ဖဲယလဲၤမၤတၢ်လၢတၢ်ယါဘျါ ခဲစၢၣ်လီၢ်တတီၤ‚ လၢအယံၤဒီးယဟံၣ်လၢ မံးလာ် အကယၤအါမး‚ ဒ်ပှၤကဟုကယာ်ယမိၢ်အဂီၢ်အခါ ယဃ့လၢပှၤကထုကဖၣ်တၢ်လၢ ယဂီၢ်‚ တၢ်ဆၢကတီၢ်အါလါပူၤကွံာ်န့ၣ် တၢ်အိၣ်ယံၤဒီးပှၤကညီ ဒီးတၢ်အိၣ်ထဲတဂၤအံၤ မၤလီၤဘှံးယၤလီၤႉ ယမ့ၢ်ဃၣ်ကွံာ်လၢယနီၢ်ခိ‚ နီၢ်သးဒီးသးအသဟီၣ်လၢာ်ဂံၢ်လၢာ်ဘါ အဃိန့ၣ်န့ၣ်‚ ယအံးထွဲကွၢ်ထွဲယမိၢ်ကသ့ဒ်လဲၣ်ႉ
ဘၣ်တနံၤန့ၣ်‚ တံၤသကိးတဂၤ ဆှၢန့ၢ်ယၤ တၢ်ဘိၣ်တဘိၣ်လၢ တၢ်တမုၢ်လၢ် ပာ်အပူၤလီၤႉ ကၠိဒံၢ် ဆးန့ၢ်ယၤ တၢ်ထုကဖၣ်အယၣ်လုးဘၢ ဂီၤလုးတဘ့ၣ်‚ တၢ်မၤ သ့ၣ်နီၣ်တမံၤလၢ ဒုးသ့ၣ်နီၣ်ပှၤ ပအိၣ်ဒီးပှၤတဖၣ်လၢ အထုကဖၣ်တၢ်လၢပဂီၢ်ကိးနံၤ လီၤႉ ဖဲယလုးထီၣ် ယၣ်လုးကပုာ်လုးဖိတဘျီလၢ်လၢ်‚ ယပလၢၢ်ဘၣ် ယွၤအတၢ်ဖိးဟု ယၤ ခီဖျိယွၤအပှၤကညီတဖၣ် အတၢ်ထုကဖၣ်လီၤႉ အါနံၣ်အါလါပူၤကွံာ်ဒၣ်လဲာ် ကစၢ်ယွၤ သူဒံးယၣ်ဂီၤလုးဖိအံၤ ဒ်သိးကမၤမုာ်ထီၣ်က့ၤယၤဒီး ကမၤဆူၣ်ထီၣ်ယသး အတၢ်ဆၢတဲာ်တဖၣ်လီၤႉ
ပှၤတၢ်မၢဖိစီၤပီလူး မၤလီၤတံၢ်တၢ်ထုကဖၣ်လၢပှၤဂၤဂီၢ် အတၢ်အကါဒိၣ်ဒီး အိၣ်ဒီးသးအတၢ်မၤသီထီၣ်က့ၤ အစိကမီၤအဂ့ၢ်လီၤႉ ခီဖျိအတၢ်သကွံၢ်ကညး ဘၣ်ဃး တၢ်မၤစၢၤဆီၣ်ထွဲဒီး တၢ်ဟ့ၣ်ဂံၢ်ဟ့ၣ်ဘါအိၣ်ဒီးတၢ်ထုကဖၣ်လၢ အတၢ်လဲၤတၢ်က့ၤ အခါန့ၣ်‚ စီၤပီလူး ဒုးနဲၣ်ဖျါထီၣ်၀ဲ ပှၤလၢအထုကဖၣ်တၢ်လၢ ပှၤဂၤအဂီၢ်တဖၣ် မၤသကိးတၢ်လၢ ဘီမုၢ်တၢ်ဖံးတၢ်မၤအပူၤဒ်လဲၣ်ဒ်လဲၣ်အဂ့ၢ်လီၤ (ရၠာစးိမ့ၤ ၁၅း၃၀) ႉ တၢ်ဟ့ၣ်ထီၣ် တၢ်ဃ့ကညးလီၤတံၢ်အံၤ‚ တမ့ၢ်ထဲပှၤတၢ်မၢဖိအံၤ ဒုးနဲၣ်အတၢ်သန့ၤသး ဒီးတံၤသကိးပှၤစူၢ်နာ်ခရၠာစးံာ်တဖၣ် အတၢ်ဆီၣ်ထွဲဘၣ်ႉ မ့မ့ၢ် နာ်၀ဲလၢ ကစၢ်ယွၤ စံးဆၢတၢ်ထုကဖၣ်တဖၣ် လီၤလိၢ်လီၤလးန့ၣ်လီၤ (း၃၁-၃၃) ႉ
ပ၀ဲကိးဂၤ ပကလဲၤခီဖျိဘၣ် မုၢ်နံၤတဖၣ် ဖဲပအိၣ်ဘၣ်ထဲတဂၤအခါလီၤႉ ဘၣ်ဆၣ် စီၤပီလူး ဒုးနဲၣ်ပှၤ ပကဃ့လၢ ပှၤဂၤကထုကဖၣ်န့ၢ်ပဂီၢ် ဒ်ပ၀ဲတဖၣ် ပဃ့ ထုကဖၣ်လၢပှၤဂၤအဂီၢ်အသိးလီၤႉ ဖဲပဘၣ်တၢ်ဘိၣ်ဘံပှၤလၢ ယွၤအပှၤကညီတဖၣ်အတၢ်ဃ့ကညးစၢၤတၢ်ထုကဖၣ်န့ၣ်‚ ပဒိးန့ၢ်ဘၣ်ယွၤအတၢ်ဂံၢ်တၢ်ဘါ ဒီးအတၢ်မၤမုာ်ထီၣ်သ့၀ဲ‚ ဖဲပကအိၣ်တပူၤလၢ်လၢ်န့ၣ်လီၤႉ