ယတၢ်လဲၤခီဖျိလၢ ယမဲာ်ဆှးအဒိၣ်ကတၢၢ်မ့ၢ် မုၢ်တနံၤလၢ ယဟ့ၣ်တၢ်ကစီၣ်လၢ သရၠာစးၣ်^သရၠာစးၣ်မုၣ်တဖၣ်‚ ကၠိဖိတဖၣ် ဒီးတံၤသကိးတဖၣ်လၢ စ့ၤမ့ၤနရၠာစးံၤကၠိတဖျၢၣ်လၢ နံၣ်ယဲၢ်ဆံအမူးန့ၣ်လီၤႉ ယတီၣ်ထီၣ်ယလံာ် လၢယကွဲးလၢယစုတဖၣ် ဒီးကွၢ်တၢ်ဆူ ကမျၢၢ်ဖးဒိၣ်‚ လီၤလီၤဆီဆီ ယမဲာ်ချံလိၤဆူ သရၠာစးၣ်^သရၠာစးၣ်မုၣ်ဒိၣ်စိ လၢအဆ့ၣ်နီၤလၢ တၢ်မဲာ်ညါကတၢၢ်လီၢ်ဆ့ၣ်နီၤအကျိၤ‚ လၢအကူအကၤဆ့ကၤ အလၢအပှဲၤ ဒီးကွၢ်တၢ်ထံထံဆးဆးတဖၣ်န့ၣ်လီၤႉ တကီၢ်ခါ ယသးတအိၣ်က့ၤလၢ ယလိၤဘၣ်ႉ ယထးခိၣ် ဃ့ထီဒီး တၢ်လၢယကတဲတဖၣ် ဟါမၢ်ကွံာ်လၢယခိၣ်နူာ်ပူၤလီၤႉ ယဃုကမူၣ်ခွဲးခွး လံာ်ကျိၤအဆိကတၢၢ်လၢ ယကတဲဖျါ ၀ံၤဒီး ယစးထီၣ်ကတိၤတၢ်လီၤႉ မ့ၢ်လၢတၢ်ပျံၤတၢ်ဖုးအပူၤ ယစုစးထီၣ်ဃၣ် လံာ်တကဘျံးဘၣ်တကဘျံး ဖဲယထးခိၣ်တခီ တဲဖျါထီၣ်တၢ်လၢ အခီပညီတအိၣ်၀ဲတဖၣ်န့ၣ်လီၤႉ လၢကျဲတဘိဘိ ယမၤက့ၤတၢ်အံၤ‚ လၢယက့ၤဆ့ၣ်နီၤက့ၤဆူ ယလီၢ်ဆ့ၣ်နီၤ ဒီးကွၢ်စူၣ်တၢ်လၢ တၢ်သူၣ်ထီၣ်အဒါန့ၣ်လီၤႉ ယအဲၣ်ဒိး သံဘၣ်ယသးန့ၣ်လီၤႉ
ဘၣ်ဆၣ် ယမၤလိန့ၢ်တၢ်လၢ တၢ်မဲာ်တိၢ်မဲာ်ဆှး ကဲထီၣ်တၢ်အဂ့ၤ‚ ဖဲလၢတၢ်အံၤမ့ၢ်ဆှၢပှၤလၢ တၢ်ဆီၣ်လီၤသးန့ၣ်လီၤႉ မ့ၢ်လၢတၢ်အံၤမ့ၢ် နီၣ်၀ံာ်ခံလၢ အအိးထီၣ်ကစၢ်ယွၤ အသးန့ၣ်လီၤႉ လံာ်စီဆှံစံးဘၣ်ပှၤ လၢ ‘‘ယွၤထီဒါ ပှၤပာ်ထီၣ်ထီသး ဒီး ဟ့ၣ်လီၤတၢ်ဘျုးတၢ်ဖှိၣ်လၢ ပှၤဆီၣ်လီၤအသးလီၤ’’ (ယၤ ၄း၆) ႉ အ၀ဲ ဒုးစူၤလီၤပှၤ လၢအဆီၣ်လီၤအသးဒီး တၢ်ဘျုးတၢ်ဖှိၣ်လီၤႉ ကစၢ်ယွၤ အနီၢ်ကစၢ်ဒၣ်၀ဲ စံးလၢ‚ ‘‘ႉႉႉယကကွၢ်ပှၤတဂၤအံၤ‚ ပှၤလၢအသူၣ်စူၤသးစူၤဒီး အသူၣ်ကၢ်အသးလီၤ‚ ဒီးပျံၤ ယကလုၢ်ကထါန့ၣ်လီၤ’’ (ယ့ှှါ ၆၆း၂) ႉ ဒ်ပဆီၣ်လီၤပသးလၢ ကစၢ်ယွၤအမဲာ်ညါအသိး အ၀ဲကပာ်ထီၣ်ထီက့ၤပှၤန့ၣ်လီၤ (ယၤကိာ် ၄း၁၀) ႉ
တၢ်ဆှၣ်လီၤသးဒီး တၢ်မဲာ်ဆှး ဟဲစိာ်ပှၤဆူ ကစၢ်ယွၤအအိၣ် ဒ်သိးကဘှီက့ၤ ပတၢ်အိၣ်မူန့ၣ်လီၤႉ ဖဲပလီၤဃံၤကွံာ်ကတီၢ်‚ တၢ်အံၤ မ့ၢ်တၢ်လီၤဃံၤလၢ အ၀ဲ အစုတီၤလိၤအဖီခိၣ်န့ၣ်လီၤႉ