ဖဲယဖိခွါလၢ အဒိၣ်ထီၣ်တဂၤ‚ ကွၢ်ဆၢၣ်မဲာ်ဘၣ် တၢ်အိၣ်သးကီခဲအခါ ယဒုးပလီၢ်အီၤလၢ ယွၤအတၢ်ကဟုကယာ်တပယူာ်ဃီ ဒီးအတၢ်ဆီၣ်ထွဲမၤစၢၤ ဖဲအကတီၢ်တဖၣ်လၢ အပၢ်အတၢ်ဖံးတၢ်မၤတအိၣ်အကတီၢ်န့ၣ်လီၤႉ ယဂံၢ်ထီၣ်က့ၤယဲကစၢ်ယွၤ အတၢ်ဟ့ၣ်ဂံၢ်ဟ့ၣ်ဘါ ပဟံၣ်ဖိဃီဖိဒီး ဟ့ၣ်လီၤပှၤ တၢ်ဃူတၢ်မုာ်အကတီၢ်တဖၣ် ဖဲယမိၢ် ဘၣ်ကွၢ်ဆၢၣ်မဲာ်ဘၣ် လူၣ်ခ့မံယါတၢ်ဆါဒီး လီၤမၢ်ကွံာ်န့ၣ်လီၤႉ ပာ်ဖျါထီၣ်တၢ်ဂ့ၢ်တဖၣ်လၢအဘၣ်ထွဲ ဒီးယွၤအကလုၢ်တီလၢ အအိၣ်လၢလံာ်စီဆှံအပူၤန့ၣ် ယမၤဂၢၢ်မၤကျၢၤလၢ ယွၤမ့ၢ် ကစၢ်လၢအဂ့ၤ၀ဲလၢ အတၢ်ပၢၤဃာ်အကလုၢ်ကထါန့ၣ်လီၤႉ ယဆှၢယဖိခွါလၢ ပဟံၣ်ဖိဃီဖိတၢ်သ့ၣ်နီၣ်ထီၣ် ကစၢ်ယွၤ အတၢ်ဒါလီၤန့ၢ်ပှၤ ကျဲလၢပကပိာ်‚ ဒီးဒုးသ့ၣ်နီၣ်ထီၣ်အီၤလၢတၢ်လၢအဘၣ်ထွဲဒီးကျဲတဖၣ် လၢပနာ်န့ၢ်အီၤသ့‚ ဖဲလၢပမ့ၢ်လဲၤခီဂာ်ဘၣ်ပသးသမူ တၢ်သံ ကဒုကစၢၢ်ကဆူးဒီး တၢ်စိခိၣ် အကတီၢ်တဖၣ်န့ၣ်လီၤႉ ဖဲလၢပဘၣ်ဟူးဂဲၤကွၢ်ဆၢၣ်မဲာ်တၢ် မ့တမ့ၢ် သူၣ်ဖှံသးညီဘၣ်က့ၤ‚ ယွၤအိၣ်ဒီးပှၤ‚ အဲၣ်ပှၤကွံပှၤ ဒီးအဘျုးအဖှိၣ် လၢပှဲၤလၢပဂီၢ် န့ၣ်လီၤႉ
ဖဲယသးအိၣ်တဲဖျါတၢ်နာ်လၢ အဟ့ၣ်ဆူၣ်ထီၣ် တၢ်အကျဲကူၣ်နၢၤလၢ ယကစၢ် ဒၣ်ယဲဒီး ကစၢ်ယွၤတခီ တ့ထီၣ်လုၢ်လၢ်လၢအသ့နီၤဟ့ၣ်တၢ်တဖၣ် ဒ်သိးခါဆူညါစၢၤသွဲသီတဖၣ် ကမိၤန့ၢ်အတၢ်စူၢ်တၢ်နာ်လၢအပူၤန့ၣ်လီၤႉ ဒ်ပှၤအံၣ်စရၠာစး့လးဖိတဖၣ် သ့ၣ်နီၣ်ထီၣ်က့ၤလၢ အထံၣ်ဘၣ်၀ဲလၢကစၢ်ယွၤအတၢ်မၤလၢ ခါလၢအပူၤကွံာ်ကိးမံၤအခါန့ၣ် ကစၢ်ယွၤ တ့ထီၣ်ကျဲတဖၣ်လၢ တၢ်နာ်လၢ အ၀ဲသ့ၣ်ကသ့ၣ်နီၣ်ထီၣ် ကစၢ်ယွၤဒါလီၤန့ၢ် ကျဲတဖၣ်လၢကဘၣ်ပိာ်၀ဲန့ၣ်လီၤႉ
ပှၤအံၣ်စရၠာစး့လးဖိတဖၣ် အိၣ်ဒီးတၢ်အုၣ်သးလၢ ကစၢ်ယွၤဟံးဃာ် တၢ်မ့ၢ်တၢ်တီ လၢ အအၢၣ်လီၤ၀ဲတဖၣ်လၢ အ၀ဲသ့ၣ်ကဘၣ်ပိာ်ထွဲအခံ ( ၅မိၤ ၄း၃-၆) န့ၣ်လီၤႉ ထီဘိ ကစၢ်ယွၤနၢ်ဟူဒီးစံးဆၢ အ၀ဲသ့ၣ်အတၢ်ထုကဖၣ် (း၇) န့ၣ်လီၤႉ လၢတၢ်သးခုဒီး တၢ်တဲဖျါ ထီၣ် ဆူစၢၤသွဲၣ်သီတဖၣ် (း၉) ‚ ပှၤအံၣ်စရၠာစး့းလးဖိတဖၣ် နီၤဟ့ၣ် ယွၤအကလုၢ်ကထါတဖၣ်လၢ ကဘၣ်တၢ်ပၢၤဃာ်လၢ ယွၤမ့ၢ်ကစၢ်အမ့ၢ်အတီထဲတဂၤဧိၤ (း၁၀) န့ၣ်လီၤႉ
ဒ်ပတဲဖျါထီၣ်ပကစၢ်လၢအစိဒိၣ်ကမီၤထီ‚ သူၣ်ကညီၤသးကညီၤတၢ်ဒီး အိၣ်ဒီး တၢ်အဲၣ်တံၢ်တံၢ်‚ ပ၀ဲဒီး ပှၤဂုၤပှၤဂၤအတၢ်စူၢ်တၢ်နာ်အံၤ ကကဲထီၣ်တၢ်ဂံၢ်ဆူၣ်ဘါဆူၣ် လၢအမ့ၢ်၀ဲတီ၀ဲလၢ တၢ်နာ်န့ၢ်အီၤ (ယွၤ) သ့၀ဲလီၤစိၤလီၤထီန့ၣ်လီၤႉ