‘‘ယ၀ၤ ဘၣ်တၢ်ဒုးထီထီၣ်အလီၢ်ဒီး မၢအီၤလၢ ကလဲၤမၤတၢ် လၢထံဂၤကီၢ်ဂၤန့ၣ်လီၤႉ ဘၣ်ဆၣ် မ့ၢ်လၢယအိၣ်ဒီး တၢ်ဘၣ်ယိၣ်လၢ ယကပာ်လီၤတဲာ် ယဟံၣ်အဃိ‚ လၢတၢ်သးတဆူၣ်အပူၤန့ၣ်‚ ယ၀ၤဂ့ၢ်လိာ်၀ဲလၢ ကလဲၤမၤတၢ်လၢ ထံဂၤကီၢ်ဂၤန့ၣ်လီၤႉ’’ မ့ၢ်ဒၣ် ယတံၤသကိးတဂၤ အတၢ်ထံၣ်လီၤပလိာ်ဒီးယၤ ဒီးစံး၀ဲ ‘‘တၢ်ဘၣ်ယိၣ်ဘၣ်ဘီှလၢ တၢ်လဲလိာ်ဖးဒိၣ်အံၤ‚ ဒုးယံၤထီၣ်ယၤလၢ ပကဖိးဃာ် တူၢ်လိာ် တၢ်ကွၢ်ဆၢၣ်မဲာ်အသီအံၤလီၤႉ အဃိ တဘျီဘျီန့ၣ် န့ကၢးဆိကမိၣ် စံၣ်ညီၣ်တဲာ်လၢ နသုတတူၢ်လိာ်ဘၣ် တၢ်လဲလိာ်အသီ ဒ်သိးအံၤတဖၣ်န့ၣ်လီၤႉ
ပှၤအံၣ်စရၠာစး့လးဖိတဖၣ်‚ ဒုးဆိကတီၢ်ကွံာ် အတၢ်သူၣ်ကိၢ်သးဂီၤ‚ ဖဲတၢ်ကိးထီၣ်အ၀ဲသ့ၣ် လၢ ကအိၣ်ဆိးလၢ တၢ်လီၢ်လီၤလီၤဆီဆီ‚ လၢအယွၤလီၤ၀ဲဒီး တၢ်နုၢ်ထံ‚ ဒီးကနဲစီန့ၣ်လီၤ (၂ မိၤ ၃၃း၃) ႉ ဖဲအ၀ဲဒၣ်သ့ၣ်တဖၣ် နၢ်ဟူ၀ဲလၢ ၀့ၢ်သ့ၣ်တဖၣ်န့ၣ် ဒိၣ်၀ဲယိာ်၀ဲ‚ ဒီးပှၤ၀့ၢ်ဖိသ့ၣ်တဖၣ် အဂံၢ်ဆူၣ်ဘါဆူၣ် အကတီၢ်နှၣ်ပျံၤတၢ်‚ ဒီးပှၤအါဂၤဂ့ၢ်လိာ်၀ဲလၢကလဲၤနုာ်၀ဲဆူ ကီၢ်တၢ်စံးပာ်အံၤ အပူၤန့ၣ်လီၤ (၄ မိၤ ၁၃း၂၇-၂၈) ႉ
ဘၣ်ဆၣ် စီၤယိၤ။ဒီး‚ စီၤကၤလ့း ခံဂၤတခီ သဆၣ်ထီၣ်အ၀ဲသ့ၣ်အခံဒ်သိး ကနာ်ယွၤ‚ ဒီးစံး၀ဲဒၣ်‚ ‘‘ပျံၤပှၤသ့ၣ်တဖၣ်လၢ အအိၣ်လၢ ကီၢ်အံၤတဖၣ်အပူၤတဂ့ၤ‚ အဂ့ၢ်ဒ်အံၤ ယွၤအိၣ်ဒီးပှၤလီၤ’’ (၄ မိၤ ၁၄း၉) ႉ ပှၤသ့ၣ်တဖၣ်န့ၣ် ဒိၣ်ဒီးဆူၣ်၀ဲဘၣ်ဆၣ်‚ ပှၤအံၣ်စရၠာစး့လးဖိတခီ ကဘၣ်အိၣ်ဒီး တီဒီးယွၤလီၤႉ
ယတံၤသကိးတဂၤအံၤ တဒိးန့ၢ်၀ဲ‚ ဒ်တၢ်ခါလီၤအကလုၢ် လၢအကသုးအသး ဆူကီၢ်အဂၤတဘ့ၣ်‚ ဒ်သိးဒီးပှၤအံၣ်စရၠာစး့လးဖိသ့ၣ်တဖၣ်အသိးန့ၣ်ဘၣ်ႉ သနာ်က့‚ အ၀ဲသးအုး‚ ဒီးပျဲအတၢ်ပျံၤတၢ်ဖုးကးတံၢ်သဒၢကွံာ် တၢ်အခွဲးအယာ် လၢအဂ့ၤသ့ၣ် တဖၣ်လီၤႉ နဲတခီ မ့ၢ်ဒ်သိးလဲၣ်ႉ မ့ၢ်နဘၣ်ကွၢ်ဆၢၣ်မဲာ်၀ဲဒီး တၢ်ကဲထီၣ်လၢ အလီၤပျံၤ လီၤဖုးတဖၣ်ဧါႉ နမ့ၢ်ကွၢ်ဆၢၣ်မဲာ်ဘၣ်န့ၣ်‚ မ်နကသ့ၣ်ညါနဲလၢ ယွၤအိၣ်ဒီးနၤ‚ ဒီးအ၀ဲဒၣ် ကနဲၣ်နကျဲလီၤႉ မ့မ့ၢ်ဒ်န့ၣ်အသိး‚ ဒီးယွၤအတၢ်အဲၣ်လၢ အလီၤမၢ်၀ဲတသ့န့ၣ်‚ ပကဘၣ် လဲၤပ၀ဲဆူညါ လၢတၢ်နာ်ကစၢ်ယွၤအပူၤန့ၣ်လီၤႉ