ပိာ်ခွါဖိတဂၤန့ၣ် ကွၢ်ဆၢၣ်မဲာ်ဘၣ်တၢ်တၤတဖၣ်လၢ အကၠိဧိၤကီၣ်ဧိၤအဃိ အ၀ဲအပၢ်စးထီၣ် သိၣ်လိအီၤ ဒ်သိးက့ှူးထီၣ်၀ဲ တၢ်တိာ်ထူကိးမုၢ်ဂီၤတချုးဖဲအလဲၤဆူကၠိ လၢ ‘ယစံးဘျုးယွၤလၢ အကိးပၢၢ်ထီၣ်ယၤလၢတနံၤအံၤန့ၣ်လီၤႉ ယကလဲၤဆူကၠိ ဒီးမၤလိ ဘၣ်တၢ်ဒီး ကဲထီၣ်ဘၣ်ခိၣ်နၢ်လၢ ကစၢ်ယွၤအတၢ်ဘၣ်အသးလၢ ယကကဲထီၣ် န့ၣ်လီၤႉ’’ တၢ်ပတံအံၤ မ့ၢ်ကျဲတဘိလၢပၢ်မုၢ်လၢ်လၢ ကမၤစၢၤအဖိခွါလၢ တၢ်မူထွဲမၤထွဲလၢ အကစၢ်ဒၣ်၀ဲဒီးကဆၢတဲာ် တၢ်ကသ့လၢ သးသမူအတၢ်တၤလၢ တၢ်ဟးဆှဲးအီၤတသ့၀ဲတဖၣ်န့ၣ်လီၤႉ
လၢကျဲတဘိ‚ ခီဖျိတၢ်မၤစၢၤဖိခွါလၢ ကသ့ၣ်နီၣ်ထီၣ် တၢ်ပတံအံၤ‚ ပၢ်အံၤ စ့ၢ်ကီး မၤတၢ်တမံၤမံၤလၢ အလီၤပလိာ်လၢ တၢ်လၢကစၢ်ယွၤမၤလိာ် ပှၤအံၣ်စရၠာစး့လးဖိတဖၣ်လၢ ပှၤမုၢ်ကနၢအပူၤဒီး တၢ်ကတိၤတဖၣ်လၢ ယမၤလိာ်နၤလၢ မုၢ်မဆါတနံၤ အံၤ‚ ဘၣ်အိၣ်လၢ နသးကံၢ်ပူၤန့ၣ်လီၤႉႉႉ ဒီးနဘၣ်သိၣ်က့ၤသီက့ၤ နဖိနလံၤလၢအီၤႉႉႉ’’ (၅ မိၤ ၆း၆-၇) န့ၣ်လီၤႉ
ဖဲအဟး၀့ၤ၀ီၤလၢ ပှၤမုၢ်ကနၢအပူၤလၢ အနံၣ်လွံၢ်ဆံ‚ စၢၤသွဲၣ်သီလၢ အံၣ်စရၠာစး့လးတဖၣ် နုာ်လီၤဘၣ်ဆူ ကီၢ်တၢ်စံးပာ်အပူၤလီၤႉ ကစၢ်ယွၤသ့ၣ်ညါဆိ ပာ်စၢၤ လၢ တၢ်အံၤတမ့ၢ်တၢ်လၢအညီအဘှါလၢ အ၀ဲသ့ၣ်အဂီၢ် ဆူတၢ်ကမၤနၢၤ တၢ် ဖဲလၢအ၀ဲသ့ၣ် မ့ၢ်တပၢၤဃာ် တၢ်ပညိၣ်တၢ်ဆူ အ၀ဲအအိၣ်ဘၣ် န့ၣ်လီၤႉ လၢတၢ်အံၤ အဃိ ခီဖျိစီၤမိၤဒီး‚ အ၀ဲမၤန့ၢ်ထီၣ်၀ဲ ပှၤအံၣ်စရၠာစး့လးဖိလၢ ကသ့ၣ်နီၣ်ဒီး စူၢ်ကစၢ်ယွၤအကလုၢ် ဒ်သိးကမၤစၢၤ အဖိအလံၤတဖၣ်လၢ ကသ့ၣ်ညါဒီး အိၣ်ဒီးတၢ်အဲၣ်ဘၣ်ကွံဘၣ် ကစၢ်ယွၤ‚ ခီဖျိတၢ်စံးတၢ်ကတိၤတၢ်လၢ ယွၤအကလုၢ်ကထါ တၢ်မၤလိာ်‚ ‘‘ဒီးတုၤ နဆ့ၣ်နီၤလၢနဟံၣ်ဒီး တုၤနပိာ်ကျဲ ဒီးတုၤနမံလီၤဒီးတုၤနဂဲၤဆၢထၢၣ်ႉႉႉ’’ (း၇) န့ၣ်လီၤႉ
ကိးဂီၤစုာ်စုာ်‚ ပ၀ဲစ့ၢ်ကီး ပကအၢၣ်လီၤလၢ ကပျဲယွၤအကလုၢ်ကထါလၢ ကနဲၣ်ပသူၣ်ပသး‚ ဒ်ပမူတၢ်မူလၢ အသ့စံးဘျုးအီၤအသိးန့ၣ်လီၤႉ