ဖဲသရၠာစးၣ်တဂၤ ကတိၤတၢ် ဖဲတၢ်ခူၣ်လီၤ ပှၤသုးဖိလီၢ်လံၤတဂၤအကတီၢ်န့ၣ်‚ အ၀ဲဒၣ် ကတိၤဒီး ဆိကမိၣ်က့ၤ၀ဲ ဘၣ်ဃးဒီး ‘‘တၢ်သံန့ၣ် မ့ၢ်မနုၤလဲၣ်’’ လီၤတံၢ်လီၤဆဲးလီၤႉ ဘၣ်ဆၣ်ဒီး တုၤအကတိၤဒီး ဆိကမိၣ်တၢ်န့ၣ်၀ံၤ အလီၢ်ခံန့ၣ် လၢအကတဲဘၣ် ပှၤဂီၢ်မုၢ် လၢ ‘‘ကဘၣ်ဃုထံၣ်သ့ၣ်ညါယွၤ‚ ဒ်သိးလဲၣ်အလီၢ်န့ၣ်‚ ကတိၤဆိကမိၣ်ဒီးတယာ်၀ဲ‚ ‘တၢ်သ့ၣ်တဖၣ်လၢ အကဲထီၣ်၀ဲ’ ဒီးတၢ်ဃုထံၣ်န့ၢ်အီၤတသ့ လၢ ယွၤအကလုၢ်ကထါအပူၤသ့ၣ်တဖၣ်အဂ့ၢ်လီၤႉ ဒီး ယကတနၣ် အတၢ်ကတိၤသ့ၣ်တဖၣ် ဒီးလၢယသးပူၤတခီ ယဆိကမိၣ်ယဲ လၢ ‘‘တၢ်မုၢ်လၢ် အိၣ်၀ဲဒၣ်ဖဲလဲၣ်’’ နှၣ်လီၤႉ
လၢခံကတၢၢ်န့ၣ် သရၠာစးၣ်မၢ ပသး၀ံၣ်ပျၢ်တၢ်န့ၣ်လီၤႉ ပဆၢထၢၣ်ဒီး ပသး၀ံၣ်ပျၢ်တၢ် လၢတၢ်သး၀ံၣ်အမံၤ လၢ ‘‘ယွၤန့ၣ်ဒိၣ်၀ဲ’’ လီၤႉ ပှၤကိးဂၤဒဲး စံးပ့တၢၤယွၤ လၢအသူၣ်ကံၢ်သးလဲအပူၤ ခီဖိျတၢ်သး၀ံၣ် အံၤလီၤႉ လၢတစိၢ်ဖိ အကတီၢ်န့ၣ် ပှၤခဲလၢာ်အသးလဲလိာ်က့ၤလီၤႉ တဘီျဃီ‚ ဒီးလၢ တၢ်ကမၢကမၣ်အပူၤ‚ ဖဲအတုၤတၢ်သး၀ံၣ်သၢဆၢတဆၢန့ၣ်‚ ယတၢ်သးဟူး၀း လုၢ်ဘၢကွံာ် ယကလုၢ်လီၤႉ

ဆူဟီၣ်ခိၣ်လာ် ယွၤဒိၣ်စၢ် ဆှၢလီၤဖိခွါ ဒ်သိး ကတူၢ်သံ၀ဲအသးယဂီၢ်
လၢထူၣ်အလိၤ ယဂီၢ် အ၀ဲတူၢ်တၢ်ဖှီၣ် သွံၣ်စီဆှံယွၤဒီးစိာ်ကွံာ်တၢ်ကမၣ်

ဖဲပသး၀ံၣ်တၢ်သး၀ံၣ်အံၤကတီၢ်န့ၣ်‚ ယဆိကမိၣ်ထီၣ်‚ မ့ၢ်ကစၢ်ယွၤ ကလီၣ်ဖျါထီၣ်၀ဲ လၢတၢ်ခူၣ်လီၤပှၤအံၤ အကတီၢ်ဧါန့ၣ်လီၤႉ ဘၣ်ဆၣ် နီၢ်နီၢ်တခီ‚ အ၀ဲဒၣ် တပာ်တ့ၢ်ဘၣ်ပှၤဘၣ်ႉ ပမ့ၢ်ကွၢ်ဃီၤဆူ လံာ်နီၢ်အ့ၤစတၢ်အပူၤန့ၣ် ပကထံၣ်ဘၣ် တၢ်မ့ၢ်တၢ်တီအံၤလီၤႉ ပှၤယူဒၤဖိသ့ၣ်တဖၣ် ဘၣ်အိၣ်၀ဲလၢထံဂၤကီၢ်ဂၤ‚ ဒီးပှၤလၢအအိၣ်ဒီး တၢ်စိတၢ်ကမီၤတဖၣ် အဲၣ်ဒိးမၤသံအ၀ဲသ့ၣ်လီၤႉ သနာ်က့ လၢဆၢကတီၢ် လၢအစံး၀ဲ အကတီၢ်န့ၣ်‚ စီၤပၤလၢ အယွၤတအိၣ်တဂၤ‚ ဟ့ၣ်၀ဲ ပှၤအံၣ်စရၠာစး့လးဖိတဖၣ် အခွဲးအယာ်လၢ ကဒီသဒၢအသးသမူ လၢပှၤလၢအအဲၣ်ဒိး မၤသံအီၤ သ့ၣ်တဖၣ် အစုပူၤလီၤ (အ့ၤစတၢ် ၈း၁၁-၁၃) ႉ
ဒ်ကစၢ်ယွၤလီၣ်ဖျါထီၣ်အသးလၢ‚ တၢ်ခူၣ်လီၤ အတၢ်သး၀ံၣ် အလံာ်မဲာ်ဖျၢၣ် အပူၤန့ၣ်‚ ပကမၢကမၣ် အလီၢ်တအိၣ်ဘၣ်ႉ လၢခံကတၢၢ်န့ၣ် ယွၤကဃၣ်ကဒါကွံာ် ‘‘တၢ်မၤသံ ပှၤဒီကလုာ်’’ ဆူ ‘‘တၢ်သးခုအပူၤ’’‚ တၢ်ဒိးသံအသးလၢ ထူၣ်စုညါအလိၤဆူ တၢ်ဂဲၤဆၢထၢၣ်သမူထီၣ်က့ၤဒီး‚ တၢ်အုၣ်က့ၤခီၣ်က့ၤန့ၣ်လီၤႉ