖဲမၢ်ကူး ၁၅ အသိး ပမၤလိဘၣ်လၢ အဝဲအိၣ်လၢ ကမျၢၢ်ကွၢ်ကီတၢ် အကျါန့ၣ် တၢ်ကိးထီၣ်အီၤ ဒ်သိးကယိးဝဲ ယ့ၣ်ၡူးအထူၣ်စုညါလီၤ.
စီၤမၢ်ကူး တဲဘၣ်ၦၤလၢ စီၤၡံမိၣ်ဟဲလၢ “ဝ့ၢ်ကူၤရ့ၤန့” , ဝ့ၢ်ဖးဒိၣ်လၢ အိၣ်လၢ ကီၢ်မိၢ်ၦၢ်အၤဖြၤကၤကလံၤစိး အိၣ်ဒီးဝ့ၢ်ဖိအနီၣ်ဂံၢ်အါမး ဖဲကစၢ်ယ့ၣ်ၡူးအဆၢကတီၢ်န့ၣ်လီၤ. ဖျါလၢ အဝဲဟဲဆူ ဝ့ၢ်ယရူၤၡလ့ၣ်လၢ ကမၤဘူၣ်လဲၤကပၥ် ဖဲန့ၣ်လီၤ. ဖဲန့ၣ် အဝဲသ့ၣ်ညါဝဲလၢ အိၣ်ဘၣ်လၢၦၤဂီၢ်မုၢ်လၢကူၣ်မၤသံယ့ၣ်ၡူးနၥ်သက့ အဝဲမၤစၢၤဘၣ် ကစၢ်ယ့ၣ်ၡူးခီဖျိတၢ်မၤအဆံး ဘၣ်ဆၣ်အိၣ်ဒီး အခီပညီတမံၤလီၤ (မၢ်ကူး ၁၅:၂၁). လၢအဆိ ဖဲလံၥ်မၢ်ကူးအပူၤန့ၣ် ယ့ၣ်ၡူး တဲဘၣ် ၦၤပိၥ်အခံတဖၣ်, “ဖဲဒၣ် ၦၤလၢတၢ်မိၣ်ဟဲပိၥ်အသးလၢယခံတဂၤဂၤန့ၣ်, မ်အညိကွံၥ်အသးဒၣ်ဝဲ, ဒီးဟံးန့ၢ်အထူၣ်စုညါဒီးပိၥ်ယခံတက့ၢ်” (၈:၃၄). ဖဲကျဲလဲၤဆူကီၤလၤကီၤသါန့ၣ် စီၤၡံမိၣ် မၤတၢ်လၢခရံၥ်စံးဝဲ ဆူအပျဲၢ်အဘီၣ်တဖၣ်အအိၣ်လီၤ. အဝဲဟံးန့ၢ်ထူၣ်စုညါလၢ တၢ်ဟ့ၣ်အီၤဒီး ယိးထီၣ်အီၤလၢ ယ့ၣ်ၡူးအဂီၢ်လီၤ.
ပအိၣ်စ့ၢ်ကီးဒီးထူၣ်စုညါတဖၣ်လၢ ပဘၣ်ယိးအီၤ ကမ့ၢ်သ့ၣ်သ့ၣ် တၢ်ဆူးတၢ်ဆါ, တၢ်မၤလၢအတၤၦၤတဖၣ်, ၦၤလၢပအဲၣ်အီၤအတၢ်သံ မ့တမ့ၢ် တၢ်မၤအၢ မၤနးၦၤလၢ တၢ်နၥ်အဃိလီၤ. ဒ်ပစိၥ်တၢ်တဖၣ်န့ၣ် လၢတၢ်နၥ်အပူၤန့ၣ်, မ့ၢ်ပဒုးနဲၣ်ၦၤဂၤတဖၣ်ဆူခရံၥ်အတၢ်တူၢ်သံအသးလၢပဂီၢ် လၢထူၣ်စုညါလိၤလီၤ. အထူၣ်စုညါ မ့ၢ်တၢ်လၢ မၤဃူမၤဖိးက့ၤၦၤဒီးယွၤ ဒ်မ့ၢ်တၢ်ဂံၢ်တၢ်ဘါလၢ ပတၢ်လဲၤအပူၤလီၤ.