ဖဲ ပှၤလၢအမၤကဲထီၣ်တၢ်ဂီၤမူ ၀ံလံၣ်အိဘၢၣ်စထရၠာစးံး ဒုးနဲၣ်ပှၤတမှံၤတဖၣ်လၢ ‘လါ’အက့ၢ်အဂီၤ ခီဖျိကွၢ်လၢ မဲာ်ထံကလၤပီၤလၢအထံၣ်တၢ်လၢအယံၤ (ထဲလံၣ် စကိး) န့ၣ်ဒီး‚ အ၀ဲသ့ၣ် အသူၣ်သပ့ၤသးသပ့ၤဘၣ်အသး ဖဲအကွၢ်ထီၣ်ဘၣ် ‘လါ’ ဘူးဘူးတံၢ်တံၢ်ဒ်သိးအံၤ‚ ကတိၤကသွံကသွါသကိးတၢ်ဒီး ကမၢကမၣ်ဘၣ်တၢ်န့ၣ်လီၤႉ တၢ်ထံၣ်ဘၣ်တၢ်လၢ အအိၣ်ဒီးအလၤကပီၤဒ်သိးအံၤ‚ အိဘၢၣ်စထရၠာစးံး ဆှဲဖျါထီၣ်လၢ‚ ‘တၢ်အံၤ‚ မၤပှဲၤပသးဒီး တၢ်ကမၢကမၣ်ဘၣ်တၢ်လၢ တၢ်အိၣ်၀ဲတမံၤမံၤ လၢ အဒိၣ်၀ဲ မုၢ်၀ဲန့ၢ် ပနီၢ်ကစၢ်တဖၣ်န့ၣ်လီၤ’’ႉ
ပှၤကွဲးထါစံးထီၣ်ပ့တၢၤလၢ အမ့ၢ် စီၤဒၤ၀ံး စ့ၢ်ကီး ကမၢကမၣ်ဘၣ်တၢ်လၢ ကစၢ်ယွၤတ့လီၤ၀ဲလၢ မူကပိာ်လိၤအတၢ်ကပီၤတဖၣ်န့ၣ်လီၤႉ အ၀ဲတဲဖျါထီၣ်လၢ ‘တုၤ ယကွၢ်နမူခိၣ် နစုမုၢ်စုနၢအတၢ်မၤ‚ လါဒီးဆၣ်ဧိၤဖီဧိၤလၢ နပာ်လီၤအီၤဒီး‚ ပှၤကညီလၢနကသ့ၣ်နီၣ်ထီၣ်က့ၤအီၤ‚ ဒီးပှၤကညီဖိလၢ နကအိၣ်သကိးအီၤန့ၣ်‚ မ့ၢ်မနုၤလဲၣ် (စံး ၈း၃-၄) န့ၣ်လီၤႉ
စီၤဒၤ၀ံးအတၢ်သံကွၢ်လၢ တၢ်ဆီၣ်လီၤသး‚ တ့ၢ်နုာ်ပသးလၢ တၢ်ကမၢကမၣ် ဘၣ်တၢ်လၢ တၢ်ထံၣ်အပူၤ ဖဲပမၤလိတၢ်လၢ‚ ကစၢ်ယွၤတ့ အမူခိၣ်ဒီး ဟီၣ်ခိၣ်အသီ‚ တလိၣ်ဘၣ်၀ဲ လါ မ့တမ့ၢ် မုၢ်အတၢ်ကပီၤလၢၤဘၣ်န့ၣ်လီၤႉ လၢတၢ်အံၤအလီၢ် ပှၤတၢ်မၢဖိ စီၤယိၤဟၣ်စံး၀ဲလၢ‚ ကစၢ်ယွၤအလၤကပီၤလၢ အကပီၤထီၣ်အံၤ‚ ကမၤပှဲၤ တၢ်ကပီၤလၢ အလိၣ်၀ဲကိးမံၤဒဲးန့ၣ်လီၤႉ ‘ဒီးမုၢ်မ့ၢ်ဂ့ၤ‚ လါမ့ၢ်ဂ့ၤ‚ ကပီၤထီၣ် လၢ၀့ၢ်ပူၤ အလီၢ်တအိၣ်ဘၣ်ႉ အဂ့ၢ်ဒ်အံၤ‚ ယွၤအလၤကပီၤန့ၣ်‚ ကပီၤထီၣ်န့ၢ်အီၤ‚ ဒီးအမ့ၣ်အူဒၢန့ၣ် မ့ၢ်သိဖိလီၤႉ ‘ႉႉႉ အဂ့ၢ်ဒ်အံၤ‚ ဖဲန့ၣ် မုၢ်နၤတအိၣ်ဘၣ်၀ဲဘၣ်’ (လီၣ်ဖျါ၂၁း၂၃-၂၅) ႉ
မ့ၢ်တၢ်မနုၤတမံၤလၢ အဒုးကမၢကမၣ်ဘၣ် ပတၢ်ဆိကမိၣ်န့ၣ်လဲၣ်ႉ မ့ၢ်လီၤ အခဲအံၤဒၣ်လဲာ်‚ ပလဲၤခီဖျိ မူခိၣ်အတၢ်ကပီၤအံၤသ့၀ဲ ခီဖျိလၢတၢ်ဃုထံၣ်န့ၢ် ကစၢ်ခရၠာစးံာ်လၢ အမ့ၢ်ဟီၣ်ခိၣ်အတၢ်ကပီၤန့ၣ်လီၤႉ လၢအိဘၢၣ်စထရၠာစးံး အတၢ်ထံၣ်‚ ‘‘ပကဘၣ်ကွၢ်ထီၣ်တၢ်ဆူ ထးတလီၢ်လီၢ်’’ န့ၣ်လီၤႉ ဖဲပမၤဒ်သိးအံၤန့ၣ် မ်ပကထံၣ် ဘၣ် ပၢ်ကစၢ်ယွၤတက့ၢ်ႉ