ကလံၤမုၢ်တွၤနးနးကလဲာ်ဟဲဘၣ်လၢ ပ၀့ၢ်သီ‚ ပာ်တ့ၢ်ကွံာ်ကလံၤစုၣ်စီၣ်ဒီး မူခိၣ်လၢ အခံးသူန့ၣ်လီၤႉ ယကိးထီၣ်ယထွံၣ်ဖိခီလံၣ် လၢကဟးထီၣ်လၢတၢ်ချၢလၢ ဟါကတီၢ် န့ၣ်လီၤႉ ယသူၣ်ယသးဃၢဒိၣ်မးလၢ တၢ်တၤတၢ်တဖၣ်လၢ အဟဲအိၣ်ထီၣ်တစဲးတစဲးလၢယဟံၣ်ဖိဃီဖိ ဖဲပသုးအသးဆူ ၀့ၢ်သီဖိအံၤန့ၣ်လီၤႉ တၢ်သဘံၣ်ဘုၣ် အကလုာ်ကလုာ်လၢ တၢ်ဂံၢ်အီၤတသ့‚ မၤဟးဂီၤကွံာ် ပတၢ်မုၢ်လၢ်ဒီးတၢ်ကွၢ်စိတဖၣ် အါမးန့ၣ်လီၤႉ ဖဲယဟးကယီကယီဒီး ခီလံၣ်ဟးနၢကွၢ် တပံၢ်တမါန့ၣ်ဒီး ယဒိးယနၢ်လၢ ထံမူကျိတဘိအသီၣ်လၢ အဟဲယွၤလီၤလၢယဟံၣ်ကပၤလီၤႉ တၢ်ကပီၤဆံးဆံးဖိတဖၣ်‚ ကပီၤပံာ်လ့ပံာ်လ့လၢ ဖီဖိတဖၣ်လၢ အမဲထီၣ် လၢထံမူကျိကၢၢ်နံၤ အကဘျၣ်အဖီခိၣ်လီၤႉ တၢ်အံၤ မ့ၢ်‘နါပံာ်လ့ဖိ’ တဖၣ်န့ၣ်လီၤႉ ကစၢ်ယွၤဘိၣ်ဘံက့ၤယၤလၢ တၢ်ဃူတၢ်မုာ် ဖဲယကွၢ်တၢ်ကပီၤဖိအံၤလၢ အဆဲးဖျိကွံာ် တၢ်ခံးသူန့ၣ်လီၤႉ ယဆိကမိၣ်ထီၣ်ယဲ ပှၤကွဲးထါစံးထီၣ်ပ့တၢၤ သရၠာစးၣ်စီၤဒၤ၀ံးအထါ လၢ‚ ‘နဒုးကပီၤထီၣ် ယမ့ၣ်အူဒၢ‚ ယွၤယကစၢ် မၤကပီၤထီၣ် ယတၢ်ခံးန့ၣ်လီၤ’ (စံး ၁၈း၂၈) ႉ ‘ကိးသBတီထီၣ် ကစၢ်ယွၤအတၢ်ဃၣ်ကွံာ်အတၢ်ခံးသူဆူတၢ်ကပီၤ’ စီၤဒၤ၀ံး ပာ်ဖျါထီၣ် တၢ်အိၣ်ဒီး တၢ်နာ်န့ၢ်ယွၤ အတၢ်မၤပှဲၤဒီး တၢ်ဒီတဒၢတၢ် (း၂၉-၃၀) န့ၣ်လီၤႉ ဃုာ်ဒီး ကစၢ်ယွၤအတၢ်ဂံၢ်ဆူၣ် ဘါဆူၣ်‚ အ၀ဲဟံးဃာ်ပၢၤဃာ်က့ၤ တၢ်ကိးမံၤလၢ အဟဲအိၣ်ထီၣ်လၢ အသးသမူအကျဲ အံၤသ့၀ဲ (း၃၂-၃၅) လီၤႉ လၢတၢ်နာ်န့ၢ် ယွၤလၢအမူ၀ဲ အတၢ်အိၣ်ဒီးအီၤလၢ တၢ်အိၣ်သးကိးမံၤအပူၤ‚ စီၤဒၤ၀ံးအၢၣ်လီၤလၢ ကစံးထီၣ်ပ့တၢၤက့ၤ ကစၢ်ယွၤလၢ ပှၤကလုာ် တဖၣ်အကျါဒီး ကသး၀ံၣ်တၢ်စံးထီၣ်ပ့တၢၤယွၤအမံၤ (း၃၆-၄၉ ) န့ၣ်လီၤႉ
ဖဲလၢပမ့ၢ်ဘၣ်တူၢ်ဘၣ်၀ဲ သးသမူအကလံၤမုၢ်တွၤလၢ ပတထံၣ်စိ မ့တမ့ၢ် သးခုသးမုာ်ဘၣ်လၢ တၢ်ဂၢၢ်တၢ်ကျၢၤလၢ အဟဲအိၣ်ထီၣ် ဖဲတၢ်စူၤကလံၤအူ၀ံၤ အလီၢ်ခံ‚ ယွၤအတၢ်ဃူတၢ်မုာ် အတၢ်ကပီၤလၢအအိၣ်ထီၣ် တပယူာ်ဃီလၢ ပသးသမူအကျဲအံၤ‚ တိဖျိကွံာ် တၢ်ခံးသူလၢပတၢ်အိၣ်မူအံၤ သ့၀ဲလီၤႉ ပပၢ်ကစၢ်ယွၤ ထီဘိမ့ၢ်ပဂံၢ်ပဘါ‚ ပတၢ်အိၣ်တဒၢ‚ ပှၤလၢအမၤမုာ်ထီၣ်ပှၤ ဒီး ကစၢ်လၢအမၤထူၣ်ဖျဲးထီၣ်ပှၤလၢ တၢ်ကီတၢ်ခဲတဖၣ်န့ၣ်လီၤႉ