ယအိၣ်ဆိးလၢခီၣ်လိၣ်ရၠာစးၣ်ဒိၣ်‚ ကီၢ်စဲၣ်တဘ့ၣ်လၢအအိၣ်လၢယူၢ်ႉအဲး (စ) အမုၢ်နုာ်လၢ အဘၣ်တၢ်သ့ၣ်ညါလၢ အအိၣ်ဒီး လ့မုၢ်လ့တီကစၢၢ်တဖၣ် ဒီးကိးနံၣ်မူခိၣ်ဖီတဖၣ်လီၤ၀ဲန့ၣ်လီၤႉ ဘၣ်ဆၣ်‚ န့ဆၢၣ်အတၢ်တတၢာ်တနါအနးကတၢၢ်လၢ ယကီၢ်စဲၣ်အံၤ‚ တဘၣ်ဃးဒီးမူခိၣ်ဖီဘၣ်‚ မ့မ့ၢ်ဟဲအသးလၢတၢ်စူၤဒိၣ်ဒိၣ်မုၢ်မုၢ်န့ၣ်လီၤႉ သီ (မ) စၢၣ်ထံလုၣ်ဘၢတၢ် ဖးဒိၣ် ဟဲအိၣ်ထီၣ် ဖဲလါယူၤလံ ၃၁‚ ၁၉၇၆ နံၣ် ဖဲ၀့ၢ်လၢတၢ်လဲၤဟးကသုၣ် အအဲး (စ) ထဲး (စ) ဖး (ခ) အကပိာ်ကပၤန့ၣ်လီၤႉ ဖဲထံလုၣ်ဘၢတၢ်၀ံၤ‚ လၢခံတဆီဘၣ်တဆီ ပှၤသံပှၤပှၢ် အိၣ် ၁၄၄ ဂၤ‚ လၢအတပၣ်ဃုာ်ဒီး တၢ်ဖံးအီၣ်မၤအီၣ် အလီၢ်အကျဲအတၢ်ဟးဂီၤဘၣ်လီၤႉ လၢတၢ်တတၢာ်တနါအံၤအဃိ‚ တၢ်မၤလိတၢ်လၢအကါဒိၣ်လၢ တၢ်ဂ့ၢ်အံၤ တၢ်မၤအီၤလၢ လီၢ်က၀ီၤ‚ လီၤလီၤဆီဆီလၢ ကျဲမုၢ်ဒီးကျဲမုၢ်ဖးထီတဖၣ် အခီၣ်ထံးအဂ့ၢ်အကျိၤန့ၣ်လီၤႉ တၢ်ဒူၣ်လၢ အအိၣ်လၢကျဲမုၢ်တဖၣ်အကပၤ ဘၣ်တၢ်မၤအီၤလၢ ဂာ်လၢၢ်ဒါလၢအတူၢ် ကလံၤမုၢ်အသဟီၣ်န့ၢ်၀ဲန့ၣ်လီၤႉ ပမ့ၢ်စံးလၢကျဲအဂၤတဘိ‚ အ၀ဲသ့ၣ် အိၣ်ဒီး တၢ်အခီၣ် ထံးလၢ အလီၤတံၢ်လီၤဆဲး ဒီးဂံၢ်ဆူၣ်ဘါဆူၣ်န့ၣ်လီၤႉ
လၢပတၢ်အိၣ်မူအပူၤ တၢ်သံကွၢ်တမ့ၢ်လၢ မ့ၢ်ထံကဟဲလုၣ်ဘၢတၢ်ဧါ‚ မ့မ့ၢ် ထံကလုၣ်ဘၢတၢ်ခဲလဲၣ်န့ၣ်လီၤႉ တဘျီဘျီ‚ ပအိၣ်ဒီး တၢ်ပာ်သူၣ်ပာ်သးလၢတၢ်အံၤဘၣ်ဆၣ်‚ အါစုအါဘျီ‚ ပတသ့ၣ်ညါဘၣ်ႉ ကစၢ်ယ့ၣ့်ှှူးပာ်ဖျါထီၣ် တၢ်အခီၣ်ထံးလၢ အဂၢၢ်အကျၢၤလၢ ပှၤတဂၤလၢ သူၣ်ထီၣ်ဟံၣ်တမ့ၢ်ထဲအနၢ်ဟူကစၢ်အကလုၢ်ကထါဘၣ်‚ မ့မ့ၢ် မူထဲွမၤထွဲ တၢ်ဒ်အကလုၢ်ကထါအသိး (လူၤကၣ် ၆း၄၇) န့ၣ်လီၤႉ တၢ်မူထွဲမၤထွဲ ဒ်အ၀ဲအကလုၢ်ကထါအသိးန့ၣ် မၤသးဒ်တၢ်ဂၢ်လီၤဂာ်လၢၢ်ဒါလၢ ပတၢ်အိၣ်မူအပူၤန့ၣ်လီၤႉ ဖဲထံလုၣ်ဘၢတၢ် မ့ၢ်ဟဲတုၤဒီးပဆၢထၢၣ်ဂၢၢ်ကျၢၤကန့ၢ်၀ဲ မ့ၢ်လၢပအိၣ်ဒီးတၢ်ခီၣ်ထံး လၢအကျၢၤ (း၄၈) အဃိန့ၣ်လီၤႉ တၢ်တမူထွဲမၤထွဲ တၢ်ကလုၢ်ကပာ်တ့ၢ်န့ၢ်ပှၤ တၢ်အိၣ်မူလၢ အလီၤပှီၢ်ညီညီ ဒီးဟးဂူာ်ဟးဂီၤ (း၄၉) န့ၣ်လီၤႉ တၢ်အံၤမ့ၢ်တၢ်လီၤဆီလၢ ပှၤကူၣ်သ့ ဒီးပှၤဟးဂီၤဖိ အတၢ်အိၣ်သးအဘၢၣ်စၢၤန့ၣ်လီၤႉ
တဘျီဘၣ်တဘျီ‚ တၢ်အံၤဂ့ၤ၀ဲ ဒ်သိးတၢ်ကဆိကတီၢ်ဒီး စံၣ်ညီၣ်ပဲာ်ဖးလီၤက့ၤသးလၢ တၢ်အခီၣ်ထံးလၢ အဘၣ်ထွဲဒီးပတၢ်အိၣ်မူန့ၣ်လီၤႉ ကစၢ်ယ့ၣ့်ှှူးကမၤစၢၤ ပှၤလၢ တၢ်မၤကျၢၤထီၣ်က့ၤ တၢ်လီၢ်လၢ အဂံၢ်စၢ်ဘါစၢ်တဖၣ် ဒ်သိးပကသ့ဆၢထၢၣ်ဂၢၢ်ဂၢၢ် ကျၢၤကျၢၤ လၢအစိကမီၤအပူၤ‚ ဖဲထံလုၣ်ဘၢတၢ်ဟဲတုၤအကတီၢ်န့ၣ်လီၤႉ